૬. ધમ્મચરિયસુત્તં

૨૭૬. ધમ્મચરિયં બ્રહ્મચરિયં, એતદાહુ વસુત્તમં;

પબ્બજિતોપિ ચે હોતિ, અગારા અનગારિયં.

૨૭૭. સો ચે મુખરજાતિકો, વિહેસાભિરતો મગો;

જીવિતં તસ્સ પાપિયો, રજં વડ્ઢેતિ અત્તનો.

૨૭૮. કલહાભિરતો ભિક્ખુ, મોહધમ્મેન આવુતો;

અક્ખાતમ્પિ ન જાનાતિ, ધમ્મં બુદ્ધેન દેસિતં.

૨૭૯. વિહેસં ભાવિતત્તાનં, અવિજ્જાય પુરક્ખતો;

સંકિલેસં ન જાનાતિ, મગ્ગં નિરયગામિનં.

૨૮૦. વિનિપાતં સમાપન્નો, ગબ્ભા ગબ્ભં તમા તમં;

સ વે તાદિસકો ભિક્ખુ, પેચ્ચ દુક્ખં નિગચ્છતિ.

૨૮૧. ગૂથકૂપો યથા અસ્સ, સમ્પુણ્ણો ગણવસ્સિકો;

યો ચ એવરૂપો અસ્સ, દુબ્બિસોધો હિ સાઙ્ગણો.

૨૮૨. યં એવરૂપં જાનાથ, ભિક્ખવો ગેહનિસ્સિતં;

પાપિચ્છં પાપસઙ્કપ્પં, પાપઆચારગોચરં.

૨૮૩. સબ્બે સમગ્ગા હુત્વાન, અભિનિબ્બજ્જિયાથ [અભિનિબ્બજ્જયાથ (સી. પી. અ. નિ. ૮.૧૦)] નં;

કારણ્ડવં [કારણ્ડં વ (સ્યા. ક.) અ. નિ. ૮.૧૦] નિદ્ધમથ, કસમ્બું અપકસ્સથ [અવકસ્સથ (સી. સ્યા. ક.)].

૨૮૪. તતો પલાપે [પલાસે (ક.)] વાહેથ, અસ્સમણે સમણમાનિને;

નિદ્ધમિત્વાન પાપિચ્છે, પાપઆચારગોચરે.

૨૮૫. સુદ્ધા સુદ્ધેહિ સંવાસં, કપ્પયવ્હો પતિસ્સતા;

તતો સમગ્ગા નિપકા, દુક્ખસ્સન્તં કરિસ્સથાતિ.

ધમ્મચરિયસુત્તં [કપિલસુત્તં (અટ્ઠ.)] છટ્ઠં નિટ્ઠિતં.