૧૩. સમ્માપરિબ્બાજનીયસુત્તં

૩૬૧. ‘‘પુચ્છામિ મુનિં પહૂતપઞ્ઞં,

તિણ્ણં પારઙ્ગતં પરિનિબ્બુતં ઠિતત્તં;

નિક્ખમ્મ ઘરા પનુજ્જ કામે, કથં ભિક્ખુ

સમ્મા સો લોકે પરિબ્બજેય્ય’’.

૩૬૨. ‘‘યસ્સ મઙ્ગલા સમૂહતા, (ઇતિ ભગવા)

ઉપ્પાતા સુપિના ચ લક્ખણા ચ;

સો મઙ્ગલદોસવિપ્પહીનો,

સમ્મા સો લોકે પરિબ્બજેય્ય.

૩૬૩. ‘‘રાગં વિનયેથ માનુસેસુ, દિબ્બેસુ કામેસુ ચાપિ ભિક્ખુ;

અતિક્કમ્મ ભવં સમેચ્ચ ધમ્મં, સમ્મા સો લોકે પરિબ્બજેય્ય.

૩૬૪. ‘‘વિપિટ્ઠિકત્વાન પેસુણાનિ, કોધં કદરિયં જહેય્ય ભિક્ખુ;

અનુરોધવિરોધવિપ્પહીનો, સમ્મા સો લોકે પરિબ્બજેય્ય.

૩૬૫. ‘‘હિત્વાન પિયઞ્ચ અપ્પિયઞ્ચ, અનુપાદાય અનિસ્સિતો કુહિઞ્ચિ;

સંયોજનિયેહિ વિપ્પમુત્તો, સમ્મા સો લોકે પરિબ્બજેય્ય.

૩૬૬. ‘‘ન સો ઉપધીસુ સારમેતિ, આદાનેસુ વિનેય્ય છન્દરાગં;

સો અનિસ્સિતો અનઞ્ઞનેય્યો, સમ્મા સો લોકે પરિબ્બજેય્ય.

૩૬૭. ‘‘વચસા મનસા ચ કમ્મુના ચ, અવિરુદ્ધો સમ્મા વિદિત્વા ધમ્મં;

નિબ્બાનપદાભિપત્થયાનો, સમ્મા સો લોકે પરિબ્બજેય્ય.

૩૬૮. ‘‘યો વન્દતિ મન્તિ નુણ્ણમેય્ય [નુન્નમેય્ય (?)], અક્કુટ્ઠોપિ ન સન્ધિયેથ ભિક્ખુ;

લદ્ધા પરભોજનં ન મજ્જે, સમ્મા સો લોકે પરિબ્બજેય્ય.

૩૬૯. ‘‘લોભઞ્ચ ભવઞ્ચ વિપ્પહાય, વિરતો છેદનબન્ધના ચ [છેદનબન્ધનતો (સી. સ્યા.)] ભિક્ખુ;

સો તિણ્ણકથંકથો વિસલ્લો, સમ્મા સો લોકે પરિબ્બજેય્ય.

૩૭૦. ‘‘સારુપ્પં અત્તનો વિદિત્વા, નો ચ ભિક્ખુ હિંસેય્ય કઞ્ચિ લોકે;

યથા તથિયં વિદિત્વા ધમ્મં, સમ્મા સો લોકે પરિબ્બજેય્ય.

૩૭૧. ‘‘યસ્સાનુસયા ન સન્તિ કેચિ, મૂલા ચ [મૂલા (સી. સ્યા.)] અકુસલા સમૂહતાસે;

સો નિરાસો [નિરાસયો (સી.), નિરાસસો (સ્યા.)] અનાસિસાનો [અનાસયાનો (સી. પી.), અનાસસાનો (સ્યા.)], સમ્મા સો લોકે પરિબ્બજેય્ય.

૩૭૨. ‘‘આસવખીણો પહીનમાનો, સબ્બં રાગપથં ઉપાતિવત્તો;

દન્તો પરિનિબ્બુતો ઠિતત્તો, સમ્મા સો લોકે પરિબ્બજેય્ય.

૩૭૩. ‘‘સદ્ધો સુતવા નિયામદસ્સી, વગ્ગગતેસુ ન વગ્ગસારિ ધીરો;

લોભં દોસં વિનેય્ય પટિઘં, સમ્મા સો લોકે પરિબ્બજેય્ય.

૩૭૪. ‘‘સંસુદ્ધજિનો વિવટ્ટચ્છદો, ધમ્મેસુ વસી પારગૂ અનેજો;

સઙ્ખારનિરોધઞાણકુસલો, સમ્મા સો લોકે પરિબ્બજેય્ય.

૩૭૫. ‘‘અતીતેસુ અનાગતેસુ ચાપિ, કપ્પાતીતો અતિચ્ચસુદ્ધિપઞ્ઞો;

સબ્બાયતનેહિ વિપ્પમુત્તો, સમ્મા સો લોકે પરિબ્બજેય્ય.

૩૭૬. ‘‘અઞ્ઞાય પદં સમેચ્ચ ધમ્મં, વિવટં દિસ્વાન પહાનમાસવાનં;

સબ્બુપધીનં પરિક્ખયાનો [પરિક્ખયા (પી.)], સમ્મા સો લોકે પરિબ્બજેય્ય’’.

૩૭૭. ‘‘અદ્ધા હિ ભગવા તથેવ એતં, યો સો એવંવિહારી દન્તો ભિક્ખુ;

સબ્બસંયોજનયોગવીતિવત્તો [સબ્બસંયોજનિયે ચ વીતિવત્તો (સી. સ્યા. પી.)], સમ્મા સો લોકે પરિબ્બજેય્યા’’તિ.

સમ્માપરિબ્બાજનીયસુત્તં તેરસમં નિટ્ઠિતં.