૧૧. રાહુલસુત્તં

૩૩૭. ‘‘કચ્ચિ અભિણ્હસંવાસા, નાવજાનાસિ પણ્ડિતં;

ઉક્કાધારો [ઓક્કાધારો (સ્યા. ક.)] મનુસ્સાનં, કચ્ચિ અપચિતો તયા’’ [તવ (સી. અટ્ઠ.)].

૩૩૮. ‘‘નાહં અભિણ્હસંવાસા, અવજાનામિ પણ્ડિતં;

ઉક્કાધારો મનુસ્સાનં, નિચ્ચં અપચિતો મયા’’.

૩૩૯. ‘‘પઞ્ચ કામગુણે હિત્વા, પિયરૂપે મનોરમે;

સદ્ધાય ઘરા નિક્ખમ્મ, દુક્ખસ્સન્તકરો ભવ.

૩૪૦. ‘‘મિત્તે ભજસ્સુ કલ્યાણે, પન્તઞ્ચ સયનાસનં;

વિવિત્તં અપ્પનિગ્ઘોસં, મત્તઞ્ઞૂ હોહિ ભોજને.

૩૪૧. ‘‘ચીવરે પિણ્ડપાતે ચ, પચ્ચયે સયનાસને;

એતેસુ તણ્હં માકાસિ, મા લોકં પુનરાગમિ.

૩૪૨. ‘‘સંવુતો પાતિમોક્ખસ્મિં, ઇન્દ્રિયેસુ ચ પઞ્ચસુ;

સતિ કાયગતાત્યત્થુ, નિબ્બિદાબહુલો ભવ.

૩૪૩. ‘‘નિમિત્તં પરિવજ્જેહિ, સુભં રાગૂપસઞ્હિતં;

અસુભાય ચિત્તં ભાવેહિ, એકગ્ગં સુસમાહિતં.

૩૪૪. ‘‘અનિમિત્તઞ્ચ ભાવેહિ, માનાનુસયમુજ્જહ;

તતો માનાભિસમયા, ઉપસન્તો ચરિસ્સતી’’તિ.

ઇત્થં સુદં ભગવા આયસ્મન્તં રાહુલં ઇમાહિ ગાથાહિ અભિણ્હં ઓવદતીતિ.

રાહુલસુત્તં એકાદસમં નિટ્ઠિતં.