૧. રતનસુત્તં

૨૨૪. યાનીધ ભૂતાનિ સમાગતાનિ, ભુમ્માનિ [ભૂમાનિ (ક.)] વા યાનિ વ અન્તલિક્ખે;

સબ્બેવ ભૂતા સુમના ભવન્તુ, અથોપિ સક્કચ્ચ સુણન્તુ ભાસિતં.

૨૨૫. તસ્મા હિ ભૂતા નિસામેથ સબ્બે, મેત્તં કરોથ માનુસિયા પજાય;

દિવા ચ રત્તો ચ હરન્તિ યે બલિં, તસ્મા હિ ને રક્ખથ અપ્પમત્તા.

૨૨૬. યં કિઞ્ચિ વિત્તં ઇધ વા હુરં વા, સગ્ગેસુ વા યં રતનં પણીતં;

ન નો સમં અત્થિ તથાગતેન, ઇદમ્પિ બુદ્ધે રતનં પણીતં;

એતેન સચ્ચેન સુવત્થિ હોતુ.

૨૨૭. ખયં વિરાગં અમતં પણીતં, યદજ્ઝગા સક્યમુની સમાહિતો;

ન તેન ધમ્મેન સમત્થિ કિઞ્ચિ, ઇદમ્પિ ધમ્મે રતનં પણીતં;

એતેન સચ્ચેન સુવત્થિ હોતુ.

૨૨૮. યં બુદ્ધસેટ્ઠો પરિવણ્ણયી સુચિં, સમાધિમાનન્તરિકઞ્ઞમાહુ;

સમાધિના તેન સમો ન વિજ્જતિ, ઇદમ્પિ ધમ્મે રતનં પણીતં;

એતેન સચ્ચેન સુવત્થિ હોતુ.

૨૨૯. યે પુગ્ગલા અટ્ઠ સતં પસત્થા, ચત્તારિ એતાનિ યુગાનિ હોન્તિ;

તે દક્ખિણેય્યા સુગતસ્સ સાવકા, એતેસુ દિન્નાનિ મહપ્ફલાનિ;

ઇદમ્પિ સઙ્ઘે રતનં પણીતં, એતેન સચ્ચેન સુવત્થિ હોતુ.

૨૩૦. યે સુપ્પયુત્તા મનસા દળ્હેન, નિક્કામિનો ગોતમસાસનમ્હિ;

તે પત્તિપત્તા અમતં વિગય્હ, લદ્ધા મુધા નિબ્બુતિં [નિબ્બુતિ (ક.)] ભુઞ્જમાના;

ઇદમ્પિ સઙ્ઘે રતનં પણીતં, એતેન સચ્ચેન સુવત્થિ હોતુ.

૨૩૧. યથિન્દખીલો પથવિસ્સિતો [પદવિસ્સિતો (ક. સી.), પઠવિં સિતો (ક. સી. સ્યા. કં. પી.)] સિયા, ચતુબ્ભિ વાતેહિ અસમ્પકમ્પિયો;

તથૂપમં સપ્પુરિસં વદામિ, યો અરિયસચ્ચાનિ અવેચ્ચ પસ્સતિ;

ઇદમ્પિ સઙ્ઘે રતનં પણીતં, એતેન સચ્ચેન સુવત્થિ હોતુ.

૨૩૨. યે અરિયસચ્ચાનિ વિભાવયન્તિ, ગમ્ભીરપઞ્ઞેન સુદેસિતાનિ;

કિઞ્ચાપિ તે હોન્તિ ભુસં પમત્તા, ન તે ભવં અટ્ઠમમાદિયન્તિ;

ઇદમ્પિ સઙ્ઘે રતનં પણીતં, એતેન સચ્ચેન સુવત્થિ હોતુ.

૨૩૩. સહાવસ્સ દસ્સનસમ્પદાય [સહાવસદ્દસ્સનસમ્પદાય (ક.)], તયસ્સુ ધમ્મા જહિતા ભવન્તિ;

સક્કાયદિટ્ઠિ વિચિકિચ્છિતઞ્ચ, સીલબ્બતં વાપિ યદત્થિ કિઞ્ચિ.

૨૩૪. ચતૂહપાયેહિ ચ વિપ્પમુત્તો, છચ્ચાભિઠાનાનિ [છ ચાભિઠાનાનિ (સી. સ્યા.)] ભબ્બ કાતું [અભબ્બો કાતું (સી.)];

ઇદમ્પિ સઙ્ઘે રતનં પણીતં, એતેન સચ્ચેન સુવત્થિ હોતુ.

૨૩૫. કિઞ્ચાપિ સો કમ્મ [કમ્મં (સી. સ્યા. કં. પી.)] કરોતિ પાપકં, કાયેન વાચા ઉદ ચેતસા વા;

અભબ્બ [અભબ્બો (બહૂસુ)] સો તસ્સ પટિચ્છદાય [પટિચ્છાદાય (સી.)], અભબ્બતા દિટ્ઠપદસ્સ વુત્તા;

ઇદમ્પિ સઙ્ઘે રતનં પણીતં, એતેન સચ્ચેન સુવત્થિ હોતુ.

૨૩૬. વનપ્પગુમ્બે યથ [યથા (સી. સ્યા.)] ફુસ્સિતગ્ગે, ગિમ્હાનમાસે પઠમસ્મિં [પઠમસ્મિ (?)] ગિમ્હે;

તથૂપમં ધમ્મવરં અદેસયિ [અદેસયી (સી.)], નિબ્બાનગામિં પરમં હિતાય;

ઇદમ્પિ બુદ્ધે રતનં પણીતં, એતેન સચ્ચેન સુવત્થિ હોતુ.

૨૩૭. વરો વરઞ્ઞૂ વરદો વરાહરો, અનુત્તરો ધમ્મવરં અદેસયિ;

ઇદમ્પિ બુદ્ધે રતનં પણીતં, એતેન સચ્ચેન સુવત્થિ હોતુ.

૨૩૮. ખીણં પુરાણં નવ નત્થિ સમ્ભવં, વિરત્તચિત્તાયતિકે ભવસ્મિં;

તે ખીણબીજા અવિરૂળ્હિછન્દા, નિબ્બન્તિ ધીરા યથાયં [યથયં (ક.)] પદીપો;

ઇદમ્પિ સઙ્ઘે રતનં પણીતં, એતેન સચ્ચેન સુવત્થિ હોતુ.

૨૩૯. યાનીધ ભૂતાનિ સમાગતાનિ, ભુમ્માનિ વા યાનિ વ અન્તલિક્ખે;

તથાગતં દેવમનુસ્સપૂજિતં, બુદ્ધં નમસ્સામ સુવત્થિ હોતુ.

૨૪૦. યાનીધ ભૂતાનિ સમાગતાનિ, ભુમ્માનિ વા યાનિ વ અન્તલિક્ખે;

તથાગતં દેવમનુસ્સપૂજિતં, ધમ્મં નમસ્સામ સુવત્થિ હોતુ.

૨૪૧. યાનીધ ભૂતાનિ સમાગતાનિ, ભુમ્માનિ વા યાનિ વ અન્તલિક્ખે;

તથાગતં દેવમનુસ્સપૂજિતં, સઙ્ઘં નમસ્સામ સુવત્થિ હોતૂતિ.

રતનસુત્તં પઠમં નિટ્ઠિતં.