૨. આમગન્ધસુત્તં

૨૪૨. ‘‘સામાકચિઙ્ગૂલકચીનકાનિ ચ, પત્તપ્ફલં મૂલફલં ગવિપ્ફલં;

ધમ્મેન લદ્ધં સતમસ્નમાના [સતમસમાના (સી. પી.), સતમસ્સમાના (સ્યા. કં.)], ન કામકામા અલિકં ભણન્તિ.

૨૪૩. ‘‘યદસ્નમાનો સુકતં સુનિટ્ઠિતં, પરેહિ દિન્નં પયતં પણીતં;

સાલીનમન્નં પરિભુઞ્જમાનો, સો ભુઞ્જસી કસ્સપ આમગન્ધં.

૨૪૪. ‘‘ન આમગન્ધો મમ કપ્પતીતિ, ઇચ્ચેવ ત્વં ભાસસિ બ્રહ્મબન્ધુ;

સાલીનમન્નં પરિભુઞ્જમાનો, સકુન્તમંસેહિ સુસઙ્ખતેહિ;

પુચ્છામિ તં કસ્સપ એતમત્થં, કથં પકારો તવ આમગન્ધો’’.

૨૪૫. ‘‘પાણાતિપાતો વધછેદબન્ધનં, થેય્યં મુસાવાદો નિકતિવઞ્ચનાનિ ચ;

અજ્ઝેનકુત્તં [અજ્ઝેન કુજ્જં (સી. પી.)] પરદારસેવના, એસામગન્ધો ન હિ મંસભોજનં.

૨૪૬. ‘‘યે ઇધ કામેસુ અસઞ્ઞતા જના, રસેસુ ગિદ્ધા અસુચિભાવમસ્સિતા [અસુચીકમિસ્સિતા (સી. સ્યા. કં. પી.)];

નત્થિકદિટ્ઠી વિસમા દુરન્નયા, એસામગન્ધો ન હિ મંસભોજનં.

૨૪૭. ‘‘યે લૂખસા દારુણા પિટ્ઠિમંસિકા [યે લૂખરસા દારુણા પરપિટ્ઠિમંસિકા (ક.)], મિત્તદ્દુનો નિક્કરુણાતિમાનિનો;

અદાનસીલા ન ચ દેન્તિ કસ્સચિ, એસામગન્ધો ન હિ મંસભોજનં.

૨૪૮. ‘‘કોધો મદો થમ્ભો પચ્ચુપટ્ઠાપના [પચ્ચુટ્ઠાપના ચ (સી. સ્યા.), પચ્ચુટ્ઠાપના (પી.)], માયા ઉસૂયા ભસ્સસમુસ્સયો ચ;

માનાતિમાનો ચ અસબ્ભિ સન્થવો, એસામગન્ધો ન હિ મંસભોજનં.

૨૪૯. ‘‘યે પાપસીલા ઇણઘાતસૂચકા, વોહારકૂટા ઇધ પાટિરૂપિકા [પાતિરૂપિકા (?)];

નરાધમા યેધ કરોન્તિ કિબ્બિસં, એસામગન્ધો ન હિ મંસભોજનં.

૨૫૦. ‘‘યે ઇધ પાણેસુ અસઞ્ઞતા જના, પરેસમાદાય વિહેસમુય્યુતા;

દુસ્સીલલુદ્દા ફરુસા અનાદરા, એસામગન્ધો ન હિ મંસભોજનં.

૨૫૧. ‘‘એતેસુ ગિદ્ધા વિરુદ્ધાતિપાતિનો, નિચ્ચુય્યુતા પેચ્ચ તમં વજન્તિ યે;

પતન્તિ સત્તા નિરયં અવંસિરા, એસામગન્ધો ન હિ મંસભોજનં.

૨૫૨. ‘‘ન મચ્છમંસાનમનાસકત્તં [ન મચ્છમંસં ન અનાસકત્તં (સી. અટ્ઠ મૂલપાઠો), ન મંચ્છમંસાનાનાસકત્તં (સ્યા. ક.)], ન નગ્ગિયં ન મુણ્ડિયં જટાજલ્લં;

ખરાજિનાનિ નાગ્ગિહુત્તસ્સુપસેવના, યે વાપિ લોકે અમરા બહૂ તપા;

મન્તાહુતી યઞ્ઞમુતૂપસેવના, સોધેન્તિ મચ્ચં અવિતિણ્ણકઙ્ખં.

૨૫૩. ‘‘યો તેસુ [સોતેસુ (સી. પી.)] ગુત્તો વિદિતિન્દ્રિયો ચરે, ધમ્મે ઠિતો અજ્જવમદ્દવે રતો;

સઙ્ગાતિગો સબ્બદુક્ખપ્પહીનો, ન લિપ્પતિ [ન લિમ્પતિ (સ્યા. કં ક.)] દિટ્ઠસુતેસુ ધીરો’’.

૨૫૪. ઇચ્ચેતમત્થં ભગવા પુનપ્પુનં, અક્ખાસિ નં [તં (સી. પી.)] વેદયિ મન્તપારગૂ;

ચિત્રાહિ ગાથાહિ મુની પકાસયિ, નિરામગન્ધો અસિતો દુરન્નયો.

૨૫૫. સુત્વાન બુદ્ધસ્સ સુભાસિતં પદં, નિરામગન્ધં સબ્બદુક્ખપ્પનૂદનં;

નીચમનો વન્દિ તથાગતસ્સ, તત્થેવ પબ્બજ્જમરોચયિત્થાતિ.

આમગન્ધસુત્તં દુતિયં નિટ્ઠિતં.