૬. પરાભવસુત્તં

એવં મે સુતં – એકં સમયં ભગવા સાવત્થિયં વિહરતિ જેતવને અનાથપિણ્ડિકસ્સ આરામે. અથ ખો અઞ્ઞતરા દેવતા અભિક્કન્તાય રત્તિયા અભિક્કન્તવણ્ણા કેવલકપ્પં જેતવનં ઓભાસેત્વા યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં અટ્ઠાસિ. એકમન્તં ઠિતા ખો સા દેવતા ભગવન્તં ગાથાય અજ્ઝભાસિ –

૯૧. ‘‘પરાભવન્તં પુરિસં, મયં પુચ્છામ ગોતમ [ગોતમં (સી. સ્યા.)];

ભગવન્તં [ભવન્તં (સ્યા. ક.)] પુટ્ઠુમાગમ્મ, કિં પરાભવતો મુખં’’.

૯૨. ‘‘સુવિજાનો ભવં હોતિ, સુવિજાનો [દુવિજાનો (સ્યા. ક.)] પરાભવો;

ધમ્મકામો ભવં હોતિ, ધમ્મદેસ્સી પરાભવો’’.

૯૩. ‘‘ઇતિ હેતં વિજાનામ, પઠમો સો પરાભવો;

દુતિયં ભગવા બ્રૂહિ, કિં પરાભવતો મુખં’’.

૯૪. ‘‘અસન્તસ્સ પિયા હોન્તિ, સન્તે ન કુરુતે પિયં;

અસતં ધમ્મં રોચેતિ, તં પરાભવતો મુખં’’.

૯૫. ‘‘ઇતિ હેતં વિજાનામ, દુતિયો સો પરાભવો;

તતિયં ભગવા બ્રૂહિ, કિં પરાભવતો મુખં’’.

૯૬. ‘‘નિદ્દાસીલી સભાસીલી, અનુટ્ઠાતા ચ યો નરો;

અલસો કોધપઞ્ઞાણો, તં પરાભવતો મુખં’’.

૯૭. ‘‘ઇતિ હેતં વિજાનામ, તતિયો સો પરાભવો;

ચતુત્થં ભગવા બ્રૂહિ, કિં પરાભવતો મુખં’’.

૯૮. ‘‘યો માતરં [યો માતરં વા (સી. સ્યા. કં. પી.)] પિતરં વા, જિણ્ણકં ગતયોબ્બનં;

પહુ સન્તો ન ભરતિ, તં પરાભવતો મુખં’’.

૯૯. ‘‘ઇતિ હેતં વિજાનામ, ચતુત્થો સો પરાભવો;

પઞ્ચમં ભગવા બ્રૂહિ, કિં પરાભવતો મુખં’’.

૧૦૦. ‘‘યો બ્રાહ્મણં [યો બ્રાહ્મણં વા (સી. સ્યા. કં. પી.)] સમણં વા, અઞ્ઞં વાપિ વનિબ્બકં;

મુસાવાદેન વઞ્ચેતિ, તં પરાભવતો મુખં’’.

૧૦૧. ‘‘ઇતિ હેતં વિજાનામ, પઞ્ચમો સો પરાભવો;

છટ્ઠમં ભગવા બ્રૂહિ, કિં પરાભવતો મુખં’’.

૧૦૨. ‘‘પહૂતવિત્તો પુરિસો, સહિરઞ્ઞો સભોજનો;

એકો ભુઞ્જતિ સાદૂનિ, તં પરાભવતો મુખં’’.

૧૦૩. ‘‘ઇતિ હેતં વિજાનામ, છટ્ઠમો સો પરાભવો;

સત્તમં ભગવા બ્રૂહિ, કિં પરાભવતો મુખં’’.

૧૦૪. ‘‘જાતિત્થદ્ધો ધનત્થદ્ધો, ગોત્તત્થદ્ધો ચ યો નરો;

સઞ્ઞાતિં અતિમઞ્ઞેતિ, તં પરાભવતો મુખં’’.

૧૦૫. ‘‘ઇતિ હેતં વિજાનામ, સત્તમો સો પરાભવો;

અટ્ઠમં ભગવા બ્રૂહિ, કિં પરાભવતો મુખં’’.

૧૦૬. ‘‘ઇત્થિધુત્તો સુરાધુત્તો, અક્ખધુત્તો ચ યો નરો;

લદ્ધં લદ્ધં વિનાસેતિ, તં પરાભવતો મુખં’’.

૧૦૭. ‘‘ઇતિ હેતં વિજાનામ, અટ્ઠમો સો પરાભવો;

નવમં ભગવા બ્રૂહિ, કિં પરાભવતો મુખં’’.

૧૦૮. ‘‘સેહિ દારેહિ અસન્તુટ્ઠો [દારેહ્યસન્તુટ્ઠો (ક.)], વેસિયાસુ પદુસ્સતિ [પદિસ્સતિ (સી.)];

દુસ્સતિ [દિસ્સતિ (સી. પી.)] પરદારેસુ, તં પરાભવતો મુખં’’.

૧૦૯. ‘‘ઇતિ હેતં વિજાનામ, નવમો સો પરાભવો;

દસમં ભગવા બ્રૂહિ, કિં પરાભવતો મુખં’’.

૧૧૦. ‘‘અતીતયોબ્બનો પોસો, આનેતિ તિમ્બરુત્થનિં;

તસ્સા ઇસ્સા ન સુપતિ, તં પરાભવતો મુખં’’.

૧૧૧. ‘‘ઇતિ હેતં વિજાનામ, દસમો સો પરાભવો;

એકાદસમં ભગવા બ્રૂહિ, કિં પરાભવતો મુખં’’.

૧૧૨. ‘‘ઇત્થિં સોણ્ડિં વિકિરણિં, પુરિસં વાપિ તાદિસં;

ઇસ્સરિયસ્મિં ઠપેતિ [ઠાપેતિ (સી. પી.), થપેતિ (ક.)], તં પરાભવતો મુખં’’.

૧૧૩. ‘‘ઇતિ હેતં વિજાનામ, એકાદસમો સો પરાભવો;

દ્વાદસમં ભગવા બ્રૂહિ, કિં પરાભવતો મુખં’’.

૧૧૪. ‘‘અપ્પભોગો મહાતણ્હો, ખત્તિયે જાયતે કુલે;

સો ચ રજ્જં પત્થયતિ, તં પરાભવતો મુખં’’.

૧૧૫. ‘‘એતે પરાભવે લોકે, પણ્ડિતો સમવેક્ખિય;

અરિયો દસ્સનસમ્પન્નો, સ લોકં ભજતે સિવ’’ન્તિ.

પરાભવસુત્તં છટ્ઠં નિટ્ઠિતં.