૧. ઉરગવગ્ગો

૧. ઉરગસુત્તં

૧. યો [યો વે (સ્યા.)] ઉપ્પતિતં વિનેતિ કોધં, વિસટં સપ્પવિસંવ ઓસધેહિ [ઓસધેભિ (ક.)];

સો ભિક્ખુ જહાતિ ઓરપારં, ઉરગો જિણ્ણમિવત્તચં [જિણ્ણમિવ તચં (સી. સ્યા. કં. પી.), જિણ્ણમિવા તચં (?)] પુરાણં.

૨. યો રાગમુદચ્છિદા અસેસં, ભિસપુપ્ફંવ સરોરુહં [સરેરુહં (ક.)] વિગય્હ;

સો ભિક્ખુ જહાતિ ઓરપારં, ઉરગો જિણ્ણમિવત્તચં, પુરાણં.

૩. યો તણ્હમુદચ્છિદા અસેસં, સરિતં સીઘસરં વિસોસયિત્વા;

સો ભિક્ખુ જહાતિ ઓરપારં, ઉરગો જિણ્ણમિવત્તચં પુરાણં.

૪. યો માનમુદબ્બધી અસેસં, નળસેતુંવ સુદુબ્બલં મહોઘો;

સો ભિક્ખુ જહાતિ ઓરપારં, ઉરગો જિણ્ણમિવત્તચં પુરાણં.

૫. યો નાજ્ઝગમા ભવેસુ સારં, વિચિનં પુપ્ફમિવ [પુપ્ફમિવ (બહૂસુ)] ઉદુમ્બરેસુ;

સો ભિક્ખુ જહાતિ ઓરપારં, ઉરગો જિણ્ણમિવત્તચં પુરાણં.

૬. યસ્સન્તરતો ન સન્તિ કોપા, ઇતિભવાભવતઞ્ચ [ઇતિબ્ભવાભવતઞ્ચ (ક.)] વીતિવત્તો;

સો ભિક્ખુ જહાતિ ઓરપારં, ઉરગો જિણ્ણમિવત્તચં પુરાણં.

૭. યસ્સ વિતક્કા વિધૂપિતા, અજ્ઝત્તં સુવિકપ્પિતા અસેસા;

સો ભિક્ખુ જહાતિ ઓરપારં, ઉરગો જિણ્ણમિવત્તચં પુરાણં.

૮. યો નાચ્ચસારી ન પચ્ચસારી, સબ્બં અચ્ચગમા ઇમં પપઞ્ચં;

સો ભિક્ખુ જહાતિ ઓરપારં, ઉરગો જિણ્ણમિવત્તચં પુરાણં.

૯. યો નાચ્ચસારી ન પચ્ચસારી, સબ્બં વિતથમિદન્તિ ઞત્વા [ઉત્વા (સ્યા. પી. ક.)] લોકે;

સો ભિક્ખુ જહાતિ ઓરપારં, ઉરગો જિણ્ણમિવત્તચં પુરાણં.

૧૦. યો નાચ્ચસારી ન પચ્ચસારી, સબ્બં વિતથમિદન્તિ વીતલોભો;

સો ભિક્ખુ જહાતિ ઓરપારં, ઉરગો જિણ્ણમિવત્તચં પુરાણં.

૧૧. યો નાચ્ચસારી ન પચ્ચસારી, સબ્બં વિતથમિદન્તિ વીતરાગો;

સો ભિક્ખુ જહાતિ ઓરપારં, ઉરગો જિણ્ણમિવત્તચં પુરાણં.

૧૨. યો નાચ્ચસારી ન પચ્ચસારી, સબ્બં વિતથમિદન્તિ વીતદોસો;

સો ભિક્ખુ જહાતિ ઓરપારં, ઉરગો જિણ્ણમિવત્તચં પુરાણં.

૧૩. યો નાચ્ચસારી ન પચ્ચસારી, સબ્બં વિતથમિદન્તિ વીતમોહો;

સો ભિક્ખુ જહાતિ ઓરપારં, ઉરગો જિણ્ણમિવત્તચં પુરાણં.

૧૪. યસ્સાનુસયા ન સન્તિ કેચિ, મૂલા ચ અકુસલા સમૂહતાસે;

સો ભિક્ખુ જહાતિ ઓરપારં, ઉરગો જિણ્ણમિવત્તચં પુરાણં.

૧૫. યસ્સ દરથજા ન સન્તિ કેચિ, ઓરં આગમનાય પચ્ચયાસે;

સો ભિક્ખુ જહાતિ ઓરપારં, ઉરગો જિણ્ણમિવત્તચં પુરાણં.

૧૬. યસ્સ વનથજા ન સન્તિ કેચિ, વિનિબન્ધાય ભવાય હેતુકપ્પા;

સો ભિક્ખુ જહાતિ ઓરપારં, ઉરગો જિણ્ણમિવત્તચં પુરાણં.

૧૭. યો નીવરણે પહાય પઞ્ચ, અનિઘો તિણ્ણકથંકથો વિસલ્લો;

સો ભિક્ખુ જહાતિ ઓરપારં, ઉરગો જિણ્ણમિવત્તચં પુરાણં.

ઉરગસુત્તં પઠમં નિટ્ઠિતં.

૨. ધનિયસુત્તં

૧૮. ‘‘પક્કોદનો દુદ્ધખીરોહમસ્મિ, (ઇતિ ધનિયો ગોપો)

અનુતીરે મહિયા સમાનવાસો;

છન્ના કુટિ આહિતો ગિનિ, અથ ચે પત્થયસી પવસ્સ દેવ’’.

૧૯. ‘‘અક્કોધનો વિગતખિલોહમસ્મિ [વિગતખીલોહમસ્મિ (સી. પી.)], (ઇતિ ભગવા)

અનુતીરે મહિયેકરત્તિવાસો;

વિવટા કુટિ નિબ્બુતો ગિનિ, અથ ચે પત્થયસી પવસ્સ દેવ’’.

૨૦. ‘‘અન્ધકમકસા ન વિજ્જરે, (ઇતિ ધનિયો ગોપો)

કચ્છે રૂળ્હતિણે ચરન્તિ ગાવો;

વુટ્ઠિમ્પિ સહેય્યુમાગતં, અથ ચે પત્થયસી પવસ્સ દેવ’’.

૨૧. ‘‘બદ્ધાસિ ભિસી સુસઙ્ખતા, (ઇતિ ભગવા)

તિણ્ણો પારગતો વિનેય્ય ઓઘં;

અત્થો ભિસિયા ન વિજ્જતિ, અથ ચે પત્થયસી પવસ્સ દેવ’’.

૨૨. ‘‘ગોપી મમ અસ્સવા અલોલા, (ઇતિ ધનિયો ગોપો)

દીઘરત્તં [દીઘરત્ત (ક.)] સંવાસિયા મનાપા;

તસ્સા ન સુણામિ કિઞ્ચિ પાપં, અથ ચે પત્થયસી પવસ્સ દેવ’’.

૨૩. ‘‘ચિત્તં મમ અસ્સવં વિમુત્તં, (ઇતિ ભગવા)

દીઘરત્તં પરિભાવિતં સુદન્તં;

પાપં પન મે ન વિજ્જતિ, અથ ચે પત્થયસી પવસ્સ દેવ’’.

૨૪. ‘‘અત્તવેતનભતોહમસ્મિ, (ઇતિ ધનિયો ગોપો)

પુત્તા ચ મે સમાનિયા અરોગા;

તેસં ન સુણામિ કિઞ્ચિ પાપં, અથ ચે પત્થયસી પવસ્સ દેવ’’.

૨૫. ‘‘નાહં ભતકોસ્મિ કસ્સચિ, (ઇતિ ભગવા)

નિબ્બિટ્ઠેન ચરામિ સબ્બલોકે;

અત્થો ભતિયા ન વિજ્જતિ, અથ ચે પત્થયસી પવસ્સ દેવ’’.

૨૬. ‘‘અત્થિ વસા અત્થિ ધેનુપા, (ઇતિ ધનિયો ગોપો)

ગોધરણિયો પવેણિયોપિ અત્થિ;

ઉસભોપિ ગવમ્પતીધ અત્થિ, અથ ચે પત્થયસી પવસ્સ દેવ’’.

૨૭. ‘‘નત્થિ વસા નત્થિ ધેનુપા, (ઇતિ ભગવા)

ગોધરણિયો પવેણિયોપિ નત્થિ;

ઉસભોપિ ગવમ્પતીધ નત્થિ, અથ ચે પત્થયસી પવસ્સ દેવ’’.

૨૮. ‘‘ખિલા નિખાતા અસમ્પવેધી, (ઇતિ ધનિયો ગોપો)

દામા મુઞ્જમયા નવા સુસણ્ઠાના;

ન હિ સક્ખિન્તિ ધેનુપાપિ છેત્તું [છેતું (ક.)], અથ ચે પત્થયસી પવસ્સ દેવ’’.

૨૯. ‘‘ઉસભોરિવ છેત્વ [છેત્વા (સ્યા. ક.)] બન્ધનાનિ, (ઇતિ ભગવા)

નાગો પૂતિલતંવ દાલયિત્વા [પૂતિલતં પદાલયિત્વા (સ્યા. ક.)];

નાહં પુનુપેસ્સં [પુન ઉપેસ્સં (સી. સ્યા. કં. પી.), પુનુપેય્ય (ક.)] ગબ્ભસેય્યં, અથ ચે પત્થયસી પવસ્સ દેવ’’.

૩૦. ‘‘નિન્નઞ્ચ થલઞ્ચ પૂરયન્તો, મહામેઘો પવસ્સિ તાવદેવ;

સુત્વા દેવસ્સ વસ્સતો, ઇમમત્થં ધનિયો અભાસથ.

૩૧. ‘‘લાભા વત નો અનપ્પકા, યે મયં ભગવન્તં અદ્દસામ;

સરણં તં ઉપેમ ચક્ખુમ, સત્થા નો હોહિ તુવં મહામુનિ.

૩૨. ‘‘ગોપી ચ અહઞ્ચ અસ્સવા, બ્રહ્મચરિયં [બ્રહ્મચરિય (ક.)] સુગતે ચરામસે;

જાતિમરણસ્સ પારગૂ [પારગા (સી. સ્યા. કં. પી.)], દુક્ખસ્સન્તકરા ભવામસે’’.

૩૩. ‘‘નન્દતિ પુત્તેહિ પુત્તિમા, (ઇતિ મારો પાપિમા)

ગોમા [ગોમિકો (સી. પી.), ગોપિકો (સ્યા. કં.), ગોપિયો (ક.)] ગોહિ તથેવ નન્દતિ;

ઉપધી હિ નરસ્સ નન્દના, ન હિ સો નન્દતિ યો નિરૂપધિ’’.

૩૪. ‘‘સોચતિ પુત્તેહિ પુત્તિમા, (ઇતિ ભગવા)

ગોપિયો ગોહિ તથેવ સોચતિ;

ઉપધી હિ નરસ્સ સોચના, ન હિ સો સોચતિ યો નિરૂપધી’’તિ.

ધનિયસુત્તં દુતિયં નિટ્ઠિતં.

૩. ખગ્ગવિસાણસુત્તં

૩૫. સબ્બેસુ ભૂતેસુ નિધાય દણ્ડં, અવિહેઠયં અઞ્ઞતરમ્પિ તેસં;

ન પુત્તમિચ્છેય્ય કુતો સહાયં, એકો ચરે ખગ્ગવિસાણકપ્પો.

૩૬. સંસગ્ગજાતસ્સ ભવન્તિ સ્નેહા, સ્નેહન્વયં દુક્ખમિદં પહોતિ;

આદીનવં સ્નેહજં પેક્ખમાનો, એકો ચરે ખગ્ગવિસાણકપ્પો.

૩૭. મિત્તે સુહજ્જે અનુકમ્પમાનો, હાપેતિ અત્થં પટિબદ્ધચિત્તો;

એતં ભયં સન્થવે [સન્ધવે (ક.)] પેક્ખમાનો, એકો ચરે ખગ્ગવિસાણકપ્પો.

૩૮. વંસો વિસાલોવ યથા વિસત્તો, પુત્તેસુ દારેસુ ચ યા અપેક્ખા;

વંસક્કળીરોવ [વંસકળીરોવ (સી.), વંસાકળીરોવ (સ્યા. કં. પી.), વંસેકળીરોવ (નિદ્દેસ)] અસજ્જમાનો, એકો ચરે ખગ્ગવિસાણકપ્પો.

૩૯. મિગો અરઞ્ઞમ્હિ યથા અબદ્ધો [અબન્ધો (સ્યા. કં.)], યેનિચ્છકં ગચ્છતિ ગોચરાય;

વિઞ્ઞૂ નરો સેરિતં પેક્ખમાનો, એકો ચરે ખગ્ગવિસાણકપ્પો.

૪૦. આમન્તના હોતિ સહાયમજ્ઝે, વાસે ઠાને ગમને ચારિકાય;

અનભિજ્ઝિતં સેરિતં પેક્ખમાનો, એકો ચરે ખગ્ગવિસાણકપ્પો.

૪૧. ખિડ્ડા રતી હોતિ સહાયમજ્ઝે, પુત્તેસુ ચ વિપુલં હોતિ પેમં;

પિયવિપ્પયોગં વિજિગુચ્છમાનો, એકો ચરે ખગ્ગવિસાણકપ્પો.

૪૨. ચાતુદ્દિસો અપ્પટિઘો ચ હોતિ, સન્તુસ્સમાનો ઇતરીતરેન;

પરિસ્સયાનં સહિતા અછમ્ભી, એકો ચરે ખગ્ગવિસાણકપ્પો.

૪૩. દુસ્સઙ્ગહા પબ્બજિતાપિ એકે, અથો ગહટ્ઠા ઘરમાવસન્તા;

અપ્પોસ્સુક્કો પરપુત્તેસુ હુત્વા, એકો ચરે ખગ્ગવિસાણકપ્પો.

૪૪. ઓરોપયિત્વા ગિહિબ્યઞ્જનાનિ [ગિહિવ્યઞ્જનાનિ (સ્યા. કં. પી.)], સઞ્છિન્નપત્તો [સંસીનપત્તો (સી.)] યથા કોવિળારો;

છેત્વાન વીરો ગિહિબન્ધનાનિ, એકો ચરે ખગ્ગવિસાણકપ્પો.

૪૫. સચે લભેથ નિપકં સહાયં, સદ્ધિં ચરં સાધુવિહારિધીરં;

અભિભુય્ય સબ્બાનિ પરિસ્સયાનિ, ચરેય્ય તેનત્તમનો સતીમા.

૪૬. નો ચે લભેથ નિપકં સહાયં, સદ્ધિં ચરં સાધુવિહારિધીરં;

રાજાવ રટ્ઠં વિજિતં પહાય, એકો ચરે માતઙ્ગરઞ્ઞેવ નાગો.

૪૭. અદ્ધા પસંસામ સહાયસમ્પદં, સેટ્ઠા સમા સેવિતબ્બા સહાયા;

એતે અલદ્ધા અનવજ્જભોજી, એકો ચરે ખગ્ગવિસાણકપ્પો.

૪૮. દિસ્વા સુવણ્ણસ્સ પભસ્સરાનિ, કમ્મારપુત્તેન સુનિટ્ઠિતાનિ;

સઙ્ઘટ્ટમાનાનિ દુવે ભુજસ્મિં, એકો ચરે ખગ્ગવિસાણકપ્પો.

૪૯. એવં દુતિયેન [દુતિયેન (સબ્બત્થ)] સહા મમસ્સ, વાચાભિલાપો અભિસજ્જના વા;

એતં ભયં આયતિં પેક્ખમાનો, એકો ચરે ખગ્ગવિસાણકપ્પો.

૫૦. કામા હિ ચિત્રા મધુરા મનોરમા, વિરૂપરૂપેન મથેન્તિ ચિત્તં;

આદીનવં કામગુણેસુ દિસ્વા, એકો ચરે ખગ્ગવિસાણકપ્પો.

૫૧. ઈતી ચ ગણ્ડો ચ ઉપદ્દવો ચ, રોગો ચ સલ્લઞ્ચ ભયઞ્ચ મેતં;

એતં ભયં કામગુણેસુ દિસ્વા, એકો ચરે ખગ્ગવિસાણકપ્પો.

૫૨. સીતઞ્ચ ઉણ્હઞ્ચ ખુદં પિપાસં, વાતાતપે ડંસસરીસપે [ડંસસિરિંસપે (સી. સ્યા. કં. પી.)] ચ;

સબ્બાનિપેતાનિ અભિસમ્ભવિત્વા, એકો ચરે ખગ્ગવિસાણકપ્પો.

૫૩. નાગોવ યૂથાનિ વિવજ્જયિત્વા, સઞ્જાતખન્ધો પદુમી ઉળારો;

યથાભિરન્તં વિહરં [વિહરે (સી. પી. નિદ્દેસ)] અરઞ્ઞે, એકો ચરે ખગ્ગવિસાણકપ્પો.

૫૪. અટ્ઠાનતં સઙ્ગણિકારતસ્સ, યં ફસ્સયે [ફુસ્સયે (સ્યા.)] સામયિકં વિમુત્તિં;

આદિચ્ચબન્ધુસ્સ વચો નિસમ્મ, એકો ચરે ખગ્ગવિસાણકપ્પો.

૫૫. દિટ્ઠીવિસૂકાનિ ઉપાતિવત્તો, પત્તો નિયામં પટિલદ્ધમગ્ગો;

ઉપ્પન્નઞાણોમ્હિ અનઞ્ઞનેય્યો, એકો ચરે ખગ્ગવિસાણકપ્પો.

૫૬. નિલ્લોલુપો નિક્કુહો નિપ્પિપાસો, નિમ્મક્ખો નિદ્ધન્તકસાવમોહો;

નિરાસયો [નિરાસાસો (ક.)] સબ્બલોકે ભવિત્વા, એકો ચરે ખગ્ગવિસાણકપ્પો.

૫૭. પાપં સહાયં પરિવજ્જયેથ, અનત્થદસ્સિં વિસમે નિવિટ્ઠં;

સયં ન સેવે પસુતં પમત્તં, એકો ચરે ખગ્ગવિસાણકપ્પો.

૫૮. બહુસ્સુતં ધમ્મધરં ભજેથ, મિત્તં ઉળારં પટિભાનવન્તં;

અઞ્ઞાય અત્થાનિ વિનેય્ય કઙ્ખં, એકો ચરે ખગ્ગવિસાણકપ્પો.

૫૯. ખિડ્ડં રતિં કામસુખઞ્ચ લોકે, અનલઙ્કરિત્વા અનપેક્ખમાનો;

વિભૂસનટ્ઠાના વિરતો સચ્ચવાદી, એકો ચરે ખગ્ગવિસાણકપ્પો.

૬૦. પુત્તઞ્ચ દારં પિતરઞ્ચ માતરં, ધનાનિ ધઞ્ઞાનિ ચ બન્ધવાનિ [બન્ધવાનિ ચ (પી.)];

હિત્વાન કામાનિ યથોધિકાનિ, એકો ચરે ખગ્ગવિસાણકપ્પો.

૬૧. સઙ્ગો એસો પરિત્તમેત્થ સોખ્યં, અપ્પસ્સાદો દુક્ખમેત્થ ભિય્યો;

ગળો એસો ઇતિ ઞત્વા મુતીમા [મતીમા (સ્યા. ક.)], એકો ચરે ખગ્ગવિસાણકપ્પો.

૬૨. સન્દાલયિત્વાન [પદાલયિત્વાન (ક.)] સંયોજનાનિ, જાલંવ ભેત્વા સલિલમ્બુચારી;

અગ્ગીવ દડ્ઢં અનિવત્તમાનો, એકો ચરે ખગ્ગવિસાણકપ્પો.

૬૩. ઓક્ખિત્તચક્ખૂ ન ચ પાદલોલો, ગુત્તિન્દ્રિયો રક્ખિતમાનસાનો;

અનવસ્સુતો અપરિડય્હમાનો, એકો ચરે ખગ્ગવિસાણકપ્પો.

૬૪. ઓહારયિત્વા ગિહિબ્યઞ્જનાનિ, સઞ્છન્નપત્તો [સઞ્છિન્નપત્તો (સ્યા. પી.), પચ્છિન્નપત્તો (ક.)] યથા પારિછત્તો;

કાસાયવત્થો અભિનિક્ખમિત્વા, એકો ચરે ખગ્ગવિસાણકપ્પો.

૬૫. રસેસુ ગેધં અકરં અલોલો, અનઞ્ઞપોસી સપદાનચારી;

કુલે કુલે અપ્પટિબદ્ધચિત્તો [અપ્પટિબન્ધચિત્તો (ક.)], એકો ચરે ખગ્ગવિસાણકપ્પો.