૫. ચુન્દસુત્તં

૮૩. ‘‘પુચ્છામિ મુનિં પહૂતપઞ્ઞં, (ઇતિ ચુન્દો કમ્મારપુત્તો)

બુદ્ધં ધમ્મસ્સામિં વીતતણ્હં;

દ્વિપદુત્તમં [દિપદુત્તમં (સી. સ્યા. કં. પી.)] સારથીનં પવરં, કતિ લોકે સમણા તદિઙ્ઘ બ્રૂહિ’’.

૮૪. ‘‘ચતુરો સમણા ન પઞ્ચમત્થિ, (ચુન્દાતિ ભગવા)

તે તે આવિકરોમિ સક્ખિપુટ્ઠો;

મગ્ગજિનો મગ્ગદેસકો ચ, મગ્ગે જીવતિ યો ચ મગ્ગદૂસી’’.

૮૫. ‘‘કં મગ્ગજિનં વદન્તિ બુદ્ધા, (ઇતિ ચુન્દો કમ્મારપુત્તો)

મગ્ગક્ખાયી કથં અતુલ્યો હોતિ;

મગ્ગે જીવતિ મે બ્રૂહિ પુટ્ઠો, અથ મે આવિકરોહિ મગ્ગદૂસિં’’ [મગ્ગદૂસી (ક.)].

૮૬. ‘‘યો તિણ્ણકથંકથો વિસલ્લો, નિબ્બાનાભિરતો અનાનુગિદ્ધો;

લોકસ્સ સદેવકસ્સ નેતા, તાદિં મગ્ગજિનં વદન્તિ બુદ્ધા.

૮૭. ‘‘પરમં પરમન્તિ યોધ ઞત્વા, અક્ખાતિ વિભજતે ઇધેવ ધમ્મં;

તં કઙ્ખછિદં મુનિં અનેજં, દુતિયં ભિક્ખુનમાહુ મગ્ગદેસિં.

૮૮. ‘‘યો ધમ્મપદે સુદેસિતે, મગ્ગે જીવતિ સઞ્ઞતો સતીમા;

અનવજ્જપદાનિ સેવમાનો, તતિયં ભિક્ખુનમાહુ મગ્ગજીવિં.

૮૯. ‘‘છદનં કત્વાન સુબ્બતાનં, પક્ખન્દી કુલદૂસકો પગબ્ભો;

માયાવી અસઞ્ઞતો પલાપો, પતિરૂપેન ચરં સ મગ્ગદૂસી.

૯૦. ‘‘એતે ચ પટિવિજ્ઝિ યો ગહટ્ઠો, સુતવા અરિયસાવકો સપઞ્ઞો;

સબ્બે નેતાદિસાતિ [સબ્બે ને તાદિસાતિ (સી. સ્યા. પી.)] ઞત્વા, ઇતિ દિસ્વા ન હાપેતિ તસ્સ સદ્ધા;

કથં હિ દુટ્ઠેન અસમ્પદુટ્ઠં, સુદ્ધં અસુદ્ધેન સમં કરેય્યા’’તિ.

ચુન્દસુત્તં પઞ્ચમં નિટ્ઠિતં.