૯. કૂટવિનિચ્છયિકપેતવત્થુ

૪૯૯. ‘‘માલી કિરિટી કાયૂરી [કેયૂરી (સી.)], ગત્તા તે ચન્દનુસ્સદા;

પસન્નમુખવણ્ણોસિ, સૂરિયવણ્ણોવ સોભસિ.

૫૦૦. ‘‘અમાનુસા પારિસજ્જા, યે તેમે પરિચારકા;

દસ કઞ્ઞાસહસ્સાનિ, યા તેમા પરિચારિકા;

તા [કા (ક.)] કમ્બુકાયૂરધરા, કઞ્ચનાવેળભૂસિતા.

૫૦૧. ‘‘મહાનુભાવોસિ તુવં, લોમહંસનરૂપવા;

પિટ્ઠિમંસાનિ અત્તનો, સામં ઉક્કચ્ચ [ઉક્કડ્ઢ (સી.)] ખાદસિ.

૫૦૨. ‘‘કિં નુ કાયેન વાચાય, મનસા દુક્કુટં કતં;

કિસ્સ કમ્મવિપાકેન, પિટ્ઠિમંસાનિ અત્તનો;

સામં ઉક્કચ્ચ ખાદસી’’તિ.

૫૦૩. ‘‘અત્તનોહં અનત્થાય, જીવલોકે અચારિસં;

પેસુઞ્ઞમુસાવાદેન, નિકતિવઞ્ચનાય ચ.

૫૦૪. ‘‘તત્થાહં પરિસં ગન્ત્વા, સચ્ચકાલે ઉપટ્ઠિતે;

અત્થં ધમ્મં નિરાકત્વા [નિરંકત્વા (ક.) નિ + આ + કર + ત્વા = નિરાકત્વા], અધમ્મમનુવત્તિસં.

૫૦૫. ‘‘એવં સો ખાદતત્તાનં, યો હોતિ પિટ્ઠિમંસિકો;

યથાહં અજ્જ ખાદામિ, પિટ્ઠિમંસાનિ અત્તનો.

૫૦૬. ‘‘તયિદં તયા નારદ સામં દિટ્ઠં, અનુકમ્પકા યે કુસલા વદેય્યું;

મા પેસુણં મા ચ મુસા અભાણિ, મા ખોસિ પિટ્ઠિમંસિકો તુવ’’ન્તિ.

કૂટવિનિચ્છયિકપેતવત્થુ નવમં.