૧૦. ધાતુવિવણ્ણપેતવત્થુ

૫૦૭. ‘‘અન્તલિક્ખસ્મિં તિટ્ઠન્તો, દુગ્ગન્ધો પૂતિ વાયસિ;

મુખઞ્ચ તે કિમયો પૂતિગન્ધં, ખાદન્તિ કિં કમ્મમકાસિ પુબ્બે.

૫૦૮. ‘‘તતો સત્થં ગહેત્વાન, ઓક્કન્તન્તિ પુનપ્પુનં;

ખારેન પરિપ્ફોસિત્વા, ઓક્કન્તન્તિ પુનપ્પુનં.

૫૦૯. ‘‘કિં નુ કાયેન વાચાય, મનસા દુક્કટં કતં;

કિસ્સ કમ્મવિપાકેન, ઇદં દુક્ખં નિગચ્છસી’’તિ.

૫૧૦. ‘‘અહં રાજગહે રમ્મે, રમણીયે ગિરિબ્બજે;

ઇસ્સરો ધનધઞ્ઞસ્સ, સુપહૂતસ્સ મારિસ.

૫૧૧. ‘‘તસ્સાયં મે ભરિયા ચ, ધીતા ચ સુણિસા ચ મે;

તા માલં ઉપ્પલઞ્ચાપિ, પચ્ચગ્ઘઞ્ચ વિલેપનં;

થૂપં હરન્તિયો વારેસિં, તં પાપં પકતં મયા.

૫૧૨. ‘‘છળાસીતિસહસ્સાનિ, મયં પચ્ચત્તવેદના;

થૂપપૂજં વિવણ્ણેત્વા, પચ્ચામ નિરયે ભુસં.

૫૧૩. ‘‘યે ચ ખો થૂપપૂજાય, વત્તન્તે અરહતો મહે;

આદીનવં પકાસેન્તિ, વિવેચયેથ [વિવેચયથ (સી.)] ને તતો.

૫૧૪. ‘‘ઇમા ચ પસ્સ આયન્તિયો, માલધારી અલઙ્કતા;

માલાવિપાકંનુભોન્તિયો [અનુભવન્તિ (સી. પી.)], સમિદ્ધા ચ તા [સમિદ્ધા તા (સી. સ્યા.)] યસસ્સિનિયો.

૫૧૫. ‘‘તઞ્ચ દિસ્વાન અચ્છેરં, અબ્ભુતં લોમહંસનં;

નમો કરોન્તિ સપ્પઞ્ઞા, વન્દન્તિ તં મહામુનિં.

૫૧૬. ‘‘સોહં નૂન ઇતો ગન્ત્વા, યોનિં લદ્ધાન માનુસિં;

થૂપપૂજં કરિસ્સામિ, અપ્પમત્તો પુનપ્પુન’’ન્તિ.

ધાતુવિવણ્ણપેતવત્થુ દસમં.

ચૂળવગ્ગો તતિયો નિટ્ઠિતો.