૮. દુતિયમિગલુદ્દકપેતવત્થુ

૪૮૮. ‘‘કૂટાગારે ચ પાસાદે, પલ્લઙ્કે ગોનકત્થતે;

પઞ્ચઙ્ગિકેન તુરિયેન, રમસિ સુપ્પવાદિતે.

૪૮૯. ‘‘તતો રત્યા વિવસાને [વ્યવસાને (સી.)], સૂરિયુગ્ગમનં પતિ;

અપવિદ્ધો સુસાનસ્મિં, બહુદુક્ખં નિગચ્છસિ.

૪૯૦. ‘‘કિં નુ કાયેન વાચાય, મનસા દુક્કટં કતં;

કિસ્સ કમ્મવિપાકેન, ઇદં દુક્ખં નિગચ્છસિ’’.

૪૯૧. ‘‘અહં રાજગહે રમ્મે, રમણીયે ગિરિબ્બજે;

મિગલુદ્દો પુરે આસિં, લુદ્દો ચાસિમસઞ્ઞતો.

૪૯૨. ‘‘તસ્સ મે સહાયો સુહદયો, સદ્ધો આસિ ઉપાસકો;

તસ્સ કુલુપકો ભિક્ખુ, આસિ ગોતમસાવકો;

સોપિ મં અનુકમ્પન્તો, નિવારેસિ પુનપ્પુનં.

૪૯૩. ‘‘‘માકાસિ પાપકં કમ્મં, મા તાત દુગ્ગતિં અગા;

સચે ઇચ્છસિ પેચ્ચ સુખં, વિરમ પાણવધા અસંયમા’.

૪૯૪. ‘‘તસ્સાહં વચનં સુત્વા, સુખકામસ્સ હિતાનુકમ્પિનો;

નાકાસિં સકલાનુસાસનિં, ચિરપાપાભિરતો અબુદ્ધિમા.

૪૯૫. ‘‘સો મં પુન ભૂરિસુમેધસો, અનુકમ્પાય સંયમે નિવેસયિ;

‘સચે દિવા હનસિ પાણિનો, અથ તે રત્તિં ભવતુ સંયમો’.

૪૯૬. ‘‘સ્વાહં દિવા હનિત્વા પાણિનો, વિરતો રત્તિમહોસિ સઞ્ઞતો;

રત્તાહં પરિચારેમિ, દિવા ખજ્જામિ દુગ્ગતો.

૪૯૭. ‘‘તસ્સ કમ્મસ્સ કુસલસ્સ, અનુભોમિ રત્તિં અમાનુસિં;

દિવા પટિહતાવ કુક્કુરા, ઉપધાવન્તિ સમન્તા ખાદિતું.

૪૯૮. ‘‘યે ચ તે સતતાનુયોગિનો, ધુવં પયુત્તા [ધુવયુત્તા (સી.)] સુગતસ્સ સાસને;

મઞ્ઞામિ તે અમતમેવ કેવલં, અધિગચ્છન્તિ પદં અસઙ્ખત’’ન્તિ.

દુતિયમિગલુદ્દકપેતવત્થુ અટ્ઠમં.