૨. સાણવાસીથેરપેતવત્થુ

૪૦૮. કુણ્ડિનાગરિયો થેરો, સાણવાસિ [સાનુવાસિ (સી.), સાનવાસિ (સ્યા.)] નિવાસિકો;

પોટ્ઠપાદોતિ નામેન, સમણો ભાવિતિન્દ્રિયો.

૪૦૯. તસ્સ માતા પિતા ભાતા, દુગ્ગતા યમલોકિકા;

પાપકમ્મં કરિત્વાન, પેતલોકં ઇતો ગતા.

૪૧૦. તે દુગ્ગતા સૂચિકટ્ટા, કિલન્તા નગ્ગિનો કિસા;

ઉત્તસન્તા [ઓત્તપ્પન્તા (સ્યા. ક.)] મહત્તાસા [મહાતાસા (સી.)], ન દસ્સેન્તિ કુરૂરિનો [કુરુદ્દિનો (ક.)].

૪૧૧. તસ્સ ભાતા વિતરિત્વા, નગ્ગો એકપથેકકો;

ચતુકુણ્ડિકો ભવિત્વાન, થેરસ્સ દસ્સયીતુમં.

૪૧૨. થેરો ચામનસિકત્વા, તુણ્હીભૂતો અતિક્કમિ;

સો ચ વિઞ્ઞાપયી થેરં, ‘ભાતા પેતગતો અહં’.

૪૧૩. ‘‘માતા પિતા ચ તે ભન્તે, દુગ્ગતા યમલોકિકા;

પાપકમ્મં કરિત્વાન, પેતલોકં ઇતો ગતા.

૪૧૪. ‘‘તે દુગ્ગતા સૂચિકટ્ટા, કિલન્તા નગ્ગિનો કિસા;

ઉત્તસન્તા મહત્તાસા, ન દસ્સેન્તિ કુરૂરિનો.

૪૧૫. ‘‘અનુકમ્પસ્સુ કારુણિકો, દત્વા અન્વાદિસાહિ નો;

તવ દિન્નેન દાનેન, યાપેસ્સન્તિ કુરૂરિનો’’તિ.

૪૧૬. થેરો ચરિત્વા પિણ્ડાય, ભિક્ખૂ અઞ્ઞે ચ દ્વાદસ;

એકજ્ઝં સન્નિપતિંસુ, ભત્તવિસ્સગ્ગકારણા.

૪૧૭. થેરો સબ્બેવ તે આહ, ‘‘યથાલદ્ધં દદાથ મે;

સઙ્ઘભત્તં કરિસ્સામિ, અનુકમ્પાય ઞાતિનં’’.

૪૧૮. નિય્યાદયિંસુ થેરસ્સ, થેરો સઙ્ઘં નિમન્તયિ;

દત્વા અન્વાદિસિ થેરો, માતુ પિતુ ચ ભાતુનો;

‘‘ઇદં મે ઞાતીનં હોતુ, સુખિતા હોન્તુ ઞાતયો’’.

૪૧૯. સમનન્તરાનુદ્દિટ્ઠે, ભોજનં ઉદપજ્જથ;

સુચિં પણીતં સમ્પન્નં, અનેકરસબ્યઞ્જનં.

૪૨૦. તતો ઉદ્દસ્સયી [ઉદ્દિસયી (સી. ક.), ઉદ્દિસ્સતિ (સ્યા. ક.)] ભાતા, વણ્ણવા બલવા સુખી;

‘‘પહૂતં ભોજનં ભન્તે, પસ્સ નગ્ગામ્હસે મયં;

તથા ભન્તે પરક્કમ, યથા વત્થં લભામસે’’તિ.

૪૨૧. થેરો સઙ્કારકૂટમ્હા, ઉચ્ચિનિત્વાન નન્તકે;

પિલોતિકં પટં કત્વા, સઙ્ઘે ચાતુદ્દિસે અદા.

૪૨૨. દત્વા અન્વાદિસી થેરો, માતુ પિતુ ચ ભાતુનો;

‘‘ઇદં મે ઞાતીનં હોતુ, સુખિતા હોન્તુ ઞાતયો’’.

૪૨૩. સમનન્તરાનુદ્દિટ્ઠે, વત્થાનિ ઉદપજ્જિસું;

તતો સુવત્થવસનો, થેરસ્સ દસ્સયીતુમં.

૪૨૪. ‘‘યાવતા નન્દરાજસ્સ, વિજિતસ્મિં પટિચ્છદા;

તતો બહુતરા ભન્તે, વત્થાનચ્છાદનાનિ નો.

૪૨૫. ‘‘કોસેય્યકમ્બલીયાનિ, ખોમ કપ્પાસિકાનિ ચ;

વિપુલા ચ મહગ્ઘા ચ, તેપાકાસેવલમ્બરે.

૪૨૬. ‘‘તે મયં પરિદહામ, યં યં હિ મનસો પિયં;

તથા ભન્તે પરક્કમ, યથા ગેહં લભામસે’’તિ.

૪૨૭. થેરો પણ્ણકુટિં કત્વા, સઙ્ઘે ચાતુદ્દિસે અદા;

દત્વા અન્વાદિસી થેરો, માતુ પિતુ ચ ભાતુનો;

‘‘ઇદં મે ઞાતીનં હોતુ, સુખિતા હોન્તુ ઞાતયો’’.

૪૨૮. સમનન્તરાનુદ્દિટ્ઠે, ઘરાનિ ઉદપજ્જિસું;

કૂટાગારનિવેસના, વિભત્તા ભાગસો મિતા.

૪૨૯. ‘‘ન મનુસ્સેસુ ઈદિસા, યાદિસા નો ઘરા ઇધ;

અપિ દિબ્બેસુ યાદિસા, તાદિસા નો ઘરા ઇધ.

૪૩૦. ‘‘દદ્દલ્લમાના આભેન્તિ [આભન્તિ (ક.)], સમન્તા ચતુરો દિસા;

‘તથા ભન્તે પરક્કમ, યથા પાનીયં લભામસે’’તિ.

૪૩૧. થેરો કરણં [કરકં (સી. સ્યા. પી.)] પૂરેત્વા, સઙ્ઘે ચાતુદ્દિસે અદા;

દત્વા અન્વાદિસી થેરો, માતુ પિતુ ચ ભાતુનો;

‘‘ઇદં મે ઞાતીનં હોતુ, સુખિતા હોન્તુ ઞાતયો’.

૪૩૨. સમનન્તરાનુદ્દિટ્ઠે, પાનીયં ઉદપજ્જથ;

ગમ્ભીરા ચતુરસ્સા ચ, પોક્ખરઞ્ઞો સુનિમ્મિતા.

૪૩૩. સીતોદિકા સુપ્પતિત્થા, સીતા અપ્પટિગન્ધિયા;

પદુમુપ્પલસઞ્છન્ના, વારિકિઞ્જક્ખપૂરિતા.

૪૩૪. તત્થ ન્હત્વા પિવિત્વા ચ, થેરસ્સ પટિદસ્સયું;

‘‘પહૂતં પાનીયં ભન્તે, પાદા દુક્ખા ફલન્તિ નો’’.

૪૩૫. ‘‘આહિણ્ડમાના ખઞ્જામ, સક્ખરે કુસકણ્ટકે;

‘તથા ભન્તે પરક્કમ, યથા યાનં લભામસે’’’તિ.

૪૩૬. થેરો સિપાટિકં લદ્ધા, સઙ્ઘે ચાતુદ્દિસે અદા;

દત્વા અન્વાદિસી થેરો, માતુ પિતુ ચ ભાતુનો;

‘‘ઇદં મે ઞાતીનં હોતુ, સુખિતા હોન્તુ ઞાતયો’’.

૪૩૭. સમનન્તરાનુદ્દિટ્ઠે, પેતા રથેન માગમું;

‘‘અનુકમ્પિતમ્હ ભદન્તે, ભત્તેનચ્છાદનેન ચ.

૪૩૮. ‘‘ઘરેન પાનીયદાનેન, યાનદાનેન ચૂભયં;

મુનિં કારુણિકં લોકે, ભન્તે વન્દિતુમાગતા’’તિ.

સાણવાસીથેરપેતવત્થુ દુતિયં.