૩. રથકારપેતિવત્થુ

૪૩૯. ‘‘વેળુરિયથમ્ભં રુચિરં પભસ્સરં, વિમાનમારુય્હ અનેકચિત્તં;

તત્થચ્છસિ દેવિ મહાનુભાવે, પથદ્ધનિ [સમન્તતો (ક.)] પન્નરસેવ ચન્દો.

૪૪૦. ‘‘વણ્ણો ચ તે કનકસ્સ સન્નિભો, ઉત્તત્તરૂપો ભુસ દસ્સનેય્યો;

પલ્લઙ્કસેટ્ઠે અતુલે નિસિન્ના, એકા તુવં નત્થિ ચ તુય્હ સામિકો.

૪૪૧. ‘‘ઇમા ચ તે પોક્ખરણી સમન્તા, પહૂતમલ્યા [પહૂતમાલા (સી. સ્યા.)] બહુપુણ્ડરીકા;

સુવણ્ણચુણ્ણેહિ સમન્તમોત્થતા, ન તત્થ પઙ્કો પણકો ચ વિજ્જતિ.

૪૪૨. ‘‘હંસા ચિમે દસ્સનીયા મનોરમા, ઉદકસ્મિમનુપરિયન્તિ સબ્બદા;

સમય્ય વગ્ગૂપનદન્તિ સબ્બે, બિન્દુસ્સરા દુન્દુભીનંવ ઘોસો.

૪૪૩. ‘‘દદ્દલ્લમાના યસસા યસસ્સિની, નાવાય ચ ત્વં અવલમ્બ તિટ્ઠસિ;

આળારપમ્હે હસિતે પિયંવદે, સબ્બઙ્ગકલ્યાણિ ભુસં વિરોચસિ.

૪૪૪. ‘‘ઇદં વિમાનં વિરજં સમે ઠિતં, ઉય્યાનવન્તં [ઉય્યાનવનં (ક.)] રતિનન્દિવડ્ઢનં;

ઇચ્છામહં નારિ અનોમદસ્સને, તયા સહ નન્દને ઇધ મોદિતુ’’ન્તિ.

૪૪૫. ‘‘કરોહિ કમ્મં ઇધ વેદનીયં, ચિત્તઞ્ચ તે ઇધ નિહિતં ભવતુ [નતઞ્ચ હોતુ (ક.), નિતઞ્ચ હોતુ (સ્યા.)];

કત્વાન કમ્મં ઇધ વેદનીયં, એવં મમં લચ્છસિ કામકામિનિ’’ન્તિ.

૪૪૬. ‘‘સાધૂ’’તિ સો તસ્સા પટિસ્સુણિત્વા, અકાસિ કમ્મં તહિં વેદનીયં;

કત્વાન કમ્મં તહિં વેદનીયં, ઉપપજ્જિ સો માણવો તસ્સા સહબ્યતન્તિ.

રથકારપેતિવત્થુ તતિયં.

ભાણવારં દુતિયં નિટ્ઠિતં.