૮. ચૂળસેટ્ઠિપેતવત્થુ

૨૪૬. ‘‘નગ્ગો કિસો પબ્બજિતોસિ ભન્તે, રત્તિં કુહિં ગચ્છસિ કિસ્સ હેતુ;

આચિક્ખ મે તં અપિ સક્કુણેમુ, સબ્બેન વિત્તં પટિપાદયે તુવ’’ન્તિ.

૨૪૭. ‘‘બારાણસી નગરં દૂરઘુટ્ઠં, તત્થાહં ગહપતિ અડ્ઢકો અહુ દીનો;

અદાતા ગેધિતમનો આમિસસ્મિં, દુસ્સીલ્યેન યમવિસયમ્હિ પત્તો.

૨૪૮. ‘‘સો સૂચિકાય કિલમિતો તેહિ,

તેનેવ ઞાતીસુ યામિ આમિસકિઞ્ચિક્ખહેતુ;

અદાનસીલા ન ચ સદ્દહન્તિ,

દાનફલં હોતિ પરમ્હિ લોકે.

૨૪૯. ‘‘ધીતા ચ મય્હં લપતે અભિક્ખણં, ‘દસ્સામિ દાનં પિતૂનં પિતામહાનં’;

તમુપક્ખટં પરિવિસયન્તિ બ્રાહ્મણા [બ્રાહ્મણે (સી.)], ‘યામિ અહં અન્ધકવિન્દં ભોત્તુ’’’ન્તિ.

૨૫૦. તમવોચ રાજા ‘‘અનુભવિયાન તમ્પિ,

એય્યાસિ ખિપ્પં અહમપિ કસ્સં પૂજં;

આચિક્ખ મે તં યદિ અત્થિ હેતુ,

સદ્ધાયિતં હેતુવચો સુણોમા’’તિ.

૨૫૧. ‘તથા’તિ વત્વા અગમાસિ તત્થ, ભુઞ્જિંસુ ભત્તં ન ચ દક્ખિણારહા;

પચ્ચાગમિ રાજગહં પુનાપરં, પાતુરહોસિ પુરતો જનાધિપસ્સ.

૨૫૨. દિસ્વાન પેતં પુનદેવ આગતં, રાજા અવોચ ‘‘અહમપિ કિં દદામિ;

આચિક્ખ મે તં યદિ અત્થિ હેતુ, યેન તુવં ચિરતરં પીણિતો સિયા’’તિ.

૨૫૩. ‘‘બુદ્ધઞ્ચ સઙ્ઘં પરિવિસિયાન રાજ, અન્નેન પાનેન ચ ચીવરેન;

તં દક્ખિણં આદિસ મે હિતાય, એવં અહં ચિરતરં પીણિતો સિયા’’તિ.

૨૫૪. તતો ચ રાજા નિપતિત્વા તાવદે [તાવદેવ (સ્યા.), તદેવ (ક.)], દાનં સહત્થા અતુલં દદિત્વા [અતુલઞ્ચ દત્વા (સ્યા. ક.)] સઙ્ઘે;

આરોચેસિ પકતં [આરોચયી પકતિં (સી. સ્યા.)] તથાગતસ્સ, તસ્સ ચ પેતસ્સ દક્ખિણં આદિસિત્થ.

૨૫૫. સો પૂજિતો અતિવિય સોભમાનો, પાતુરહોસિ પુરતો જનાધિપસ્સ;

‘‘યક્ખોહમસ્મિ પરમિદ્ધિપત્તો, ન મય્હમત્થિ સમા સદિસા [મય્હમિદ્ધિસમસદિસા (સી. સ્યા.)] માનુસા.

૨૫૬. ‘‘પસ્સાનુભાવં અપરિમિતં મમયિદં, તયાનુદિટ્ઠં અતુલં દત્વા સઙ્ઘે;

સન્તપ્પિતો સતતં સદા બહૂહિ, યામિ અહં સુખિતો મનુસ્સદેવા’’તિ.

ચૂળસેટ્ઠિપેતવત્થુ અટ્ઠમં નિટ્ઠિતં.

ભાણવારં પઠમં નિટ્ઠિતં.