૭. ધનપાલસેટ્ઠિપેતવત્થુ

૨૨૭. ‘‘નગ્ગો દુબ્બણ્ણરૂપોસિ, કિસો ધમનિસન્થતો;

ઉપ્ફાસુલિકો કિસિકો, કો નુ ત્વમસિ મારિસ’’.

૨૨૮. ‘‘અહં ભદન્તે પેતોમ્હિ, દુગ્ગતો યમલોકિકો;

પાપકમ્મં કરિત્વાન, પેતલોકં ઇતો ગતો’’.

૨૨૯. ‘‘કિં નુ કાયેન વાચાય, મનસા દુક્કટં કતં;

કિસ્સ કમ્મવિપાકેન, પેતલોકં ઇતો ગતો’’.

૨૩૦. ‘‘નગરં અત્થિ પણ્ણાનં [દસન્નાનં (સી. સ્યા. પી.)], એરકચ્છન્તિ વિસ્સુતં;

તત્થ સેટ્ઠિ પુરે આસિં, ધનપાલોતિ મં વિદૂ.

૨૩૧. ‘‘અસીતિ સકટવાહાનં, હિરઞ્ઞસ્સ અહોસિ મે;

પહૂતં મે જાતરૂપં, મુત્તા વેળુરિયા બહૂ.

૨૩૨. ‘‘તાવ મહદ્ધનસ્સાપિ, ન મે દાતું પિયં અહુ;

પિદહિત્વા દ્વારં ભુઞ્જિં [ભુઞ્જામિ (સી. સ્યા.)], મા મં યાચનકાદ્દસું.

૨૩૩. ‘‘અસ્સદ્ધો મચ્છરી ચાસિં, કદરિયો પરિભાસકો;

દદન્તાનં કરોન્તાનં, વારયિસ્સં બહુ જને [બહુજ્જનં (સી. સ્યા.)].

૨૩૪. ‘‘વિપાકો નત્થિ દાનસ્સ, સંયમસ્સ કુતો ફલં;

પોક્ખરઞ્ઞોદપાનાનિ, આરામાનિ ચ રોપિતે;

પપાયો ચ વિનાસેસિં, દુગ્ગે સઙ્કમનાનિ ચ.

૨૩૫. ‘‘સ્વાહં અકતકલ્યાણો, કતપાપો તતો ચુતો;

ઉપપન્નો પેત્તિવિસયં, ખુપ્પિપાસસમપ્પિતો.

૨૩૬. ‘‘પઞ્ચપણ્ણાસવસ્સાનિ, યતો કાલઙ્કતો અહં;

નાભિજાનામિ ભુત્તં વા, પીતં વા પન પાનિયં.

૨૩૭. ‘‘યો સંયમો સો વિનાસો,યો વિનાસો સો સંયમો;

પેતા હિ કિર જાનન્તિ, યો સંયમો સો વિનાસો.

૨૩૮. ‘‘અહં પુરે સંયમિસ્સં, નાદાસિં બહુકે ધને;

સન્તેસુ દેય્યધમ્મેસુ, દીપં નાકાસિમત્તનો;

સ્વાહં પચ્છાનુતપ્પામિ, અત્તકમ્મફલૂપગો.

૨૩૯. [પે. વ. ૬૯] ‘‘ઉદ્ધં ચતૂહિ માસેહિ, કાલંકિરિયા ભવિસ્સતિ;

એકન્તકટુકં ઘોરં, નિરયં પપતિસ્સહં.

૨૪૦. [પે. વ. ૭૦] ‘‘ચતુક્કણ્ણં ચતુદ્વારં, વિભત્તં ભાગસો મિતં;

અયોપાકારપરિયન્તં, અયસા પટિકુજ્જિતં.

૨૪૧. [પે. વ. ૭૧] ‘‘તસ્સ અયોમયા ભૂમિ, જલિતા તેજસા યુતા;

સમન્તા યોજનસતં, ફરિત્વા તિટ્ઠતિ સબ્બદા.

૨૪૨. [પે. વ. ૭૨] ‘‘તત્થાહં દીઘમદ્ધાનં, દુક્ખં વેદિસ્સ વેદનં;

ફલં પાપસ્સ કમ્મસ્સ, તસ્મા સોચામહં ભુસં.

૨૪૩. ‘‘તં વો વદામિ ભદ્દં વો, યાવન્તેત્થ સમાગતા;

માકત્થ પાપકં કમ્મં, આવિ વા યદિ વા રહો.

૨૪૪. ‘‘સચે તં પાપકં કમ્મં, કરિસ્સથ કરોથ વા;

ન વો દુક્ખા પમુત્યત્થિ [પમુત્તત્થિ (સબ્બત્થ) ઉદા. ૪૪ પસ્સિતબ્બં], ઉપ્પચ્ચાપિ [ઉપેચ્ચાપિ (સ્યા. ક.)] પલાયતં.

૨૪૫. ‘‘મત્તેય્યા હોથ પેત્તેય્યા, કુલે જેટ્ઠાપચાયિકા;

સામઞ્ઞા હોથ બ્રહ્મઞ્ઞા, એવં સગ્ગં ગમિસ્સથા’’તિ.

ધનપાલસેટ્ઠિપેતવત્થુ સત્તમં.