૬. કણ્હપેતવત્થુ

૨૦૭. ‘‘ઉટ્ઠેહિ કણ્હ કિં સેસિ, કો અત્થો સુપનેન તે;

યો ચ તુય્હં સકો ભાતા, હદયં ચક્ખુ ચ [ચક્ખુંવ (અટ્ઠ.)] દક્ખિણં;

તસ્સ વાતા બલીયન્તિ, સસં જપ્પતિ [ઘટો જપ્પતિ (ક.)] કેસવા’’તિ.

૨૦૮. ‘‘તસ્સ તં વચનં સુત્વા, રોહિણેય્યસ્સ કેસવો;

તરમાનરૂપો વુટ્ઠાસિ, ભાતુસોકેન અટ્ટિતો.

૨૦૯. ‘‘કિં નુ ઉમ્મત્તરૂપોવ, કેવલં દ્વારકં ઇમં;

સસો સસોતિ લપસિ, કીદિસં સસમિચ્છસિ.

૨૧૦. ‘‘સોવણ્ણમયં મણિમયં, લોહમયં અથ રૂપિયમયં;

સઙ્ખસિલાપવાળમયં, કારયિસ્સામિ તે સસં.

૨૧૧. ‘‘સન્તિ અઞ્ઞેપિ સસકા, અરઞ્ઞવનગોચરા;

તેપિ તે આનયિસ્સામિ, કીદિસં સસમિચ્છસી’’તિ.

૨૧૨. ‘‘નાહમેતે સસે ઇચ્છે, યે સસા પથવિસ્સિતા;

ચન્દતો સસમિચ્છામિ, તં મે ઓહર કેસવા’’તિ.

૨૧૩. ‘‘સો નૂન મધુરં ઞાતિ, જીવિતં વિજહિસ્સસિ;

અપત્થિયં પત્થયસિ, ચન્દતો સસમિચ્છસી’’તિ.

૨૧૪. ‘‘એવં ચે કણ્હ જાનાસિ, યથઞ્ઞમનુસાસસિ;

કસ્મા પુરે મતં પુત્તં, અજ્જાપિ મનુસોચસિ.

૨૧૫. ‘‘ન યં લબ્ભા મનુસ્સેન, અમનુસ્સેન વા પન;

જાતો મે મા મરિ પુત્તો, કુતો લબ્ભા અલબ્ભિયં.

૨૧૬. ‘‘ન મન્તા મૂલભેસજ્જા, ઓસધેહિ ધનેન વા;

સક્કા આનયિતું કણ્હ, યં પેતમનુસોચસિ.

૨૧૭. ‘‘મહદ્ધના મહાભોગા, રટ્ઠવન્તોપિ ખત્તિયા;

પહૂતધનધઞ્ઞાસે, તેપિ નો [નત્થેત્થપાઠભેદો] અજરામરા.

૨૧૮. ‘‘ખત્તિયા બ્રાહ્મણા વેસ્સા, સુદ્દા ચણ્ડાલપુક્કુસા;

એતે ચઞ્ઞે ચ જાતિયા, તેપિ નો અજરામરા.

૨૧૯. ‘‘યે મન્તં પરિવત્તેન્તિ, છળઙ્ગં બ્રહ્મચિન્તિતં;

એતે ચઞ્ઞે ચ વિજ્જાય, તેપિ નો અજરામરા.

૨૨૦. ‘‘ઇસયો વાપિ [ઇસયો ચાપિ (વિમાનવત્થુ ૯૯)] યે સન્તા, સઞ્ઞતત્તા તપસ્સિનો;

સરીરં તેપિ કાલેન, વિજહન્તિ તપસ્સિનો.

૨૨૧. ‘‘ભાવિતત્તા અરહન્તો, કતકિચ્ચા અનાસવા;

નિક્ખિપન્તિ ઇમં દેહં, પુઞ્ઞપાપપરિક્ખયા’’તિ.

૨૨૨. ‘‘આદિત્તં વત મં સન્તં, ઘતસિત્તંવ પાવકં;

વારિના વિય ઓસિઞ્ચં, સબ્બં નિબ્બાપયે દરં.

૨૨૩. ‘‘અબ્બહી વત મે સલ્લં, સોકં હદયનિસ્સિતં;

યો મે સોકપરેતસ્સ, પુત્તસોકં અપાનુદિ.

૨૨૪. ‘‘સ્વાહં અબ્બૂળ્હસલ્લોસ્મિ, સીતિભૂતોસ્મિ નિબ્બુતો;

ન સોચામિ ન રોદામિ, તવ સુત્વાન ભાતિક’’ [ભાસિતં (સ્યા.)].

૨૨૫. એવં કરોન્તિ સપ્પઞ્ઞા, યે હોન્તિ અનુકમ્પકા;

નિવત્તયન્તિ સોકમ્હા, ઘટો જેટ્ઠંવ ભાતરં.

૨૨૬. યસ્સ એતાદિસા હોન્તિ, અમચ્ચા પરિચારકા;

સુભાસિતેન અન્વેન્તિ, ઘટો જેટ્ઠંવ ભાતરન્તિ.

કણ્હપેતવત્થુ છટ્ઠં.