૨. પુગ્ગલવિસેસનિદ્દેસો

૮. દ્વે પુગ્ગલા પટિસમ્ભિદપ્પત્તા – એકો પુબ્બયોગસમ્પન્નો, એકો ન પુબ્બયોગસમ્પન્નો. યો પુબ્બયોગસમ્પન્નો સો તેન અતિરેકો હોતિ, અધિકો હોતિ, વિસેસો હોતિ. તસ્સ ઞાણં પભિજ્જતિ.

દ્વે પુગ્ગલા પટિસમ્ભિદપ્પત્તા, દ્વેપિ પુબ્બયોગસમ્પન્ના – એકો બહુસ્સુતો, એકો ન બહુસ્સુતો. યો બહુસ્સુતો, સો તેન અતિરેકો હોતિ, અધિકો હોતિ, વિસેસો હોતિ. તસ્સ ઞાણં પભિજ્જતિ.

દ્વે પુગ્ગલા પટિસમ્ભિદપ્પત્તા, દ્વેપિ પુબ્બયોગસમ્પન્ના, દ્વેપિ બહુસ્સુતા – એકો દેસનાબહુલો, એકો ન દેસનાબહુલો. યો દેસનાબહુલો, સો તેન અતિરેકો હોતિ, અધિકો હોતિ, વિસેસો હોતિ. તસ્સ ઞાણં પભિજ્જતિ.

દ્વે પુગ્ગલા પટિસમ્ભિદપ્પત્તા, દ્વેપિ પુબ્બયોગસમ્પન્ના, દ્વેપિ બહુસ્સુતા, દ્વેપિ દેસનાબહુલા – એકો ગરૂપનિસ્સિતો, એકો ન ગરૂપનિસ્સિતો. યો ગરૂપનિસ્સિતો, સો તેન અતિરેકો હોતિ, અધિકો હોતિ, વિસેસો હોતિ. તસ્સ ઞાણં પભિજ્જતિ.

દ્વે પુગ્ગલા પટિસમ્ભિદપ્પત્તા, દ્વેપિ પુબ્બયોગસમ્પન્ના, દ્વેપિ બહુસ્સુતા, દ્વેપિ દેસનાબહુલા, દ્વેપિ ગરૂપનિસ્સિતા – એકો વિહારબહુલો, એકો ન વિહારબહુલો. યો વિહારબહુલો, સો તેન અતિરેકો હોતિ, અધિકો હોતિ, વિસેસો હોતિ. તસ્સ ઞાણં પભિજ્જતિ.

દ્વે પુગ્ગલા પટિસમ્ભિદપ્પત્તા, દ્વેપિ પુબ્બયોગસમ્પન્ના, દ્વેપિ બહુસ્સુતા, દ્વેપિ દેસનાબહુલા, દ્વેપિ ગરૂપનિસ્સિતા, દ્વેપિ વિહારબહુલા – એકો પચ્ચવેક્ખણાબહુલો, એકો ન પચ્ચવેક્ખણાબહુલો. યો પચ્ચવેક્ખણાબહુલો, સો તેન અતિરેકો હોતિ, અધિકો હોતિ, વિસેસો હોતિ. તસ્સ ઞાણં પભિજ્જતિ.

દ્વે પુગ્ગલા પટિસમ્ભિદપ્પત્તા, દ્વેપિ પુબ્બયોગસમ્પન્ના, દ્વેપિ બહુસ્સુતા, દ્વેપિ દેસનાબહુલા, દ્વેપિ ગરૂપનિસ્સિતા, દ્વેપિ વિહારબહુલા, દ્વેપિ પચ્ચવેક્ખણાબહુલા – એકો સેખપટિસમ્ભિદપ્પત્તો, એકો અસેખપટિસમ્ભિદપ્પત્તો. યો અસેખપટિસમ્ભિદપ્પત્તો, સો તેન અતિરેકો હોતિ, અધિકો હોતિ, વિસેસો હોતિ. તસ્સ ઞાણં પભિજ્જતિ.

દ્વે પુગ્ગલા પટિસમ્ભિદપ્પત્તા, દ્વેપિ પુબ્બયોગસમ્પન્ના, દ્વેપિ બહુસ્સુતા, દ્વેપિ દેસનાબહુલા, દ્વેપિ ગરૂપનિસ્સિતા, દ્વેપિ વિહારબહુલા, દ્વેપિ પચ્ચવેક્ખણાબહુલા, દ્વેપિ અસેખપટિસમ્ભિદપ્પત્તા – એકો સાવકપારમિપ્પત્તો, એકો ન સાવકપારમિપ્પત્તો. યો સાવકપારમિપ્પત્તો, સો તેન અતિરેકો હોતિ, અધિકો હોતિ, વિસેસો હોતિ. તસ્સ ઞાણં પભિજ્જતિ.

દ્વે પુગ્ગલા પટિસમ્ભિદપ્પત્તા, દ્વેપિ પુબ્બયોગસમ્પન્ના, દ્વેપિ બહુસ્સુતા, દ્વેપિ દેસનાબહુલા, દ્વેપિ ગરૂપનિસ્સિતા, દ્વેપિ વિહારબહુલા, દ્વેપિ પચ્ચવેક્ખણાબહુલા, દ્વેપિ અસેખપટિસમ્ભિદપ્પત્તા – એકો સાવકપારમિપ્પત્તો, એકો પચ્ચેકસમ્બુદ્ધો. યો પચ્ચેકસમ્બુદ્ધો, સો તેન અતિરેકો હોતિ, અધિકો હોતિ, વિસેસો હોતિ. તસ્સ ઞાણં પભિજ્જતિ.

પચ્ચેકબુદ્ધઞ્ચ સદેવકઞ્ચ લોકં ઉપાદાય તથાગતો અરહં સમ્માસમ્બુદ્ધો અગ્ગો પટિસમ્ભિદપ્પત્તો પઞ્ઞાપભેદકુસલો પભિન્નઞાણો અધિગતપટિસમ્ભિદો ચતુવેસારજ્જપ્પત્તો દસબલધારી પુરિસાસભો પુરિસસીહો…પે… યેપિ તે ખત્તિયપણ્ડિતા બ્રાહ્મણપણ્ડિતા ગહપતિપણ્ડિતા સમણપણ્ડિતા નિપુણા કતપરપ્પવાદા વાલવેધિરૂપા વોભિન્દન્તા મઞ્ઞે ચરન્તિ પઞ્ઞાગતેન દિટ્ઠિગતાનિ, તે પઞ્હં અભિસઙ્ખરિત્વા અભિસઙ્ખરિત્વા તથાગતં ઉપસઙ્કમિત્વા પુચ્છન્તિ ગૂળ્હાનિ ચ પટિચ્છન્નાનિ ચ. કથિતા વિસજ્જિતા ચ તે પઞ્હા ભગવતા હોન્તિ નિદ્દિટ્ઠકારણા, ઉપક્ખિત્તકા ચ તે ભગવતો સમ્પજ્જન્તિ. અથ ખો ભગવા તત્થ અતિરોચતિ, યદિદં પઞ્ઞાયાતિ અગ્ગો પટિસમ્ભિદપ્પત્તોતિ.

મહાપઞ્ઞાકથા નિટ્ઠિતા.