૮. લોકુત્તરકથા

૪૩. કતમે ધમ્મા લોકુત્તરા? ચત્તારો સતિપટ્ઠાના, ચત્તારો સમ્મપ્પધાના, ચત્તારો ઇદ્ધિપાદા, પઞ્ચિન્દ્રિયાનિ, પઞ્ચ બલાનિ, સત્ત બોજ્ઝઙ્ગા, અરિયો અટ્ઠઙ્ગિકો મગ્ગો, ચત્તારો અરિયમગ્ગા, ચત્તારિ ચ સામઞ્ઞફલાનિ, નિબ્બાનઞ્ચ – ઇમે ધમ્મા લોકુત્તરા.

લોકુત્તરાતિ કેનટ્ઠેન લોકુત્તરા? લોકં તરન્તીતિ – લોકુત્તરા. લોકા ઉત્તરન્તીતિ – લોકુત્તરા. લોકતો ઉત્તરન્તીતિ – લોકુત્તરા. લોકમ્હા ઉત્તરન્તીતિ – લોકુત્તરા. લોકં અતિક્કમન્તીતિ – લોકુત્તરા. લોકં સમતિક્કમન્તીતિ – લોકુત્તરા. લોકં સમતિક્કન્તાતિ – લોકુત્તરા. લોકેન અતિરેકાતિ – લોકુત્તરા. લોકન્તં તરન્તીતિ – લોકુત્તરા. લોકા નિસ્સરન્તીતિ – લોકુત્તરા. લોકતો નિસ્સરન્તીતિ – લોકુત્તરા. લોકમ્હા નિસ્સરન્તીતિ – લોકુત્તરા. લોકા નિસ્સટાતિ – લોકુત્તરા. લોકેન નિસ્સટાતિ – લોકુત્તરા. લોકમ્હા નિસ્સટાતિ – લોકુત્તરા. લોકે ન તિટ્ઠન્તીતિ – લોકુત્તરા. લોકસ્મિં ન તિટ્ઠન્તીતિ – લોકુત્તરા. લોકે ન લિમ્પન્તીતિ – લોકુત્તરા. લોકેન ન લિમ્પન્તીતિ – લોકુત્તરા. લોકે અસંલિત્તાતિ – લોકુત્તરા. લોકેન અસંલિત્તાતિ – લોકુત્તરા. લોકે અનુપલિત્તાતિ – લોકુત્તરા. લોકેન અનુપલિત્તાતિ – લોકુત્તરા. લોકે વિપ્પમુત્તાતિ – લોકુત્તરા. લોકેન વિપ્પમુત્તાતિ – લોકુત્તરા. લોકા વિપ્પમુત્તાતિ – લોકુત્તરા. લોકતો વિપ્પમુત્તાતિ – લોકુત્તરા. લોકમ્હા વિપ્પમુત્તાતિ – લોકુત્તરા. લોકે વિસઞ્ઞુત્તાતિ – લોકુત્તરા. લોકેન વિસઞ્ઞુત્તાતિ – લોકુત્તરા. લોકા વિસઞ્ઞુત્તાતિ – લોકુત્તરા. લોકસ્મિં વિસઞ્ઞુત્તાતિ – લોકુત્તરા. લોકતો વિસઞ્ઞુત્તાતિ – લોકુત્તરા. લોકમ્હા વિસઞ્ઞુત્તાતિ – લોકુત્તરા. લોકા સુજ્ઝન્તીતિ – લોકુત્તરા. લોકતો સુજ્ઝન્તીતિ – લોકુત્તરા. લોકમ્હા સુજ્ઝન્તીતિ – લોકુત્તરા. લોકા વિસુજ્ઝન્તીતિ – લોકુત્તરા. લોકતો વિસુજ્ઝન્તીતિ – લોકુત્તરા. લોકમ્હા વિસુજ્ઝન્તીતિ – લોકુત્તરા. લોકા વુટ્ઠહન્તીતિ [ઉદ્ધરન્તીતિ (ક.), ઉટ્ઠહન્તીતિ (સી. અટ્ઠ.)] – લોકુત્તરા. લોકતો વુટ્ઠહન્તીતિ – લોકુત્તરા. લોકમ્હા વુટ્ઠહન્તીતિ – લોકુત્તરા. લોકા વિવટ્ટન્તીતિ – લોકુત્તરા. લોકતો વિવટ્ટન્તીતિ – લોકુત્તરા. લોકમ્હા વિવટ્ટન્તીતિ – લોકુત્તરા. લોકે ન સજ્જન્તીતિ – લોકુત્તરા. લોકે ન ગય્હન્તીતિ – લોકુત્તરા. લોકે ન બજ્ઝન્તીતિ – લોકુત્તરા. લોકં સમુચ્છિન્દન્તીતિ – લોકુત્તરા. લોકં સમુચ્છિન્નત્તાતિ – લોકુત્તરા. લોકં પટિપ્પસ્સમ્ભેન્તીતિ – લોકુત્તરા. લોકં પટિપ્પસ્સમ્ભિતત્તાતિ – લોકુત્તરા. લોકસ્સ અપથાતિ – લોકુત્તરા. લોકસ્સ અગતીતિ – લોકુત્તરા. લોકસ્સ અવિસયાતિ – લોકુત્તરા. લોકસ્સ અસાધારણાતિ – લોકુત્તરા. લોકં વમન્તીતિ – લોકુત્તરા. લોકં ન પચ્ચાવમન્તીતિ – લોકુત્તરા. લોકં પજહન્તીતિ – લોકુત્તરા. લોકં ન ઉપાદિયન્તીતિ – લોકુત્તરા. લોકં વિસિનેન્તીતિ – લોકુત્તરા. લોકં ન ઉસ્સિનેન્તીતિ – લોકુત્તરા. લોકં વિધૂપેન્તીતિ – લોકુત્તરા. લોકં ન સંધૂપેન્તીતિ – લોકુત્તરા. લોકં સમતિક્કમ્મ અભિભુય્ય તિટ્ઠન્તીતિ – લોકુત્તરા.

લોકુત્તરકથા નિટ્ઠિતા.