૨. બલવારો

૨૪. સબ્બે સત્તા અવેરિનો હોન્તુ, ખેમિનો હોન્તુ, સુખિનો હોન્તૂતિ – અસ્સદ્ધિયે ન કમ્પતિ. સદ્ધાબલપરિભાવિતા હોતિ મેત્તાચેતોવિમુત્તિ.

સબ્બે સત્તા અવેરિનો હોન્તુ, ખેમિનો હોન્તુ, સુખિનો હોન્તૂતિ – કોસજ્જે ન કમ્પતિ. વીરિયબલપરિભાવિતા હોતિ મેત્તાચેતોવિમુત્તિ.

સબ્બે સત્તા અવેરિનો હોન્તુ, ખેમિનો હોન્તુ, સુખિનો હોન્તૂતિ – પમાદે ન કમ્પતિ. સતિબલપરિભાવિતા હોતિ મેત્તાચેતોવિમુત્તિ.

સબ્બે સત્તા અવેરિનો હોન્તુ, ખેમિનો હોન્તુ, સુખિનો હોન્તૂતિ – ઉદ્ધચ્ચે ન કમ્પતિ. સમાધિબલપરિભાવિતા હોતિ મેત્તાચેતોવિમુત્તિ.

સબ્બે સત્તા અવેરિનો હોન્તુ, ખેમિનો હોન્તુ, સુખિનો હોન્તૂતિ – અવિજ્જાય ન કમ્પતિ. પઞ્ઞાબલપરિભાવિતા હોતિ મેત્તાચેતોવિમુત્તિ.

ઇમાનિ પઞ્ચ બલાનિ મેત્તાય ચેતોવિમુત્તિયા આસેવના હોન્તિ. ઇમેહિ પઞ્ચહિ બલેહિ મેત્તાચેતોવિમુત્તિ આસેવીયતિ. ઇમાનિ પઞ્ચ બલાનિ મેત્તાય ચેતોવિમુત્તિયા ભાવના હોન્તિ. ઇમેહિ પઞ્ચહિ બલેહિ મેત્તાચેતોવિમુત્તિ ભાવીયતિ. ઇમાનિ પઞ્ચ બલાનિ મેત્તાય ચેતોવિમુત્તિયા બહુલીકતા હોન્તિ. ઇમેહિ પઞ્ચહિ બલેહિ મેત્તાચેતોવિમુત્તિ બહુલીકરીયતિ. ઇમાનિ પઞ્ચ બલાનિ મેત્તાય ચેતોવિમુત્તિયા અલઙ્કારા હોન્તિ. ઇમેહિ પઞ્ચહિ બલેહિ મેત્તાચેતોવિમુત્તિ સ્વાલઙ્કતા હોતિ. ઇમાનિ પઞ્ચ બલાનિ મેત્તાય ચેતોવિમુત્તિયા પરિક્ખારા હોન્તિ. ઇમેહિ પઞ્ચહિ બલેહિ મેત્તાચેતોવિમુત્તિ સુપરિક્ખતા હોતિ. ઇમાનિ પઞ્ચ બલાનિ મેત્તાય ચેતોવિમુત્તિયા પરિવારા હોન્તિ. ઇમેહિ પઞ્ચહિ બલેહિ મેત્તાચેતોવિમુત્તિ સુપરિવુતા હોતિ. ઇમાનિ પઞ્ચ બલાનિ મેત્તાય ચેતોવિમુત્તિયા આસેવના હોન્તિ, ભાવના હોન્તિ, બહુલીકતા હોન્તિ, અલઙ્કારા હોન્તિ, પરિક્ખારા હોન્તિ, પરિવારા હોન્તિ, પારિપૂરી હોન્તિ, સહગતા હોન્તિ, સહજાતા હોન્તિ, સંસટ્ઠા હોન્તિ, સમ્પયુત્તા હોન્તિ, પક્ખન્દના હોન્તિ, પસીદના હોન્તિ, સન્તિટ્ઠના હોન્તિ, વિમુચ્ચના હોન્તિ, ‘‘એતં સન્ત’’ન્તિ ફસ્સના હોન્તિ, યાનીકતા હોન્તિ, વત્થુકતા હોન્તિ, અનુટ્ઠિતા હોન્તિ, પરિચિતા હોન્તિ, સુસમારદ્ધા હોન્તિ, સુભાવિતા હોન્તિ, સ્વાધિટ્ઠિતા હોન્તિ, સુસમુગ્ગતા હોન્તિ, સુવિમુત્તા હોન્તિ નિબ્બત્તેન્તિ જોતેન્તિ પતાપેન્તિ.