૩. બોજ્ઝઙ્ગવારો

૨૫. સબ્બે સત્તા અવેરિનો હોન્તુ, ખેમિનો હોન્તુ, સુખિનો હોન્તૂતિ – સતિં ઉપટ્ઠાપેતિ. સતિસમ્બોજ્ઝઙ્ગપરિભાવિતા હોતિ મેત્તાચેતોવિમુત્તિ.

સબ્બે સત્તા અવેરિનો હોન્તુ, ખેમિનો હોન્તુ, સુખિનો હોન્તૂતિ – પઞ્ઞાય પવિચિનાતિ. ધમ્મવિચયસમ્બોજ્ઝઙ્ગપરિભાવિતા હોતિ મેત્તાચેતોવિમુત્તિ.

સબ્બે સત્તા અવેરિનો હોન્તુ, ખેમિનો હોન્તુ, સુખિનો હોન્તૂતિ – વીરિયં પગ્ગણ્હાતિ. વીરિયસમ્બોજ્ઝઙ્ગપરિભાવિતા હોતિ મેત્તાચેતોવિમુત્તિ.

સબ્બે સત્તા અવેરિનો હોન્તુ, ખેમિનો હોન્તુ, સુખિનો હોન્તૂતિ – પરિળાહં પટિપ્પસ્સમ્ભેતિ. પીતિસમ્બોજ્ઝઙ્ગપરિભાવિતા હોતિ મેત્તાચેતોવિમુત્તિ.

સબ્બે સત્તા અવેરિનો હોન્તુ, ખેમિનો હોન્તુ, સુખિનો હોન્તૂતિ – દુટ્ઠુલ્લં પટિપ્પસ્સમ્ભેતિ. પસ્સદ્ધિસમ્બોજ્ઝઙ્ગપરિભાવિતા હોતિ મેત્તાચેતોવિમુત્તિ.

સબ્બે સત્તા અવેરિનો હોન્તુ, ખેમિનો હોન્તુ, સુખિનો હોન્તૂતિ – ચિત્તં સમાદહતિ. સમાધિસમ્બોજ્ઝઙ્ગપરિભાવિતા હોતિ મેત્તાચેતોવિમુત્તિ.

સબ્બે સત્તા અવેરિનો હોન્તુ, ખેમિનો હોન્તુ, સુખિનો હોન્તૂતિ – ઞાણેન કિલેસે પટિસઙ્ખાતિ. ઉપેક્ખાસમ્બોજ્ઝઙ્ગપરિભાવિતા હોતિ મેત્તાચેતોવિમુત્તિ.

ઇમે સત્ત બોજ્ઝઙ્ગા મેત્તાય ચેતોવિમુત્તિયા આસેવના હોન્તિ. ઇમેહિ સત્તહિ બોજ્ઝઙ્ગેહિ મેત્તાચેતોવિમુત્તિ આસેવીયતિ. ઇમે સત્ત બોજ્ઝઙ્ગા મેત્તાય ચેતોવિમુત્તિયા ભાવના હોન્તિ. ઇમેહિ સત્તહિ બોજ્ઝઙ્ગેહિ મેત્તાચેતોવિમુત્તિ ભાવીયતિ. ઇમે સત્ત બોજ્ઝઙ્ગા મેત્તાય ચેતોવિમુત્તિયા બહુલીકતા હોન્તિ. ઇમેહિ સત્તહિ બોજ્ઝઙ્ગેહિ મેત્તાચેતોવિમુત્તિ બહુલીકરીયતિ. ઇમે સત્ત બોજ્ઝઙ્ગા મેત્તાય ચેતોવિમુત્તિયા અલઙ્કારા હોન્તિ. ઇમેહિ સત્તહિ બોજ્ઝઙ્ગેહિ મેત્તાચેતોવિમુત્તિ સ્વાલઙ્કતા હોતિ. ઇમે સત્ત બોજ્ઝઙ્ગા મેત્તાય ચેતોવિમુત્તિયા પરિક્ખારા હોન્તિ. ઇમેહિ સત્તહિ બોજ્ઝઙ્ગેહિ મેત્તાચેતોવિમુત્તિ સુપરિક્ખતા હોતિ. ઇમે સત્ત બોજ્ઝઙ્ગા મેત્તાય ચેતોવિમુત્તિયા પરિવારા હોન્તિ. ઇમેહિ સત્તહિ બોજ્ઝઙ્ગેહિ મેત્તાચેતોવિમુત્તિ સુપરિવુતા હોતિ. ઇમે સત્ત બોજ્ઝઙ્ગા મેત્તાય ચેતોવિમુત્તિયા આસેવના હોન્તિ, ભાવના હોન્તિ, બહુલીકતા હોન્તિ, અલઙ્કારા હોન્તિ, પરિક્ખારા હોન્તિ, પરિવારા હોન્તિ, પારિપૂરી હોન્તિ, સહગતા હોન્તિ, સહજાતા હોન્તિ, સંસટ્ઠા હોન્તિ, સમ્પયુત્તા હોન્તિ, પક્ખન્દના હોન્તિ, પસીદના હોન્તિ, સન્તિટ્ઠના હોન્તિ, વિમુચ્ચના હોન્તિ, ‘‘એતં સન્ત’’ન્તિ ફસ્સના હોન્તિ, યાનીકતા હોન્તિ, વત્થુકતા હોન્તિ, અનુટ્ઠિતા હોન્તિ, પરિચિતા હોન્તિ, સુસમારદ્ધા હોન્તિ, સુભાવિતા હોન્તિ, સ્વાધિટ્ઠિતા હોન્તિ, સુસમુગ્ગતા હોન્તિ, સુવિમુત્તા હોન્તિ, નિબ્બત્તેન્તિ જોતેન્તિ પતાપેન્તિ.