૬. ઞાણરાસિછક્કનિદ્દેસો

૧૮૩. કતમાનિ ચતુવીસતિ સમાધિવસેન ઞાણાનિ? દીઘં અસ્સાસવસેન ચિત્તસ્સ એકગ્ગતા અવિક્ખેપો સમાધિ, દીઘં પસ્સાસવસેન ચિત્તસ્સ એકગ્ગતા અવિક્ખેપો સમાધિ…પે… વિમોચયં ચિત્તં અસ્સાસવસેન ચિત્તસ્સ એકગ્ગતા અવિક્ખેપો સમાધિ, વિમોચયં ચિત્તં પસ્સાસવસેન ચિત્તસ્સ એકગ્ગતા અવિક્ખેપો સમાધિ. ઇમાનિ ચતુવીસતિ સમાધિવસેન ઞાણાનિ.

કતમાનિ દ્વેસત્તતિ વિપસ્સનાવસેન ઞાણાનિ? દીઘં અસ્સાસં અનિચ્ચતો અનુપસ્સનટ્ઠેન વિપસ્સના, દુક્ખતો અનુપસ્સનટ્ઠેન વિપસ્સના, અનત્તતો અનુપસ્સનટ્ઠેન વિપસ્સના, દીઘં પસ્સાસં અનિચ્ચતો અનુપસ્સનટ્ઠેન વિપસ્સના, દુક્ખતો અનુપસ્સનટ્ઠેન વિપસ્સના, અનત્તતો અનુપસ્સનટ્ઠેન વિપસ્સના…પે… વિમોચયં ચિત્તં અસ્સાસં, વિમોચયં ચિત્તં પસ્સાસં અનિચ્ચતો અનુપસ્સનટ્ઠેન વિપસ્સના, દુક્ખતો અનુપસ્સનટ્ઠેન વિપસ્સના, અનત્તતો અનુપસ્સનટ્ઠેન વિપસ્સના. ઇમાનિ દ્વેસત્તતિ વિપસ્સનાવસેન ઞાણાનિ.

કતમાનિ અટ્ઠ નિબ્બિદાઞાણાનિ? અનિચ્ચાનુપસ્સી અસ્સાસં યથાભૂતં જાનાતિ પસ્સતીતિ – નિબ્બિદાઞાણં, અનિચ્ચાનુપસ્સી પસ્સાસં યથાભૂતં જાનાતિ પસ્સતીતિ – નિબ્બિદાઞાણં…પે… પટિનિસ્સગ્ગાનુપસ્સી અસ્સાસં યથાભૂતં જાનાતિ પસ્સતીતિ – નિબ્બિદાઞાણં, પટિનિસ્સગ્ગાનુપસ્સી પસ્સાસં યથાભૂતં જાનાતિ પસ્સતીતિ – નિબ્બિદાઞાણં. ઇમાનિ અટ્ઠ નિબ્બિદાઞાણાનિ.

કતમાનિ અટ્ઠ નિબ્બિદાનુલોમે ઞાણાનિ? અનિચ્ચાનુપસ્સી અસ્સાસં ભયતુપટ્ઠાને પઞ્ઞા નિબ્બિદાનુલોમે ઞાણં, અનિચ્ચાનુપસ્સી પસ્સાસં ભયતુપટ્ઠાને પઞ્ઞા નિબ્બિદાનુલોમે ઞાણં…પે… પટિનિસ્સગ્ગાનુપસ્સી અસ્સાસં ભયતુપટ્ઠાને પઞ્ઞા નિબ્બિદાનુલોમે ઞાણં, પટિનિસ્સગ્ગાનુપસ્સી પસ્સાસં ભયતુપટ્ઠાને પઞ્ઞા નિબ્બિદાનુલોમે ઞાણં – ઇમાનિ અટ્ઠ નિબ્બિદાનુલોમે ઞાણાનિ.

કતમાનિ અટ્ઠ નિબ્બિદાપટિપ્પસ્સદ્ધિઞાણાનિ? અનિચ્ચાનુપસ્સી અસ્સાસં પટિસઙ્ખા સન્તિટ્ઠના પઞ્ઞા નિબ્બિદાપટિપ્પસ્સદ્ધિઞાણં, અનિચ્ચાનુપસ્સી પસ્સાસં પટિસઙ્ખા સન્તિટ્ઠના પઞ્ઞા નિબ્બિદાપટિપ્પસ્સદ્ધિઞાણં…પે… પટિનિસ્સગ્ગાનુપસ્સી અસ્સાસં પટિસઙ્ખા સન્તિટ્ઠના પઞ્ઞા નિબ્બિદાપટિપ્પસ્સદ્ધિઞાણં, પટિનિસ્સગ્ગાનુપસ્સી પસ્સાસં પટિસઙ્ખા સન્તિટ્ઠના પઞ્ઞા નિબ્બિદાપટિપ્પસ્સદ્ધિઞાણં – ઇમાનિ અટ્ઠ નિબ્બિદાપટિપ્પસ્સદ્ધિઞાણાનિ.

કતમાનિ એકવીસતિ વિમુત્તિસુખે ઞાણાનિ? સોતાપત્તિમગ્ગેન સક્કાયદિટ્ઠિયા પહીનત્તા સમુચ્છિન્નત્તા ઉપ્પજ્જતિ વિમુત્તિસુખે ઞાણં, વિચિકિચ્છાય પહીનત્તા સમુચ્છિન્નત્તા ઉપ્પજ્જતિ વિમુત્તિસુખે ઞાણં, સીલબ્બતપરામાસસ્સ…પે… દિટ્ઠાનુસયસ્સ, વિચિકિચ્છાનુસયસ્સ પહીનત્તા સમુચ્છિન્નત્તા ઉપ્પજ્જતિ વિમુત્તિસુખે ઞાણં, સકદાગામિમગ્ગેન ઓળારિકસ્સ, કામરાગસઞ્ઞોજનસ્સ…પે… પટિઘસઞ્ઞોજનસ્સ, ઓળારિકસ્સ કામરાગાનુસયસ્સ, પટિઘાનુસયસ્સ પહીનત્તા સમુચ્છિન્નત્તા ઉપ્પજ્જતિ વિમુત્તિસુખે ઞાણં, અનાગામિમગ્ગેન અનુસહગતસ્સ કામરાગસઞ્ઞોજનસ્સ…પે… પટિઘસઞ્ઞોજનસ્સ, અનુસહગતસ્સ કામરાગાનુસયસ્સ, પટિઘાનુસયસ્સ પહીનત્તા સમુચ્છિન્નત્તા ઉપ્પજ્જતિ વિમુત્તિસુખે ઞાણં, અરહત્તમગ્ગેન, રૂપરાગસ્સ…પે… અરૂપરાગસ્સ, માનસ્સ, ઉદ્ધચ્ચસ્સ, અવિજ્જાય, માનાનુસયસ્સ, ભવરાગાનુસયસ્સ, અવિજ્જાનુસયસ્સ પહીનત્તા સમુચ્છિન્નત્તા ઉપ્પજ્જતિ વિમુત્તિસુખે ઞાણં. ઇમાનિ એકવીસતિ વિમુત્તિસુખે ઞાણાનિ. સોળસવત્થુકં આનાપાનસ્સતિસમાધિં ભાવયતો સમધિકાનિ ઇમાનિ દ્વે ઞાણસતાનિ ઉપ્પજ્જન્તિ.

ઞાણરાસિછક્કનિદ્દેસો છટ્ઠો.

આનાપાનસ્સતિકથા [આનાપાનકથા (સ્યા. ક.)] નિટ્ઠિતા.