૪૨૪. આદિત્તજાતકં (૮)

૬૯. આદિત્તસ્મિં અગારસ્મિં, યં નીહરતિ ભાજનં;

તં તસ્સ હોતિ અત્થાય, નો ચ યં તત્થ ડય્હતિ.

૭૦. એવામાદીપિતો લોકો, જરાય મરણેન ચ;

નીહરેથેવ દાનેન, દિન્નં હોતિ સુનીહતં [સુનીભતં (સી. સ્યા. પી.), સુનિબ્ભતં (ક.)].

૭૧. યો ધમ્મલદ્ધસ્સ દદાતિ દાનં, ઉટ્ઠાનવીરિયાધિગતસ્સ જન્તુ;

અતિક્કમ્મ સો વેતરણિં [વેત્તરણિં (ક.)] યમસ્સ, દિબ્બાનિ ઠાનાનિ ઉપેતિ મચ્ચો.

૭૨. દાનઞ્ચ યુદ્ધઞ્ચ સમાનમાહુ, અપ્પાપિ સન્તા બહુકે જિનન્તિ;

અપ્પમ્પિ ચે સદ્દહાનો દદાતિ, તેનેવ સો હોતિ સુખી પરત્થ.

૭૩. વિચેય્ય દાનં સુગતપ્પસત્થં, યે દક્ખિણેય્યા ઇધ જીવલોકે;

એતેસુ દિન્નાનિ મહપ્ફલાનિ, બીજાનિ વુત્તાનિ યથા સુખેત્તે.

૭૪. યો પાણભૂતાનિ અહેઠયં ચરં, પરૂપવાદા ન કરોતિ પાપં;

ભીરું પસંસન્તિ ન તત્થ સૂરં, ભયા હિ સન્તો ન કરોન્તિ પાપં.

૭૫. હીનેન બ્રહ્મચરિયેન, ખત્તિયે ઉપપજ્જતિ;

મજ્ઝિમેન ચ દેવત્તં, ઉત્તમેન વિસુજ્ઝતિ.

૭૬. અદ્ધા હિ દાનં બહુધા પસત્થં, દાના ચ ખો ધમ્મપદંવ સેય્યો;

પુબ્બેવ હિ પુબ્બતરેવ સન્તો [પુબ્બે ચ હિ પુબ્બતરે ચ સન્તો (સં. નિ. ૧.૩૩)], નિબ્બાનમેવજ્ઝગમું સપઞ્ઞાતિ.

આદિત્તજાતકં અટ્ઠમં.