૪૨૫. અટ્ઠાનજાતકં (૯)

૭૭. ગઙ્ગા કુમુદિની સન્તા, સઙ્ખવણ્ણા ચ કોકિલા;

જમ્બુ તાલફલં દજ્જા, અથ નૂન તદા સિયા.

૭૮. યદા કચ્છપલોમાનં, પાવારો તિવિધો સિયા;

હેમન્તિકં પાવુરણં [પાપુરણં (સી. સ્યા. પી.)], અથ નૂન તદા સિયા.

૭૯. યદા મકસપાદાનં [દાઠાનં (સી. પી.)], અટ્ટાલો સુકતો સિયા;

દળ્હો ચ અવિકમ્પી ચ [અપ્પકમ્પી ચ (સી. પી.)], અથ નૂન તદા સિયા.

૮૦. યદા સસવિસાણાનં, નિસ્સેણી સુકતા સિયા;

સગ્ગસ્સારોહણત્થાય, અથ નૂન તદા સિયા.

૮૧. યદા નિસ્સેણિમારુય્હ, ચન્દં ખાદેય્યુ મૂસિકા;

રાહુઞ્ચ પરિપાતેય્યું [પરિબાહેય્યું (સ્યા.)], અથ નૂન તદા સિયા.

૮૨. યદા સુરાઘટં પિત્વા, મક્ખિકા ગણચારિણી;

અઙ્ગારે વાસં કપ્પેય્યું, અથ નૂન તદા સિયા.

૮૩. યદા બિમ્બોટ્ઠસમ્પન્નો, ગદ્રભો સુમુખો સિયા;

કુસલો નચ્ચગીતસ્સ, અથ નૂન તદા સિયા.

૮૪. યદા કાકા ઉલૂકા ચ, મન્તયેય્યું રહોગતા;

અઞ્ઞમઞ્ઞં પિહયેય્યું, અથ નૂન તદા સિયા.

૮૫. યદા મુળાલ [પુલસ (સી. પી.), પુલાસ (સ્યા.)] પત્તાનં, છત્તં થિરતરં સિયા;

વસ્સસ્સ પટિઘાતાય, અથ નૂન તદા સિયા.

૮૬. યદા કુલકો [કુલુઙ્કો (સી. પી.), કુલુકો (સ્યા.)] સકુણો, પબ્બતં ગન્ધમાદનં;

તુણ્ડેનાદાય ગચ્છેય્ય, અથ નૂન તદા સિયા.

૮૭. યદા સામુદ્દિકં નાવં, સ-યન્તં સ-વટાકરં [સપટાકારં (ક.)];

ચેટો આદાય ગચ્છેય્ય, અથ નૂન તદા સિયાતિ.

અટ્ઠાનજાતકં નવમં.