૪૨૩. ઇન્દ્રિયજાતકં (૭)

૬૦. યો ઇન્દ્રિયાનં કામેન, વસં નારદ ગચ્છતિ;

સો પરિચ્ચજ્જુભો લોકે, જીવન્તોવ વિસુસ્સતિ [જીવન્તોપિવિસુસ્સતિ (સ્યા.), જીવન્તો વાપિ સુસ્સતિ (ક.)].

૬૧. સુખસ્સાનન્તરં દુક્ખં, દુક્ખસ્સાનન્તરં સુખં;

સોસિ [સોપિ (સ્યા. પી. ક.)] પત્તો સુખા [સુખ (સ્યા.), સુખં (ક.)] દુક્ખં, પાટિકઙ્ખ વરં સુખં.

૬૨. કિચ્છકાલે કિચ્છસહો, યો કિચ્છં નાતિવત્તતિ;

સ કિચ્છન્તં સુખં ધીરો, યોગં સમધિગચ્છતિ.

૬૩. ન હેવ કામાન કામા, નાનત્થા નાત્થકારણા;

ન કતઞ્ચ નિરઙ્કત્વા, ધમ્મા ચવિતુમરહસિ.

૬૪. દક્ખં ગહપતી [ગહપતં (સી. સ્યા. પી.), ગહવતં (?)] સાધુ, સંવિભજ્જઞ્ચ ભોજનં;

અહાસો અત્થલાભેસુ, અત્થબ્યાપત્તિ અબ્યથો.

૬૫. એત્તાવતેતં પણ્ડિચ્ચં, અપિ સો [અસિતો (સી. સ્યા. પી.)] દવિલો [દેવલો (સી. પી.)] બ્રવિ;

ન યિતો કિઞ્ચિ પાપિયો, યો ઇન્દ્રિયાનં વસં વજે.

૬૬. અમિત્તાનંવ હત્થત્થં, સિવિ પપ્પોતિ મામિવ;

કમ્મં વિજ્જઞ્ચ દક્ખેય્યં, વિવાહં સીલમદ્દવં;

એતે ચ યસે હાપેત્વા, નિબ્બત્તો સેહિ કમ્મેહિ.

૬૭. સોહં સહસ્સજીનોવ અબન્ધુ અપરાયણો;

અરિયધમ્મા અપક્કન્તો, યથા પેતો તથેવહં.

૬૮. સુખકામે દુક્ખાપેત્વા, આપન્નોસ્મિ પદં ઇમં;

સો સુખં નાધિગચ્છામિ, ઠિતો [ચિતો (પી. સી. અટ્ઠ.)] ભાણુમતામિવાતિ.

ઇન્દ્રિયજાતકં સત્તમં.