૪૨૨. ચેતિયજાતકં (૬)

૪૫. ધમ્મો હવે હતો હન્તિ, નાહતો હન્તિ કિઞ્ચનં [કઞ્ચિનં (પી.)];

તસ્મા હિ ધમ્મં ન હને, મા ત્વં [તં (સ્યા. પી.)] ધમ્મો હતો હનિ.

૪૬. અલિકં ભાસમાનસ્સ, અપક્કમન્તિ દેવતા;

પૂતિકઞ્ચ મુખં વાતિ, સકટ્ઠાના ચ ધંસતિ;

યો જાનં પુચ્છિતો પઞ્હં, અઞ્ઞથા નં વિયાકરે.

૪૭. સચે હિ સચ્ચં ભણસિ, હોહિ રાજ યથા પુરે;

મુસા ચે ભાસસે રાજ, ભૂમિયં તિટ્ઠ ચેતિય.

૪૮. અકાલે વસ્સતી તસ્સ, કાલે તસ્સ ન વસ્સતિ;

યો જાનં પુચ્છિતો પઞ્હં, અઞ્ઞથા નં વિયાકરે.

૪૯. સચે હિ સચ્ચં ભણસિ, હોહિ રાજ યથા પુરે;

મુસા ચે ભાસસે રાજ, ભૂમિં પવિસ ચેતિય.

૫૦. જિવ્હા તસ્સ દ્વિધા હોતિ, ઉરગસ્સેવ દિસમ્પતિ;

યો જાનં પુચ્છિતો પઞ્હં, અઞ્ઞથા નં વિયાકરે.

૫૧. સચે હિ સચ્ચં ભણસિ, હોહિ રાજ યથા પુરે;

મુસા ચે ભાસસે રાજ, ભિય્યો પવિસ ચેતિય.

૫૨. જિવ્હા તસ્સ ન ભવતિ, મચ્છસ્સેવ દિસમ્પતિ;

યો જાનં પુચ્છિતો પઞ્હં, અઞ્ઞથા નં વિયાકરે.

૫૩. સચે હિ સચ્ચં ભણસિ, હોહિ રાજ યથા પુરે;

મુસા ચે ભાસસે રાજ, ભિય્યો પવિસ ચેતિય.

૫૪. થિયોવ તસ્સ જાયન્તિ [થિયો તસ્સ પજાયન્તિ (ક.)], ન પુમા જાયરે કુલે;

યો જાનં પુચ્છિતો પઞ્હં, અઞ્ઞથા નં વિયાકરે.

૫૫. સચે હિ સચ્ચં ભણસિ, હોહિ રાજ યથા પુરે;

મુસા ચે ભાસસે રાજ, ભિય્યો પવિસ ચેતિય.

૫૬. પુત્તા તસ્સ ન ભવન્તિ, પક્કમન્તિ દિસોદિસં;

યો જાનં પુચ્છિતો પઞ્હં, અઞ્ઞથા નં વિયાકરે.

૫૭. સચે હિ સચ્ચં ભણસિ, હોહિ રાજ યથા પુરે;

મુસા ચે ભાસસે રાજ, ભિય્યો પવિસ ચેતિય.

૫૮. સ રાજા ઇસિના સત્તો, અન્તલિક્ખચરો પુરે;

પાવેક્ખિ પથવિં ચેચ્ચો, હીનત્તો પત્વ પરિયાયં [અત્તપરિયાયં (સી. સ્યા.), પત્તપરિયાયં (ક. સી. નિય્ય)].

૫૯. તસ્મા હિ છન્દાગમનં, નપ્પસંસન્તિ પણ્ડિતા;

અદુટ્ઠચિત્તો ભાસેય્ય, ગિરં સચ્ચૂપસંહિતન્તિ.

ચેતિયજાતકં છટ્ઠં.