૪૨૧. ગઙ્ગમાલજાતકં (૫)

૩૬. અઙ્ગારજાતા પથવી, કુક્કુળાનુગતા મહી;

અથ ગાયસિ વત્તાનિ [વત્થાનિ (ક.)], ન તં તપતિ આતપો.

૩૭. ઉદ્ધં તપતિ આદિચ્ચો, અધો તપતિ વાલુકા;

અથ ગાયસિ વત્તાનિ [વત્થાનિ (ક.)], ન તં તપતિ આતપો.

૩૮. ન મં તપતિ આતપો, આતપા [આતપ્પા (સી. સ્યા. પી.)] તપયન્તિ મં;

અત્થા હિ વિવિધા રાજ, તે તપન્તિ ન આતપો.

૩૯. અદ્દસં કામ તે મૂલં, સઙ્કપ્પા કામ જાયસિ;

ન તં સઙ્કપ્પયિસ્સામિ, એવં કામ ન હેહિસિ.

૪૦. અપ્પાપિ કામા ન અલં, બહૂહિપિ ન તપ્પતિ;

અહહા બાલલપના, પરિવજ્જેથ [પટિવિજ્ઝેથ (પી. સી. અટ્ઠ.)] જગ્ગતો.

૪૧. અપ્પસ્સ કમ્મસ્સ ફલં મમેદં, ઉદયો અજ્ઝાગમા મહત્તપત્તં;

સુલદ્ધલાભો વત માણવસ્સ, યો પબ્બજી કામરાગં પહાય.

૪૨. તપસા પજહન્તિ પાપકમ્મં, તપસા ન્હાપિતકુમ્ભકારભાવં;

તપસા અભિભુય્ય ગઙ્ગમાલ, નામેનાલપસજ્જ બ્રહ્મદત્તં.

૪૩. સન્દિટ્ઠિકમેવ ‘‘અમ્મ’’ પસ્સથ, ખન્તીસોરચ્ચસ્સ અયં [યો (સ્યા. પી. ક.)] વિપાકો;

યો [સો (સ્યા. ક.)] સબ્બજનસ્સ વન્દિતોહુ, તં વન્દામ સરાજિકા સમચ્ચા.

૪૪. મા કિઞ્ચિ અવચુત્થ ગઙ્ગમાલં, મુનિનં મોનપથેસુ સિક્ખમાનં;

એસો હિ અતરિ અણ્ણવં, યં તરિત્વા ચરન્તિ વીતસોકાતિ.

ગઙ્ગમાલજાતકં પઞ્ચમં.