૪૨૦. સુમઙ્ગલજાતકં (૪)

૨૭. ભુસમ્હિ [ભુસમ્પિ (ક.), ભુસં હિ (સી. નિય્ય)] કુદ્ધોતિ અવેક્ખિયાન, ન તાવ દણ્ડં પણયેય્ય ઇસ્સરો;

અટ્ઠાનસો અપ્પતિરૂપમત્તનો, પરસ્સ દુક્ખાનિ ભુસં ઉદીરયે.

૨૮. યતો ચ જાનેય્ય પસાદમત્તનો, અત્થં નિયુઞ્જેય્ય પરસ્સ દુક્કટં;

તદાયમત્થોતિ સયં અવેક્ખિય, અથસ્સ દણ્ડં સદિસં નિવેસયે.

૨૯. ન ચાપિ ઝાપેતિ પરં ન અત્તનં, અમુચ્છિતો યો નયતે નયાનયં;

યો દણ્ડધારો ભવતીધ ઇસ્સરો, સ વણ્ણગુત્તો સિરિયા ન ધંસતિ.

૩૦. યે ખત્તિયા સે અનિસમ્મકારિનો, પણેન્તિ દણ્ડં સહસા પમુચ્છિતા;

અવણ્ણસંયુતા [યુત્તાવ (ક.)] જહન્તિ જીવિતં, ઇતો વિમુત્તાપિ ચ યન્તિ દુગ્ગતિં.

૩૧. ધમ્મે ચ યે અરિયપ્પવેદિતે રતા, અનુત્તરા તે વચસા મનસા કમ્મુના ચ;

તે સન્તિસોરચ્ચસમાધિસણ્ઠિતા, વજન્તિ લોકં દુભયં તથાવિધા.

૩૨. રાજાહમસ્મિ નરપમદાનમિસ્સરો, સચેપિ કુજ્ઝામિ ઠપેમિ અત્તનં;

નિસેધયન્તો જનતં તથાવિધં, પણેમિ દણ્ડં અનુકમ્પ યોનિસો.

૩૩. સિરી ચ લક્ખી ચ તવેવ ખત્તિય, જનાધિપ મા વિજહિ કુદાચનં;

અક્કોધનો નિચ્ચપસન્નચિત્તો, અનીઘો તુવં વસ્સસતાનિ પાલય.

૩૪. ગુણેહિ એતેહિ ઉપેત ખત્તિય, ઠિતમરિયવત્તી [વત્તિ (સી.), વુત્તિ (ક.)] સુવચો અકોધનો;

સુખી અનુપ્પીળ પસાસમેદિનિં [અનુપ્પીળં સહસમેદનિં (ક.)], ઇતો વિમુત્તોપિ ચ યાહિ સુગ્ગતિં.

૩૫. એવં સુનીતેન [સુવિનીતેન (પી.)] સુભાસિતેન, ધમ્મેન ઞાયેન ઉપાયસો નયં;

નિબ્બાપયે સઙ્ખુભિતં મહાજનં, મહાવ મેઘો સલિલેન મેદિનિન્તિ [મેદનિન્તિ (સ્યા. ક.)].

સુમઙ્ગલજાતકં ચતુત્થં.