૪૧૭. કચ્ચાનિજાતકં (૧)

૧. ઓદાતવત્થા સુચિ અલ્લકેસા, કચ્ચાનિ કિં કુમ્ભિમધિસ્સયિત્વા [કુમ્ભિમપસ્સયિત્વા (પી.)];

પિટ્ઠા તિલા ધોવસિ તણ્ડુલાનિ, તિલોદનો હેહિતિ કિસ્સ હેતુ.

૨. ન ખો અયં બ્રાહ્મણ ભોજનત્થા [ભોજનત્થં (સ્યા.)], તિલોદનો હેહિતિ સાધુપક્કો;

ધમ્મો મતો તસ્સ પહુત્તમજ્જ [પહૂનમજ્જ (સ્યા.), પહૂતમજ્જ (સી.), બહૂતમજ્જા (પી.)], અહં કરિસ્સામિ સુસાનમજ્ઝે.

૩. અનુવિચ્ચ કચ્ચાનિ કરોહિ કિચ્ચં, ધમ્મો મતો કો નુ તવેવ [તવેત (સી. સ્યા. પી.)] સંસિ;

સહસ્સનેત્તો અતુલાનુભાવો, ન મિય્યતી ધમ્મવરો કદાચિ.

૪. દળ્હપ્પમાણં મમ એત્થ બ્રહ્મે, ધમ્મો મતો નત્થિ મમેત્થ કઙ્ખા;

યે યેવ દાનિ પાપા ભવન્તિ, તે તેવ દાનિ સુખિતા ભવન્તિ.

૫. સુણિસા હિ મય્હં વઞ્ઝા અહોસિ, સા મં વધિત્વાન વિજાયિ પુત્તં;

સા દાનિ સબ્બસ્સ કુલસ્સ ઇસ્સરા, અહં પનમ્હિ [વસામિ (સ્યા.)] અપવિદ્ધા એકિકા.

૬. જીવામિ વોહં ન મતોહમસ્મિ [નાહં મતોસ્મિ (સી. પી.)], તવેવ અત્થાય ઇધાગતોસ્મિ;

યા તં વધિત્વાન વિજાયિ પુત્તં, સહાવ પુત્તેન કરોમિ ભસ્મં.

૭. એવઞ્ચ [એતઞ્ચ (સી. પી.)] તે રુચ્ચતિ દેવરાજ, મમેવ અત્થાય ઇધાગતોસિ;

અહઞ્ચ પુત્તો સુણિસા ચ નત્તા, સમ્મોદમાના ઘરમાવસેમ.

૮. એવઞ્ચ તે રુચ્ચતિ કાતિયાનિ, હતાપિ સન્તા ન જહાસિ ધમ્મં;

તુવઞ્ચ [ત્વઞ્ચ (પી. ક.)] પુત્તો સુણિસા ચ નત્તા, સમ્મોદમાના ઘરમાવસેથ.

૯. સા કાતિયાની સુણિસાય સદ્ધિં, સમ્મોદમાના ઘરમાવસિત્થ;

પુત્તો ચ નત્તા ચ ઉપટ્ઠહિંસુ, દેવાનમિન્દેન અધિગ્ગહીતાતિ.

કચ્ચાનિજાતકં પઠમં.