૪૧૮. અટ્ઠસદ્દજાતકં (૨)

૧૦. ઇદં પુરે નિન્નમાહુ, બહુમચ્છં મહોદકં;

આવાસો બકરાજસ્સ, પેત્તિકં ભવનં મમ;

ત્યજ્જ ભેકેન [ભિઙ્ગેન (ક.)] યાપેમ, ઓકં ન વજહામસે [ઓકન્તં ન જહામસે (ક.)].

૧૧. કો દુતિયં અસીલિસ્સ, બન્ધરસ્સક્ખિ ભેચ્છતિ [ભેજ્જતિ (સી. સ્યા. પી.), ભિન્દતિ (ક.)];

કો મે પુત્તે કુલાવકં, મઞ્ચ સોત્થિં કરિસ્સતિ.

૧૨. સબ્બા પરિક્ખયા ફેગ્ગુ, યાવ તસ્સા ગતી અહુ;

ખીણભક્ખો મહારાજ, સારે ન રમતી ઘુણો.

૧૩. સા નૂનાહં ઇતો ગન્ત્વા, રઞ્ઞો મુત્તા નિવેસના;

અત્તાનં રમયિસ્સામિ, દુમસાખનિકેતિની.

૧૪. સો નૂનાહં ઇતો ગન્ત્વા, રઞ્ઞો મુત્તો નિવેસના;

અગ્ગોદકાનિ પિસ્સામિ, યૂથસ્સ પુરતો વજં.

૧૫. તં મં કામેહિ સમ્મત્તં, રત્તં કામેસુ મુચ્છિતં;

આનયી ભરતો [વનતો (ક.)] લુદ્દો, બાહિકો ભદ્દમત્થુ તે.

૧૬. અન્ધકારતિમિસાયં, તુઙ્ગે ઉપરિપબ્બતે;

સા મં સણ્હેન મુદુના, મા પાદં ખલિ [ખણિ (સી. સ્યા. પી.)] યસ્મનિ.

૧૭. અસંસયં જાતિખયન્તદસ્સી, ન ગબ્ભસેય્યં પુનરાવજિસ્સં;

અયમન્તિમા પચ્છિમા ગબ્ભસેય્યા [અયં હિ મે અન્તિમા ગબ્ભસેય્યા (સી. પી.)], ખીણો મે સંસારો પુનબ્ભવાયાતિ.

અટ્ઠસદ્દજાતકં દુતિયં.