૪૧૦. સોમદત્તજાતકં (૭-૨-૫)

૧૦૫. યો મં પુરે પચ્ચુડ્ડેતિ [પચ્ચુદેતિ (સી. સ્યા. પી.), પચ્ચુટ્ઠેતિ (ક.)], અરઞ્ઞે દૂરમાયતો;

સો ન દિસ્સતિ માતઙ્ગો, સોમદત્તો કુહિં ગતો.

૧૦૬. અયં વા સો મતો સેતિ, અલ્લસિઙ્ગંવ વચ્છિતો [અલ્લપિઙ્કવ છિજ્જિતો (સી. પી.), અલ્લપીતંવ વિચ્છિતો (સ્યા.)];

ભુમ્યા નિપતિતો સેતિ, અમરા વત કુઞ્જરો.

૧૦૭. અનગારિયુપેતસ્સ, વિપ્પમુત્તસ્સ તે સતો;

સમણસ્સ ન તં સાધુ, યં પેતમનુસોચસિ.

૧૦૮. સંવાસેન હવે સક્ક, મનુસ્સસ્સ મિગસ્સ વા;

હદયે જાયતે પેમં, તં ન સક્કા અસોચિતું.

૧૦૯. મતં મરિસ્સં રોદન્તિ, યે રુદન્તિ લપન્તિ ચ;

તસ્મા ત્વં ઇસિ મા રોદિ, રોદિતં મોઘમાહુ સન્તો.

૧૧૦. કન્દિતેન હવે બ્રહ્મે, મતો પેતો સમુટ્ઠહે;

સબ્બે સઙ્ગમ્મ રોદામ, અઞ્ઞમઞ્ઞસ્સ ઞાતકે.

૧૧૧. આદિત્તં વત મં સન્તં, ઘતસિત્તંવ પાવકં;

વારિના વિય ઓસિઞ્ચં, સબ્બં નિબ્બાપયે દરં.

૧૧૨. અબ્બહી વત મે સલ્લં, યમાસિ હદયસ્સિતં;

યો મે સોકપરેતસ્સ, પુત્તસોકં અપાનુદિ.

૧૧૩. સોહં અબ્બૂળ્હસલ્લોસ્મિ, વીતસોકો અનાવિલો;

ન સોચામિ ન રોદામિ, તવ સુત્વાન વાસવાતિ.

સોમદત્તજાતકં પઞ્ચમં.