૩૯૫. પારાવતજાતકં (૬-૨-૧૦)

૧૩૪. ચિરસ્સં વત પસ્સામિ, સહાયં મણિધારિનં;

સુકતા [સુકતાય (સી. પી.)] મસ્સુકુત્તિયા, સોભતે વત મે સખા.

૧૩૫. પરૂળ્હકચ્છનખલોમો, અહં કમ્મેસુ બ્યાવટો;

ચિરસ્સં ન્હાપિતં લદ્ધા, લોમં તં અજ્જં હારયિં [અપહારયિં (સી. પી.)].

૧૩૬. યં નુ લોમં અહારેસિ, દુલ્લભં લદ્ધ કપ્પકં;

અથ કિઞ્ચરહિ તે સમ્મ, કણ્ઠે કિણિકિણાયતિ [ઇદં કણ્ઠે કિણાયતિ (ક.), કણ્ઠે કિંનિકિલાયતિ (સ્યા.)].

૧૩૭. મનુસ્સસુખુમાલાનં, મણિ કણ્ઠેસુ લમ્બતિ;

તેસાહં અનુસિક્ખામિ, મા ત્વં મઞ્ઞિ દવા કતં.

૧૩૮. સચેપિમં પિહયસિ, મસ્સુકુત્તિં સુકારિતં;

કારયિસ્સામિ તે સમ્મ, મણિઞ્ચાપિ દદામિ તે.

૧૩૯. ત્વઞ્ઞેવ મણિના છન્નો, સુકતાય ચ મસ્સુયા;

આમન્ત ખો તં ગચ્છામિ, પિયં મે તવ દસ્સનન્તિ.

પારાવતજાતકં [કાકજાતકં (સી. પી.), મણિજાતકં (સ્યા.)] દસમં.

ખરપુત્તવગ્ગો [સેનકવગ્ગો (સી. પી.), ખુરપુત્તવગ્ગો (સ્યા.), સૂચિવગ્ગો (ક.)] દુતિયો.

તસ્સુદ્દાનં –

અથ પસ્સ સસૂચિ ચ તુણ્ડિલકો, મિગ મય્હકપઞ્ચમપક્ખિવરો;

અથ પઞ્જલિ વારિજ મેજ્ઝ પુન, અથ વટ્ટ કપોતવરેન દસાતિ.

અથ વગ્ગુદ્દાનં –

અથ વગ્ગં પકિત્તિસ્સં, છનિપાતં વરુત્તમે;

અવારિયા ચ ખરો ચ [સેનક (સી.), સૂચિ ચ (સ્યા. ક.)], દ્વે ચ વુત્તા સુબ્યઞ્જનાતિ.

છક્કનિપાતં નિટ્ઠિતં.