૨. ખરપુત્તવગ્ગો

૩૮૬. ખરપુત્તજાતકં (૬-૨-૧)

૭૬. સચ્ચં કિરેવમાહંસુ, વસ્તં [ભસ્તં (સી. પી.), કલકં (સ્યા.), ગરં (ક.)] બાલોતિ પણ્ડિતા;

પસ્સ બાલો રહોકમ્મં, આવિકુબ્બં ન બુજ્ઝતિ.

૭૭. ત્વં ખોપિ [ત્વં નુ ખો (સી. સ્યા.), ત્વઞ્ચ ખો (પી.)] સમ્મ બાલોસિ, ખરપુત્ત વિજાનહિ;

રજ્જુયા હિ [રજ્જુયાસિ (પી.)] પરિક્ખિત્તો, વઙ્કોટ્ઠો ઓહિતોમુખો.

૭૮. અપરમ્પિ સમ્મ તે બાલ્યં [અયમ્પિ સમ્મ તે બાલો (ક.)], યો મુત્તો ન પલાયસિ;

સો ચ બાલતરો સમ્મ, યં ત્વં વહસિ સેનકં.

૭૯. યં નુ સમ્મ અહં બાલો, અજરાજ વિજાનહિ;

અથ કેન સેનકો બાલો, તં મે અક્ખાહિ પુચ્છિતો.

૮૦. ઉત્તમત્થં લભિત્વાન, ભરિયાય યો પદસ્સતિ [ભયિયા યો પદસ્સતિ (પી.), ભયિયા ન ભવિસ્સતિ (ક.)];

તેન જહિસ્સતત્તાનં, સા ચેવસ્સ ન હેસ્સતિ.

૮૧. ન વે પિયમ્મેતિ [ન પિયમેતિ (ક.), ન પિયમેદન્તિ (કત્થચિ)] જનિન્દ તાદિસો, અત્તં નિરંકત્વા પિયાનિ સેવતિ [સેવયે (?)];

અત્તાવ સેય્યો પરમા ચ સેય્યો, લબ્ભા પિયા ઓચિતત્થેન પચ્છાતિ.

ખરપુત્તજાતકં પઠમં.

૩૮૭. સૂચિજાતકં (૬-૨-૨)

૮૨. અકક્કસં અફરુસં, ખરધોતં સુપાસિયં;

સુખુમં તિખિણગ્ગઞ્ચ, કો સૂચિં કેતુમિચ્છતિ.

૮૩. સુમજ્જઞ્ચ સુપાસઞ્ચ, અનુપુબ્બં [અનુપુબ્બ (સી. સ્યા.)] સુવટ્ટિતં;

ઘનઘાતિમં પટિથદ્ધં, કો સૂચિં કેતુમિચ્છતિ.

૮૪. ઇતો દાનિ પતાયન્તિ, સૂચિયો બળિસાનિ ચ;

કોયં કમ્મારગામસ્મિં, સૂચિં વિક્કેતુમિચ્છતિ.

૮૫. ઇતો સત્થાનિ ગચ્છન્તિ, કમ્મન્તા વિવિધા પુથૂ;

કોયં કમ્મારગામસ્મિં, સૂચિં વિક્કેતુમિચ્છતિ [મરહતિ (સી. સ્યા. પી.)].

૮૬. સૂચિં કમ્મારગામસ્મિં, વિક્કેતબ્બા પજાનતા;

આચરિયાવ જાનન્તિ [આચરિયા સઞ્જાનન્તિ (ક.), આચરિયા પજાનન્તિ (સ્યા.), આચરિયાવ સઞ્જાનન્તિ (પી.)], કમ્મં સુકતદુક્કટં [દુક્કતં (સી. પી.)].

૮૭. ઇમં ચે [ઇમઞ્ચ (સી. સ્યા. પી.)] તે પિતા ભદ્દે, સૂચિં જઞ્ઞા મયા કતં;

તયા ચ મં નિમન્તેય્ય, યઞ્ચત્થઞ્ઞં ઘરે ધનન્તિ.

સૂચિજાતકં દુતિયં.

૩૮૮. તુણ્ડિલજાતકં (૬-૨-૩)

૮૮. નવછન્નકે [નવછન્દકે (સી. પી.), નવચ્છદ્દકે (સ્યા.)] દાનિ [દોણિ (ક.), દાનં, દાને (કત્થચિ)] દિય્યતિ, પુણ્ણાયં દોણિ સુવામિની ઠિતા;

બહુકે જને પાસપાણિકે, નો ચ ખો મે પટિભાતિ ભુઞ્જિતું.

૮૯. તસસિ ભમસિ લેણમિચ્છસિ, અત્તાણોસિ કુહિં ગમિસ્સસિ;

અપ્પોસ્સુક્કો ભુઞ્જ તુણ્ડિલ, મંસત્થાય હિ પોસિતામ્હસે [પોસિયામસે (સી. સ્યા. પી.)].

૯૦. ઓગહ રહદં અકદ્દમં, સબ્બં સેદમલં પવાહય;

ગણ્હાહિ નવં વિલેપનં, યસ્સ ગન્ધો ન કદાચિ છિજ્જતિ.

૯૧. કતમો રહદો અકદ્દમો, કિંસુ સેદમલન્તિ વુચ્ચતિ;

કતમઞ્ચ નવં વિલેપનં, યસ્સ ગન્ધો ન કદાચિ છિજ્જતિ.

૯૨. ધમ્મો રહદો અકદ્દમો, પાપં સેદમલન્તિ વુચ્ચતિ;

સીલઞ્ચ નવં વિલેપનં, તસ્સ ગન્ધો ન કદાચિ છિજ્જતિ.

૯૩. નન્દન્તિ સરીરઘાતિનો, ન ચ નન્દન્તિ સરીરધારિનો;

પુણ્ણાય ચ પુણ્ણમાસિયા, રમમાનાવ જહન્તિ જીવિતન્તિ.

તુણ્ડિલજાતકં તતિયં.

૩૮૯. સુવણ્ણકક્કટજાતકં (૬-૨-૪)

૯૪. સિઙ્ગીમિગો આયતચક્ખુનેત્તો, અટ્ઠિત્તચો વારિસયો અલોમો;

તેનાભિભૂતો કપણં રુદામિ, હરે સખા કિસ્સ નુ મં જહાસિ.

૯૫. સો પસ્સસન્તો મહતા ફણેન, ભુજઙ્ગમો કક્કટમજ્ઝપત્તો;

સખા સખારં પરિતાયમાનો, ભુજઙ્ગમં કક્કટકો ગહેસિ.

૯૬. ન વાયસં નો પન કણ્હસપ્પં, ઘાસત્થિકો કક્કટકો અદેય્ય;

પુચ્છામિ તં આયતચક્ખુનેત્ત, અથ કિસ્સ હેતુમ્હ ઉભો ગહીતા.

૯૭. અયં પુરિસો મમ અત્થકામો, યો મં ગહેત્વાન દકાય નેતિ;

તસ્મિં મતે દુક્ખમનપ્પકં મે, અહઞ્ચ એસો ચ ઉભો ન હોમ.

૯૮. મમઞ્ચ દિસ્વાન પવદ્ધકાયં, સબ્બો જનો હિંસિતુમેવ મિચ્છે;

સાદુઞ્ચ થૂલઞ્ચ મુદુઞ્ચ મંસં, કાકાપિ મં દિસ્વાન [દિસ્વ (સી. પી.)] વિહેઠયેય્યું.

૯૯. સચેતસ્સ હેતુમ્હ ઉભો ગહીતા, ઉટ્ઠાતુ પોસો વિસમાવમામિ [વિસમાચમામિ (સી. પી. ક.)];

મમઞ્ચ કાકઞ્ચ પમુઞ્ચ ખિપ્પં, પુરે વિસં ગાળ્હમુપેતિ મચ્ચં.

૧૦૦. સપ્પં પમોક્ખામિ ન તાવ કાકં, પટિબન્ધકો [પટિબદ્ધકો (સી. પી.)] હોહિતિ [હોતિ હિ (સ્યા.)] તાવ કાકો;

પુરિસઞ્ચ દિસ્વાન સુખિં અરોગં, કાકં પમોક્ખામિ યથેવ સપ્પં.

૧૦૧. કાકો તદા દેવદત્તો અહોસિ, મારો પન કણ્હસપ્પો અહોસિ;

આનન્દભદ્દો કક્કટકો અહોસિ, અહં તદા બ્રાહ્મણો હોમિ સત્થાતિ [તત્થાતિ (સી. પી.)].

સુવણ્ણકક્કટજાતકં ચતુત્થં.

૩૯૦. મય્હકજાતકં (૬-૨-૫)

૧૦૨. સકુણો મય્હકો નામ, ગિરિસાનુદરીચરો;

પક્કં પિપ્ફલિમારુય્હ, મય્હં મય્હન્તિ કન્દતિ.

૧૦૩. તસ્સેવં વિલપન્તસ્સ, દિજસઙ્ઘા સમાગતા;

ભુત્વાન પિપ્ફલિં યન્તિ, વિલપત્વેવ સો દિજો.

૧૦૪. એવમેવ ઇધેકચ્ચો, સઙ્ઘરિત્વા બહું ધનં;

નેવત્તનો ન ઞાતીનં, યથોધિં પટિપજ્જતિ.

૧૦૫. ન સો અચ્છાદનં ભત્તં, ન માલં ન વિલેપનં;

અનુભોતિ [નાનુભોતિ (સ્યા. ક.)] સકિં કિઞ્ચિ, ન સઙ્ગણ્હાતિ ઞાતકે.

૧૦૬. તસ્સેવં વિલપન્તસ્સ, મય્હં મય્હન્તિ રક્ખતો;

રાજાનો અથ વા ચોરા, દાયદા યે વ [યે ચ (સ્યા. ક.)] અપ્પિયા;

ધનમાદાય ગચ્છન્તિ, વિલપત્વેવ સો નરો.

૧૦૭. ધીરો [ધીરો ચ (સી.)] ભોગે અધિગમ્મ, સઙ્ગણ્હાતિ ચ ઞાતકે;

તેન સો કિત્તિં પપ્પોતિ, પેચ્ચ સગ્ગે પમોદતીતિ [સગ્ગે ચ મોદતીતિ (સી. પી.)].

મય્હકજાતકં પઞ્ચમં.

૩૯૧. વિજ્જાધરજાતકં (૬-૨-૬)

૧૦૮. દુબ્બણ્ણરૂપં તુવમરિયવણ્ણી, પુરક્ખત્વા [પુરક્ખિત્વા (સ્યા. ક.)] પઞ્જલિકો નમસ્સસિ;

સેય્યો નુ તે સો ઉદવા [ઉદાહુ (સ્યા. ક.)] સરિક્ખો, નામં પરસ્સત્તનો ચાપિ બ્રૂહિ.

૧૦૯. ન નામગોત્તં ગણ્હન્તિ રાજ, સમ્મગ્ગતાનુજ્જુગતાન [સમગ્ગતાનુજ્જુગતાન (સ્યા.), સમુગ્ગતાનુજ્જુગતાન (ક.)] દેવા;

અહઞ્ચ તે નામધેય્યં વદામિ, સક્કોહમસ્મી તિદસાનમિન્દો.

૧૧૦. યો દિસ્વા ભિક્ખું ચરણૂપપન્નં, પુરક્ખત્વા પઞ્જલિકો નમસ્સતિ;

પુચ્છામિ તં દેવરાજેતમત્થં, ઇતો ચુતો કિં લભતે સુખં સો.

૧૧૧. યો દિસ્વા ભિક્ખું ચરણૂપપન્નં, પુરક્ખત્વા પઞ્જલિકો નમસ્સતિ;

દિટ્ઠેવ ધમ્મે લભતે પસંસં, સગ્ગઞ્ચ સો યાતિ સરીરભેદા.

૧૧૨. લક્ખી વત મે ઉદપાદિ અજ્જ, યં વાસવં ભૂતપતિદ્દસામ;

ભિક્ખુઞ્ચ દિસ્વાન તુવઞ્ચ સક્ક, કાહામિ પુઞ્ઞાનિ અનપ્પકાનિ.

૧૧૩. અદ્ધા હવે સેવિતબ્બા સપઞ્ઞા, બહુસ્સુતા યે બહુઠાનચિન્તિનો;

ભિક્ખુઞ્ચ દિસ્વાન મમઞ્ચ રાજ, કરોહિ પુઞ્ઞાનિ અનપ્પકાનિ.

૧૧૪. અક્કોધનો નિચ્ચપસન્નચિત્તો, સબ્બાતિથીયાચયોગો ભવિત્વા;

નિહચ્ચ માનં અભિવાદયિસ્સં, સુત્વાન દેવિન્દ સુભાસિતાનીતિ.

વિજ્જાધર [ધજવિહેઠક (સી. પી.), પબ્બજિતવિહેઠક (સ્યા.)] જાતકં છટ્ઠં.

૩૯૨. સિઙ્ઘપુપ્ફજાતકં (૬-૨-૭)

૧૧૫. યમેતં [યમેકં (પી.)] વારિજં પુપ્ફં, અદિન્નં ઉપસિઙ્ઘસિ;

એકઙ્ગમેતં થેય્યાનં, ગન્ધથેનોસિ મારિસ.

૧૧૬. ન હરામિ ન ભઞ્જામિ, આરા સિઙ્ઘામિ વારિજં;

અથ કેન નુ વણ્ણેન, ગન્ધથેનોતિ વુચ્ચતિ.

૧૧૭. યોયં ભિસાનિ ખણતિ, પુણ્ડરીકાનિ ભઞ્જતિ;

એવં આકિણ્ણકમ્મન્તો, કસ્મા એસો ન વુચ્ચતિ.

૧૧૮. આકિણ્ણલુદ્દો પુરિસો, ધાતિચેલંવ મક્ખિતો;

તસ્મિં મે વચનં નત્થિ, તઞ્ચારહામિ વત્તવે.

૧૧૯. અનઙ્ગણસ્સ પોસસ્સ, નિચ્ચં સુચિગવેસિનો;

વાલગ્ગમત્તં પાપસ્સ, અબ્ભામત્તંવ ખાયતિ.

૧૨૦. અદ્ધા મં યક્ખ જાનાસિ, અથો મં અનુકમ્પસિ;

પુનપિ યક્ખ વજ્જાસિ, યદા પસ્સસિ એદિસં.

૧૨૧. નેવ તં ઉપજીવામિ, નપિ તે ભતકામ્હસે [ભતકમ્હસે (સી. પી.), ભતિકમ્હસે (સ્યા.)];

ત્વમેવ ભિક્ખુ જાનેય્ય, યેન ગચ્છેય્ય સુગ્ગતિન્તિ.

સિઙ્ઘપુપ્ફ [ભિસપુપ્ફ (સી. પી.), ઉપસિઙ્ઘપુપ્ફ (સ્યા.)] જાતકં સત્તમં.

૩૯૩. વિઘાસાદજાતકં (૬-૨-૮)

૧૨૨. સુસુખં વત જીવન્તિ, યે જના વિઘાસાદિનો;

દિટ્ઠેવ ધમ્મે પાસંસા, સમ્પરાયે ચ સુગ્ગતી.

૧૨૩. સુકસ્સ [સુવસ્સ (સી. સ્યા. પી.)] ભાસમાનસ્સ, ન નિસામેથ પણ્ડિતા;

ઇદં સુણાથ સોદરિયા, અમ્હેવાયં પસંસતિ.

૧૨૪. નાહં તુમ્હે પસંસામિ, કુણપાદા સુણાથ મે;

ઉચ્છિટ્ઠભોજિનો [ભોજના (ક.)] તુમ્હે, ન તુમ્હે વિઘાસાદિનો.

૧૨૫. સત્તવસ્સા પબ્બજિતા, મેજ્ઝારઞ્ઞે [મજ્ઝેરઞ્ઞે (ક.)] સિખણ્ડિનો;

વિઘાસેનેવ યાપેન્તા, મયં ચે ભોતો ગારય્હા;

કે નુ ભોતો પસંસિયા.

૧૨૬. તુમ્હે સીહાનં બ્યગ્ઘાનં, વાળાનઞ્ચાવસિટ્ઠકં;

ઉચ્છિટ્ઠેનેવ યાપેન્તા, મઞ્ઞિવ્હો વિઘાસાદિનો.

૧૨૭. યે બ્રાહ્મણસ્સ સમણસ્સ, અઞ્ઞસ્સ વા [અઞ્ઞસ્સ ચ (સી. સ્યા.), અઞ્ઞસ્સેવ (પી.)] વનિબ્બિનો [વણિબ્બિનો (સી. સ્યા.)];

દત્વાવ [દત્વાન (પી. ક.)] સેસં ભુઞ્જન્તિ, તે જના વિઘાસાદિનોતિ.

વિઘાસાદજાતકં અટ્ઠમં.

૩૯૪. વટ્ટકજાતકં (૬-૨-૯)

૧૨૮. પણીતં ભુઞ્જસે ભત્તં, સપ્પિતેલઞ્ચ માતુલ;

અથ કેન નુ વણ્ણેન, કિસો ત્વમસિ વાયસ.

૧૨૯. અમિત્તમજ્ઝે વસતો, તેસુ આમિસમેસતો;

નિચ્ચં ઉબ્બિગ્ગહદયસ્સ, કુતો કાકસ્સ દળ્હિયં.

૧૩૦. નિચ્ચં ઉબ્બેગિનો [ઉબ્બિગ્ગિનો (સ્યા. ક.), ઉબ્બેધિનો (સી.)] કાકા, ધઙ્કા પાપેન કમ્મુના;

લદ્ધો પિણ્ડો ન પીણેતિ, કિસો તેનસ્મિ વટ્ટક.

૧૩૧. લૂખાનિ તિણબીજાનિ, અપ્પસ્નેહાનિ ભુઞ્જસિ;

અથ કેન નુ વણ્ણેન, થૂલો ત્વમસિ વટ્ટક.

૧૩૨. અપ્પિચ્છા અપ્પચિન્તાય, અદૂરગમનેન ચ;

લદ્ધાલદ્ધેન યાપેન્તો, થૂલો તેનસ્મિ વાયસ.

૧૩૩. અપ્પિચ્છસ્સ હિ પોસસ્સ, અપ્પચિન્તસુખસ્સ [અપ્પચિન્તિસુખસ્સ (સી. સ્યા. પી.)] ચ;

સુસઙ્ગહિતમાનસ્સ [સુસઙ્ગહિતપમાણસ્સ (સી. સ્યા. પી.)], વુત્તી સુસમુદાનયાતિ.

વટ્ટકજાતકં નવમં.

૩૯૫. પારાવતજાતકં (૬-૨-૧૦)

૧૩૪. ચિરસ્સં વત પસ્સામિ, સહાયં મણિધારિનં;

સુકતા [સુકતાય (સી. પી.)] મસ્સુકુત્તિયા, સોભતે વત મે સખા.

૧૩૫. પરૂળ્હકચ્છનખલોમો, અહં કમ્મેસુ બ્યાવટો;

ચિરસ્સં ન્હાપિતં લદ્ધા, લોમં તં અજ્જં હારયિં [અપહારયિં (સી. પી.)].

૧૩૬. યં નુ લોમં અહારેસિ, દુલ્લભં લદ્ધ કપ્પકં;

અથ કિઞ્ચરહિ તે સમ્મ, કણ્ઠે કિણિકિણાયતિ [ઇદં કણ્ઠે કિણાયતિ (ક.), કણ્ઠે કિંનિકિલાયતિ (સ્યા.)].

૧૩૭. મનુસ્સસુખુમાલાનં, મણિ કણ્ઠેસુ લમ્બતિ;

તેસાહં અનુસિક્ખામિ, મા ત્વં મઞ્ઞિ દવા કતં.

૧૩૮. સચેપિમં પિહયસિ, મસ્સુકુત્તિં સુકારિતં;

કારયિસ્સામિ તે સમ્મ, મણિઞ્ચાપિ દદામિ તે.

૧૩૯. ત્વઞ્ઞેવ મણિના છન્નો, સુકતાય ચ મસ્સુયા;

આમન્ત ખો તં ગચ્છામિ, પિયં મે તવ દસ્સનન્તિ.