૩૭૫. કપોતજાતકં (૫-૩-૫)

૧૩૫. ઇદાનિ ખોમ્હિ સુખિતો અરોગો, નિક્કણ્ટકો નિપ્પતિતો કપોતો;

કાહામિ દાની હદયસ્સ તુટ્ઠિં, તથાહિમં મંસસાકં બલેતિ.

૧૩૬. કાયં બલાકા સિખિનો, ચોરી લઙ્ઘિપિતામહા;

ઓરં બલાકે આગચ્છ, ચણ્ડો મે વાયસો સખા.

૧૩૭. અલઞ્હિ તે જગ્ઘિતાયે, મમં દિસ્વાન એદિસં;

વિલૂનં સૂદપુત્તેન, પિટ્ઠમણ્ડેન [પિટ્ઠમદ્દેન (સી. સ્યા. પી.)] મક્ખિતં.

૧૩૮. સુન્હાતો સુવિલિત્તોસિ, અન્નપાનેન તપ્પિતો;

કણ્ઠે ચ તે વેળુરિયો, અગમા નુ કજઙ્ગલં.

૧૩૯. મા તે મિત્તો અમિત્તો વા, અગમાસિ કજઙ્ગલં;

પિઞ્છાનિ તત્થ લાયિત્વા, કણ્ઠે બન્ધન્તિ વટ્ટનં.

૧૪૦. પુનપાપજ્જસી સમ્મ, સીલઞ્હિ તવ તાદિસં;

ન હિ માનુસકા ભોગા, સુભુઞ્જા હોન્તિ પક્ખિનાતિ.

કપોતજાતકં પઞ્ચમં.

અડ્ઢવગ્ગો તતિયો.

તસ્સુદ્દાનં –

અથ વણ્ણ સસીલ હિરિ લભતે, સુમુખા વિસ સાળિયમિત્તવરો;

અથ ચક્ક પલાસ સરાજ સતો, યવ બાલ કપોતક પન્નરસાતિ.

અથ વગ્ગુદ્દાનં –

જીનઞ્ચ વણ્ણં અસમંવગુપ્પરિ, સુદેસિતા જાતકન્તિ સન્તિ વીસતિ [જાતક પઞ્ચવીસતિ (?)];

મહેસિનો બ્રહ્મચરિત્તમુત્ત-મવોચ ગાથા અત્થવતી સુબ્યઞ્જનાતિ.

પઞ્ચકનિપાતં નિટ્ઠિતં.