૩. અડ્ઢવગ્ગો

૩૭૧. દીઘીતિકોસલજાતકં (૫-૩-૧)

૧૧૦. એવંભૂતસ્સ તે રાજ, આગતસ્સ વસે [વસો (પી. ક.)] મમ;

અત્થિ નુ કોચિ પરિયાયો, યો તં દુક્ખા પમોચયે.

૧૧૧. એવંભૂતસ્સ મે તાત, આગતસ્સ વસે તવ;

નત્થિ નો કોચિ પરિયાયો, યો મં દુક્ખા પમોચયે.

૧૧૨. નાઞ્ઞં સુચરિતં રાજ, નાઞ્ઞં રાજ સુભાસિતં;

તાયતે મરણકાલે, એવમેવિતરં ધનં.

૧૧૩. અક્કોચ્છિ મં અવધિ મં, અજિનિ મં અહાસિ મે;

યે ચ તં ઉપનય્હન્તિ, વેરં તેસં ન સમ્મતિ.

૧૧૪. અક્કોચ્છિ મં અવધિ મં, અજિનિ મં અહાસિ મે;

યે ચ તં નુપનય્હન્તિ, વેરં તેસૂપસમ્મતિ.

૧૧૫. ન હિ વેરેન વેરાનિ, સમ્મન્તીધ કુદાચનં;

અવેરેન ચ સમ્મન્તિ, એસ ધમ્મો સનન્તનોતિ.

દીઘીતિકોસલજાતકં પઠમં.

૩૭૨. મિગપોતકજાતકં (૫-૩-૨)

૧૧૬. અગારા પચ્ચુપેતસ્સ, અનગારસ્સ તે સતો;

સમણસ્સ ન તં સાધુ, યં પેતમનુસોચસિ.

૧૧૭. સંવાસેન હવે સક્ક, મનુસ્સસ્સ મિગસ્સ વા;

હદયે જાયતે પેમં, ન તં સક્કા અસોચિતું.

૧૧૮. મતં મરિસ્સં રોદન્તિ, યે રુદન્તિ લપન્તિ ચ;

તસ્મા ત્વં ઇસિ મા રોદિ, રોદિતં મોઘમાહુ સન્તો.

૧૧૯. રોદિતેન હવે બ્રહ્મે, મતો પેતો સમુટ્ઠહે;

સબ્બે સઙ્ગમ્મ રોદામ, અઞ્ઞમઞ્ઞસ્સ ઞાતકે.

૧૨૦. આદિત્તં વત મં સન્તં, ઘતસિત્તંવ પાવકં;

વારિના વિય ઓસિઞ્ચં, સબ્બં નિબ્બાપયે દરં.

૧૨૧. અબ્બહિ વત મે સલ્લં, યમાસિ હદયસ્સિતં;

યો મે સોકપરેતસ્સ, પુત્તસોકં અપાનુદિ.

૧૨૨. સોહં અબ્બૂળ્હસલ્લોસ્મિ, વીતસોકો અનાવિલો;

ન સોચામિ ન રોદામિ, તવ સુત્વાન વાસવાતિ.

મિગપોતકજાતકં દુતિયં.

૩૭૩. મૂસિકજાતકં (૫-૩-૩)

૧૨૩. કુહિં ગતા કત્થ ગતા, ઇતિ લાલપ્પતી જનો;

અહમેવેકો જાનામિ, ઉદપાને મૂસિકા હતા.

૧૨૪. યઞ્ચેતં [યથેતં (પી.), યવેતં (ક.), યમેતં (કત્થચિ)] ઇતિ ચીતિ ચ, ગદ્રભોવ નિવત્તસિ;

ઉદપાને મૂસિકં હન્ત્વા, યવં ભક્ખેતુમિચ્છસિ.

૧૨૫. દહરો ચાસિ દુમ્મેધ, પઠમુપ્પત્તિકો [પઠમુપ્પત્તિતો (સી. પી.)] સુસુ;

દીઘઞ્ચેતં [દીઘમેતં (પી.)] સમાસજ્જ [સમાપજ્જ (સ્યા. ક.)], ન તે દસ્સામિ જીવિતં.

૧૨૬. નાન્તલિક્ખભવનેન, નાઙ્ગપુત્તપિનેન [નાઙ્ગપુત્તસિરેન (સી. સ્યા. પી.)] વા;

પુત્તેન હિ પત્થયિતો, સિલોકેહિ પમોચિતો.

૧૨૭. સબ્બં સુતમધીયેથ, હીનમુક્કટ્ઠમજ્ઝિમં;

સબ્બસ્સ અત્થં જાનેય્ય, ન ચ સબ્બં પયોજયે;

હોતિ તાદિસકો કાલો, યત્થ અત્થાવહં સુતન્તિ.

મૂસિકજાતકં તતિયં.

૩૭૪. ચૂળધનુગ્ગહજાતકં (૫-૩-૪)

૧૨૮. સબ્બં ભણ્ડં સમાદાય, પારં તિણ્ણોસિ બ્રાહ્મણ;

પચ્ચાગચ્છ લહું ખિપ્પં, મમ્પિ તારેહિ દાનિતો [દાનિભો (સ્યા.)].

૧૨૯. અસન્થુતં મં ચિરસન્થુતેન, નિમીનિ ભોતી અદ્ધુવં ધુવેન;

મયાપિ ભોતી નિમિનેય્ય અઞ્ઞં, ઇતો અહં દૂરતરં ગમિસ્સં.

૧૩૦. કાયં એળગલાગુમ્બે [એળગણગુમ્બે (ક.)], કરોતિ અહુહાસિયં;

નયીધ નચ્ચગીતં વા [નયિધ નચ્ચં વા ગીતં વા (સી. સ્યા. પી.)], તાળં વા સુસમાહિતં;

અનમ્હિકાલે [અનમ્હકાલે (પી.)] સુસોણિ [સુસ્સોણિ (સી. સ્યા. પી.)], કિં નુ જગ્ઘસિ સોભને [સોભણે (પી. ક.)].

૧૩૧. સિઙ્ગાલ બાલ દુમ્મેધ, અપ્પપઞ્ઞોસિ જમ્બુક;

જીનો મચ્છઞ્ચ પેસિઞ્ચ, કપણો વિય ઝાયસિ.

૧૩૨. સુદસ્સં વજ્જમઞ્ઞેસં, અત્તનો પન દુદ્દસં;

જીના પતિઞ્ચ જારઞ્ચ, મઞ્ઞે ત્વઞ્ઞેવ [મમ્પિ ત્વઞ્ઞેવ (સી. સ્યા.), ત્વમ્પિ મઞ્ઞેવ (પી.)] ઝાયસિ.

૧૩૩. એવમેતં મિગરાજ, યથા ભાસસિ જમ્બુક;

સા નૂનાહં ઇતો ગન્ત્વા, ભત્તુ હેસ્સં વસાનુગા.

૧૩૪. યો હરે મત્તિકં થાલં, કંસથાલમ્પિ સો હરે;

કતઞ્ચેવ [કતંયેવ (સી. સ્યા. પી.)] તયા પાપં, પુનપેવં કરિસ્સસીતિ.

ચૂળધનુગ્ગહજાતકં ચતુત્થં.

૩૭૫. કપોતજાતકં (૫-૩-૫)

૧૩૫. ઇદાનિ ખોમ્હિ સુખિતો અરોગો, નિક્કણ્ટકો નિપ્પતિતો કપોતો;

કાહામિ દાની હદયસ્સ તુટ્ઠિં, તથાહિમં મંસસાકં બલેતિ.

૧૩૬. કાયં બલાકા સિખિનો, ચોરી લઙ્ઘિપિતામહા;

ઓરં બલાકે આગચ્છ, ચણ્ડો મે વાયસો સખા.

૧૩૭. અલઞ્હિ તે જગ્ઘિતાયે, મમં દિસ્વાન એદિસં;

વિલૂનં સૂદપુત્તેન, પિટ્ઠમણ્ડેન [પિટ્ઠમદ્દેન (સી. સ્યા. પી.)] મક્ખિતં.

૧૩૮. સુન્હાતો સુવિલિત્તોસિ, અન્નપાનેન તપ્પિતો;

કણ્ઠે ચ તે વેળુરિયો, અગમા નુ કજઙ્ગલં.

૧૩૯. મા તે મિત્તો અમિત્તો વા, અગમાસિ કજઙ્ગલં;

પિઞ્છાનિ તત્થ લાયિત્વા, કણ્ઠે બન્ધન્તિ વટ્ટનં.

૧૪૦. પુનપાપજ્જસી સમ્મ, સીલઞ્હિ તવ તાદિસં;

ન હિ માનુસકા ભોગા, સુભુઞ્જા હોન્તિ પક્ખિનાતિ.

કપોતજાતકં પઞ્ચમં.

અડ્ઢવગ્ગો તતિયો.

તસ્સુદ્દાનં –

અથ વણ્ણ સસીલ હિરિ લભતે, સુમુખા વિસ સાળિયમિત્તવરો;

અથ ચક્ક પલાસ સરાજ સતો, યવ બાલ કપોતક પન્નરસાતિ.

અથ વગ્ગુદ્દાનં –

જીનઞ્ચ વણ્ણં અસમંવગુપ્પરિ, સુદેસિતા જાતકન્તિ સન્તિ વીસતિ [જાતક પઞ્ચવીસતિ (?)];

મહેસિનો બ્રહ્મચરિત્તમુત્ત-મવોચ ગાથા અત્થવતી સુબ્યઞ્જનાતિ.

પઞ્ચકનિપાતં નિટ્ઠિતં.