૫. પઞ્ચકનિપાતો

૧. મણિકુણ્ડલવગ્ગો

૩૫૧. મણિકુણ્ડલજાતકં (૫-૧-૧)

૧. જીનો રથસ્સં મણિકુણ્ડલે ચ, પુત્તે ચ દારે ચ તથેવ જીનો;

સબ્બેસુ ભોગેસુ અસેસકેસુ [અસેસિતેસુ (સી. પી.), અસેસિકેસુ (ક.)], કસ્મા ન સન્તપ્પસિ સોકકાલે.

૨. પુબ્બેવ મચ્ચં વિજહન્તિ ભોગા, મચ્ચો વા તે [ચ ને (પી.), ધને (ક.)] પુબ્બતરં જહાતિ;

અસસ્સતા ભોગિનો કામકામિ, તસ્મા ન સોચામહં સોકકાલે.

૩. ઉદેતિ આપૂરતિ વેતિ [પૂરેતિ ખીયતિ (સ્યા.)] ચન્દો, અત્થં તપેત્વાન [અન્ધં તપેત્વાન (ક.), અત્થઙ્ગમેત્વાન (સ્યા.), એત્થ ‘‘તપેત્વાન અત્થં પલેતી’’તિ સમ્બન્ધો] પલેતિ સૂરિયો;

વિદિતા [વિજિતા (સ્યા.)] મયા સત્તુક લોકધમ્મા, તસ્મા ન સોચામહં સોકકાલે.

૪. અલસો ગિહી કામભોગી ન સાધુ, અસઞ્ઞતો પબ્બજિતો ન સાધુ;

રાજા ન સાધુ અનિસમ્મકારી, યો પણ્ડિતો કોધનો તં ન સાધુ.

૫. નિસમ્મ ખત્તિયો કયિરા, નાનિસમ્મ દિસમ્પતિ;

નિસમ્મકારિનો રાજ [રઞ્ઞો (સી. સ્યા.)], યસો કિત્તિ ચ વડ્ઢતીતિ.

મણિકુણ્ડલજાતકં પઠમં.

૩૫૨. સુજાતજાતકં (૫-૧-૨)

૬. કિં નુ સન્તરમાનોવ, લાયિત્વા હરિતં તિણં;

ખાદ ખાદાતિ લપસિ, ગતસત્તં જરગ્ગવં.

૭. ન હિ અન્નેન પાનેન, મતો ગોણો સમુટ્ઠહે;

ત્વઞ્ચ તુચ્છં વિલપસિ, યથા તં દુમ્મતી તથા.

૮. તથેવ તિટ્ઠતિ સીસં, હત્થપાદા ચ વાલધિ;

સોતા તથેવ તિટ્ઠન્તિ [સો તાત તથેવ તિટ્ઠતિ (ક.)], મઞ્ઞે ગોણો સમુટ્ઠહે.

૯. નેવય્યકસ્સ સીસઞ્ચ [સીસં વા (સી. સ્યા. પી.)], હત્થપાદા ચ દિસ્સરે;

રુદં મત્તિકથૂપસ્મિં, નનુ ત્વઞ્ઞેવ દુમ્મતિ.

૧૦. આદિત્તં વત મં સન્તં, ઘતસિત્તંવ પાવકં;

વારિના વિય ઓસિઞ્ચં [ઓસિઞ્ચિ (ક.)], સબ્બં નિબ્બાપયે દરં.

૧૧. અબ્બહી [અબ્બૂળ્હં (સી. સ્યા.), અબ્ભૂળ્હં (ક.)] વત મે સલ્લં, યમાસિ હદયસ્સિતં [સોકં હદયનિસ્સિતં (સી. સ્યા.)];

યો મે સોકપરેતસ્સ, પિતુ સોકં અપાનુદિ.

૧૨. સોહં અબ્બૂળ્હસલ્લોસ્મિ, વીતસોકો અનાવિલો;

ન સોચામિ ન રોદામિ, તવ સુત્વાન માણવ.

૧૩. એવં કરોન્તિ સપ્પઞ્ઞા, યે હોન્તિ અનુકમ્પકા;

વિનિવત્તેન્તિ સોકમ્હા, સુજાતો પિતરં યથાતિ.

સુજાતજાતકં દુતિયં.

૩૫૩. વેનસાખજાતકં (૫-૧-૩)

૧૪. નયિદં નિચ્ચં ભવિતબ્બં બ્રહ્મદત્ત, ખેમં સુભિક્ખં સુખતા ચ કાયે;

અત્થચ્ચયે મા અહુ સમ્પમૂળ્હો, ભિન્નપ્લવો સાગરસ્સેવ મજ્ઝે.

૧૫. યાનિ કરોતિ પુરિસો, તાનિ અત્તનિ પસ્સતિ;

કલ્યાણકારી કલ્યાણં, પાપકારી ચ પાપકં;

યાદિસં વપતે બીજં, તાદિસં હરતે ફલં.

૧૬. ઇદં તદાચરિયવચો, પારાસરિયો યદબ્રવિ;

મા સુ [મા સ્સુ (સી. સ્યા. પી.)] ત્વં અકરિ પાપં, યં ત્વં પચ્છા કતં તપે.

૧૭. અયમેવ સો પિઙ્ગિય [સો પિઙ્ગિયો (સ્યા.), સોપિ ભિય્યો (ક.)] વેનસાખો, [ધોનસાખો (ક. સી. પી.)] યમ્હિ ઘાતયિં ખત્તિયાનં સહસ્સં;

અલઙ્કતે ચન્દનસારાનુલિત્તે, તમેવ દુક્ખં પચ્ચાગતં મમં.

૧૮. સામા ચ [સામાપિ (સી. સ્યા.)] ખો ચન્દનલિત્તગત્તા [ગત્તી (ક. સી. સ્યા. પી.)], લટ્ઠીવ સોભઞ્જનકસ્સ ઉગ્ગતા;

અદિસ્વા [અદિસ્વાવ (સી.)] કાલં કરિસ્સામિ ઉબ્બરિં, તં મે ઇતો દુક્ખતરં ભવિસ્સતીતિ.

વેનસાખજાતકં [ધોનસાખજાતકં (ક. સી. પી.)] તતિયં.

૩૫૪. ઉરગજાતકં (૫-૧-૪)

૧૯. ઉરગોવ તચં જિણ્ણં, હિત્વા ગચ્છતિ સં તનું;

એવં સરીરે નિબ્ભોગે, પેતે કાલઙ્કતે સતિ.

૨૦. ડય્હમાનો ન જાનાતિ, ઞાતીનં પરિદેવિતં;

તસ્મા એતં ન સોચામિ, ગતો સો તસ્સ યા ગતિ.

૨૧. અનવ્હિતો તતો આગા, અનનુઞ્ઞાતો [નાનુઞ્ઞાતો (ક.)] ઇતો ગતો;

યથાગતો તથા ગતો, તત્થ કા પરિદેવના.

૨૨. ડય્હમાનો ન જાનાતિ, ઞાતીનં પરિદેવિતં;

તસ્મા એતં ન સોચામિ, ગતો સો તસ્સ યા ગતિ.

૨૩. સચે રોદે કિસા [કિસી (પી.)] અસ્સં, તસ્સા મે કિં ફલં સિયા;

ઞાતિમિત્તસુહજ્જાનં, ભિય્યો નો અરતી સિયા.

૨૪. ડય્હમાનો ન જાનાતિ, ઞાતીનં પરિદેવિતં;

તસ્મા એતં ન સોચામિ, ગતો સો તસ્સ યા ગતિ.

૨૫. યથાપિ દારકો ચન્દં, ગચ્છન્તમનુરોદતિ;

એવં સમ્પદમેવેતં, યો પેતમનુસોચતિ.

૨૬. ડય્હમાનો ન જાનાતિ, ઞાતીનં પરિદેવિતં;

તસ્મા એતં ન સોચામિ, ગતો સો તસ્સ યા ગતિ.

૨૭. યથાપિ ઉદકકુમ્ભો, ભિન્નો અપ્પટિસન્ધિયો;

એવં સમ્પદમેવેતં, યો પેતમનુસોચતિ.

૨૮. ડય્હમાનો ન જાનાતિ, ઞાતીનં પરિદેવિતં;

તસ્મા એતં ન સોચામિ, ગતો સો તસ્સ યા ગતીતિ.

ઉરગજાતકં ચતુત્થં.

૩૫૫. ઘટજાતકં (૫-૧-૫)

૨૯. અઞ્ઞે સોચન્તિ રોદન્તિ, અઞ્ઞે અસ્સુમુખા જના;

પસન્નમુખવણ્ણોસિ, કસ્મા ઘટ [ઘત (સી. પી.)] ન સોચસિ.

૩૦. નાબ્ભતીતહરો સોકો, નાનાગતસુખાવહો;

તસ્મા ધઙ્ક [વંક (પી.)] ન સોચામિ, નત્થિ સોકે દુતીયતા [સોકો દુતીયકા (ક.)].

૩૧. સોચં પણ્ડુ કિસો હોતિ, ભત્તઞ્ચસ્સ ન રુચ્ચતિ;

અમિત્તા સુમના હોન્તિ, સલ્લવિદ્ધસ્સ રુપ્પતો.

૩૨. ગામે વા યદિ વારઞ્ઞે, નિન્ને વા યદિ વા થલે;

ઠિતં મં નાગમિસ્સતિ, એવં દિટ્ઠપદો અહં.

૩૩. યસ્સત્તા નાલમેકોવ, સબ્બકામરસાહરો;

સબ્બાપિ પથવી તસ્સ, ન સુખં આવહિસ્સતીતિ.

ઘટજાતકં પઞ્ચમં.

૩૫૬. કોરણ્ડિયજાતકં (૫-૧-૬)

૩૪. એકો અરઞ્ઞે ગિરિકન્દરાયં, પગ્ગય્હ પગ્ગય્હ સિલં પવેચ્છસિ [પવેજ્ઝસિ (સ્યા. સી. અટ્ઠ.)];

પુનપ્પુનં સન્તરમાનરૂપો, કોરણ્ડિય [કારણ્ડિય (સી. સ્યા. પી.)] કો નુ તવ યિધત્થો.

૩૫. અહઞ્હિમં સાગર સેવિતન્તં, સમં કરિસ્સામિ યથાપિ પાણિ;

વિકિરિય સાનૂનિ ચ પબ્બતાનિ ચ, તસ્મા સિલં દરિયા પક્ખિપામિ.

૩૬. નયિમં મહિં અરહતિ પાણિકપ્પં, સમં મનુસ્સો કરણાય મેકો;

મઞ્ઞામિમઞ્ઞેવ દરિં જિગીસં [જિગિંસં (સી. સ્યા. પી.)], કોરણ્ડિય હાહસિ [હાયસિ (સ્યા. ક.)] જીવલોકં.

૩૭. સચે અહં [અયં (સી. સ્યા. પી.)] ભૂતધરં ન સક્કા [સક્કો (સ્યા. ક.)], સમં મનુસ્સો કરણાય મેકો;

એવમેવ ત્વં બ્રહ્મે ઇમે મનુસ્સે, નાનાદિટ્ઠિકે નાનયિસ્સસિ તે [ને (ક.)].

૩૮. સઙ્ખિત્તરૂપેન ભવં મમત્થં, અક્ખાસિ કોરણ્ડિય એવમેતં;

યથા ન સક્કા પથવી સમાયં, કત્તું મનુસ્સેન તથા મનુસ્સાતિ.

કોરણ્ડિયજાતકં છટ્ઠં.

૩૫૭. લટુકિકજાતકં (૫-૧-૭)

૩૯. વન્દામિ તં કુઞ્જર સટ્ઠિહાયનં, આરઞ્ઞકં યૂથપતિં યસસ્સિં;

પક્ખેહિ તં પઞ્જલિકં કરોમિ, મા મે વધી પુત્તકે દુબ્બલાય.

૪૦. વન્દામિ તં કુઞ્જર એકચારિં, આરઞ્ઞકં પબ્બતસાનુગોચરં;

પક્ખેહિ તં પઞ્જલિકં કરોમિ, મા મે વધી પુત્તકે દુબ્બલાય;

૪૧. વમિસ્સામિ તે લટુકિકે પુત્તકાનિ, કિં મે તુવં કાહસિ દુબ્બલાસિ;

સતં સહસ્સાનિપિ તાદિસીનં, વામેન પાદેન પપોથયેય્યં.

૪૨. ન હેવ સબ્બત્થ બલેન કિચ્ચં, બલઞ્હિ બાલસ્સ વધાય હોતિ;

કરિસ્સામિ તે નાગરાજા અનત્થં, યો મે વધી પુત્તકે દુબ્બલાય.

૪૩. કાકઞ્ચ પસ્સ લટુકિકં, મણ્ડૂકં નીલમક્ખિકં;

એતે નાગં અઘાતેસું, પસ્સ વેરસ્સ વેરિનં;

તસ્મા હિ વેરં ન કયિરાથ, અપ્પિયેનપિ કેનચીતિ.

લટુકિકજાતકં સત્તમં.

૩૫૮. ચૂળધમ્મપાલજાતકં (૫-૧-૮)

૪૪. અહમેવ દૂસિયા ભૂનહતા, રઞ્ઞો મહાપતાપસ્સ;

એતં મુઞ્ચતુ ધમ્મપાલં, હત્થે મે દેવ છેદેહિ.

૪૫. અહમેવ દૂસિયા ભૂનહતા, રઞ્ઞો મહાપતાપસ્સ;

એતં મુઞ્ચતુ ધમ્મપાલં, પાદે મે દેવ છેદેહિ.

૪૬. અહમેવ દૂસિયા ભૂનહતા, રઞ્ઞો મહાપતાપસ્સ;

એતં મુઞ્ચતુ ધમ્મપાલં, સીસં મે દેવ છેદેહિ.

૪૭. ન હિ [નહ (સી. સ્યા. પી.) એત્થ હ-કારો ખેદે] નૂનિમસ્સ રઞ્ઞો, મિત્તામચ્ચા ચ વિજ્જરે સુહદા;

યે ન વદન્તિ રાજાનં, મા ઘાતયિ ઓરસં પુત્તં.

૪૮. ન હિ [નહ (સી. સ્યા. પી.) એત્થ હ-કારો ખેદે] નૂનિમસ્સ રઞ્ઞો, ઞાતી મિત્તા ચ વિજ્જરે સુહદા;

યે ન વદન્તિ રાજાનં, મા ઘાતયિ અત્રજં પુત્તં.

૪૯. ચન્દનસારાનુલિત્તા, બાહા છિજ્જન્તિ ધમ્મપાલસ્સ;

દાયાદસ્સ પથબ્યા, પાણા મે દેવ રુજ્ઝન્તીતિ.

ચૂળધમ્મપાલજાતકં અટ્ઠમં.

૩૫૯. સુવણ્ણમિગજાતકં (૫-૧-૯)

૫૦. વિક્કમ રે હરિપાદ [મહામિગ (સી. સ્યા. પી.)], વિક્કમ રે મહામિગ [હરીપદ (સી. સ્યા. પી.)];

છિન્દ વારત્તિકં પાસં, નાહં એકા વને રમે.

૫૧. વિક્કમામિ ન પારેમિ, ભૂમિં સુમ્ભામિ વેગસા;

દળ્હો વારત્તિકો પાસો, પાદં મે પરિકન્તતિ.

૫૨. અત્થરસ્સુ પલાસાનિ, અસિં નિબ્બાહ લુદ્દક;

પઠમં મં વધિત્વાન, હન પચ્છા મહામિગં.

૫૩. ન મે સુતં વા દિટ્ઠં વા, ભાસન્તિં માનુસિં મિગિં [ન મે સુતા વા દિટ્ઠા વા, ભાસન્તી માનુસિં મિગી (ટીકા)];

ત્વઞ્ચ ભદ્દે સુખી હોહિ, એસો ચાપિ મહામિગો.

૫૪. એવં લુદ્દક નન્દસ્સુ, સહ સબ્બેહિ ઞાતિભિ;

યથાહમજ્જ નન્દામિ, મુત્તં દિસ્વા મહામિગન્તિ.

સુવણ્ણમિગજાતકં નવમં.

૩૬૦. સુયોનન્દીજાતકં (૫-૧-૧૦)

૫૫. વાતિ ગન્ધો તિમિરાનં, કુસમુદ્દો ચ [વ (સ્યા. પી.)] ઘોસવા;

દૂરે ઇતો સુયોનન્દી [ઇતો હિ સુસન્દી (સી. સ્યા.), ઇતોપિ સુસ્સોન્દી (પી.)], તમ્બકામા તુદન્તિ મં.

૫૬. કથં સમુદ્દમતરિ, કથં અદ્દક્ખિ સેદુમં [સેરુમં (સી. સ્યા. પી.)];

કથં તસ્સા ચ તુય્હઞ્ચ, અહુ સગ્ગ [અગ્ગ (સી. સ્યા.)] સમાગમો.

૫૭. કુરુકચ્છા [ભરુકચ્છા (સી. સ્યા. પી.)] પયાતાનં, વાણિજાનં ધનેસિનં;

મકરેહિ અભિદા [મકરેહિબ્ભિદા (સી.), મકરેહિ’ભિદા (સ્યા.), મકરેહિ ભિન્ના (પી.)] નાવા, ફલકેનાહમપ્લવિં.

૫૮. સા મં સણ્હેન મુદુના, નિચ્ચં ચન્દનગન્ધિની;

અઙ્ગેન [અઙ્કેન (પી. ક.)] ઉદ્ધરી ભદ્દા, માતા પુત્તંવ ઓરસં.

૫૯. સા મં અન્નેન પાનેન, વત્થેન સયનેન ચ;

અત્તનાપિ ચ મન્દક્ખી, એવં તમ્બ વિજાનાહીતિ.

સુયોનન્દીજાતકં દસમં.

મણિકુણ્ડલવગ્ગો પઠમો.

તસ્સુદ્દાનં –

અથ જિનવરો હરિતં તિણકો, અથ ભિન્નપ્લવો ઉરગોવ ઘટો;

દરિયા પુન કુઞ્જર ભૂનહતા, મિગમુત્તમસગ્ગવરેન દસાતિ.

૨. વણ્ણારોહવગ્ગો

૩૬૧. વણ્ણારોહજાતકં (૫-૨-૧)

૬૦. વણ્ણારોહેન જાતિયા, બલનિક્કમનેન ચ;

સુબાહુ ન મયા સેય્યો, સુદાઠ ઇતિ ભાસસિ.