૨. વણ્ણારોહવગ્ગો

૩૬૧. વણ્ણારોહજાતકં (૫-૨-૧)

૬૦. વણ્ણારોહેન જાતિયા, બલનિક્કમનેન ચ;

સુબાહુ ન મયા સેય્યો, સુદાઠ ઇતિ ભાસસિ.

૬૧. વણ્ણારોહેન જાતિયા, બલનિક્કમનેન ચ;

સુદાઠો ન મયા સેય્યો, સુબાહુ ઇતિ ભાસસિ.

૬૨. એવં ચે મં વિહરન્તં, સુબાહુ સમ્મ દુબ્ભસિ;

ન દાનાહં તયા સદ્ધિં, સંવાસમભિરોચયે.

૬૩. યો પરેસં વચનાનિ, સદ્દહેય્ય [સદ્દહેથ (સી. સ્યા. પી.)] યથાતથં;

ખિપ્પં ભિજ્જેથ મિત્તસ્મિં, વેરઞ્ચ પસવે બહું.

૬૪. ન સો મિત્તો યો સદા અપ્પમત્તો, ભેદાસઙ્કી રન્ધમેવાનુપસ્સી;

યસ્મિઞ્ચ સેતી ઉરસીવ પુત્તો, સ વે મિત્તો યો અભેજ્જો પરેહીતિ.

વણ્ણારોહજાતકં પઠમં.

૩૬૨. સીલવીમંસજાતકં (૫-૨-૨)

૬૫. સીલં સેય્યો સુતં સેય્યો, ઇતિ મે સંસયો અહુ;

સીલમેવ સુતા સેય્યો, ઇતિ મે નત્થિ સંસયો.

૬૬. મોઘા જાતિ ચ વણ્ણો ચ, સીલમેવ કિરુત્તમં;

સીલેન અનુપેતસ્સ, સુતેનત્થો ન વિજ્જતિ.

૬૭. ખત્તિયો ચ અધમ્મટ્ઠો, વેસ્સો ચાધમ્મનિસ્સિતો;

તે પરિચ્ચજ્જુભો લોકે, ઉપપજ્જન્તિ દુગ્ગતિં.

૬૮. ખત્તિયા બ્રાહ્મણા વેસ્સા, સુદ્દા ચણ્ડાલપુક્કુસા;

ઇધ ધમ્મં ચરિત્વાન, ભવન્તિ તિદિવે સમા.

૬૯. ન વેદા સમ્પરાયાય, ન જાતિ નાપિ [નોપિ (પી.)] બન્ધવા;

સકઞ્ચ સીલં સંસુદ્ધં, સમ્પરાયાય સુખાય ચાતિ [સુખાવહન્તિ (સી. સ્યા.)].

સીલવીમંસજાતકં દુતિયં.

૩૬૩. હિરિજાતકં (૫-૨-૩)

૭૦. હિરિં તરન્તં વિજિગુચ્છમાનં, તવાહમસ્મી ઇતિ ભાસમાનં;

સેય્યાનિ કમ્માનિ અનાદિયન્તં, નેસો મમન્તિ ઇતિ નં વિજઞ્ઞા.

૭૧. યઞ્હિ કયિરા તઞ્હિ વદે, યં ન કયિરા ન તં વદે;

અકરોન્તં ભાસમાનં, પરિજાનન્તિ પણ્ડિતા.

૭૨. ન સો મિત્તો યો સદા અપ્પમત્તો, ભેદાસઙ્કી રન્ધમેવાનુપસ્સી;

યસ્મિઞ્ચ સેતી ઉરસીવ પુત્તો, સ વે મિત્તો યો અભેજ્જો પરેહિ.

૭૩. પામોજ્જકરણં ઠાનં, પસંસાવહનં સુખં;

ફલાનિસંસો ભાવેતિ, વહન્તો પોરિસં ધુરં.

૭૪. પવિવેકરસં પિત્વા, રસં ઉપસમસ્સ ચ;

નિદ્દરો હોતિ નિપ્પાપો, ધમ્મપ્પીતિરસં પિવન્તિ.

હિરિજાતકં તતિયં.

૩૬૪. ખજ્જોપનકજાતકં (૫-૨-૪)

૭૫. કો નુ સન્તમ્હિ પજ્જોતે, અગ્ગિપરિયેસનં ચરં;

અદ્દક્ખિ રત્તિ [રત્તિં (સ્યા.)] ખજ્જોતં, જાતવેદં અમઞ્ઞથ.

૭૬. સ્વસ્સ ગોમયચુણ્ણાનિ, અભિમત્થં તિણાનિ ચ;

વિપરીતાય સઞ્ઞાય, નાસક્ખિ પજ્જલેતવે.

૭૭. એવમ્પિ અનુપાયેન, અત્થં ન લભતે મિગો [મૂગો (સ્યા.)];

વિસાણતો ગવં દોહં, યત્થ ખીરં ન વિન્દતિ.

૭૮. વિવિધેહિ ઉપાયેહિ, અત્થં પપ્પોન્તિ માણવા;

નિગ્ગહેન અમિત્તાનં, મિત્તાનં પગ્ગહેન ચ.

૭૯. સેનામોક્ખપલાભેન [સેની મોક્ખૂપલાભેન (સ્યા.)], વલ્લભાનં નયેન ચ;

જગતિં જગતિપાલા, આવસન્તિ વસુન્ધરન્તિ.

ખજ્જોપનકજાતકં ચતુત્થં.

૩૬૫. અહિતુણ્ડિકજાતકં (૫-૨-૫)

૮૦. ધુત્તોમ્હિ સમ્મ સુમુખ, જૂતે અક્ખપરાજિતો;

હરેહિ [સેવેહિ (પી.)] અમ્બપક્કાનિ, વીરિયં તે ભક્ખયામસે.

૮૧. અલિકં વત મં સમ્મ, અભૂતેન પસંસસિ;

કો તે સુતો વા દિટ્ઠો વા, સુમુખો નામ મક્કટો.

૮૨. અજ્જાપિ મે તં મનસિ [તે મં સરસિ (ક.)], યં મં ત્વં અહિતુણ્ડિક;

ધઞ્ઞાપણં પવિસિત્વા, મત્તો [મુત્તો (ક.)] છાતં હનાસિ મં.

૮૩. તાહં સરં દુક્ખસેય્યં, અપિ રજ્જમ્પિ કારયે;

નેવાહં યાચિતો દજ્જં, તથા હિ ભયતજ્જિતો.

૮૪. યઞ્ચ જઞ્ઞા કુલે જાતં, ગબ્ભે તિત્તં અમચ્છરિં;

તેન સખિઞ્ચ મિત્તઞ્ચ, ધીરો સન્ધાતુમરહતીતિ.

અહિતુણ્ડિકજાતકં પઞ્ચમં.

૩૬૬. ગુમ્બિયજાતકં (૫-૨-૬)

૮૫. મધુવણ્ણં મધુરસં, મધુગન્ધં વિસં અહુ;

ગુમ્બિયો ઘાસમેસાનો, અરઞ્ઞે ઓદહી વિસં.

૮૬. મધુ ઇતિ મઞ્ઞમાના [મધૂતિ મઞ્ઞમાનાય (ક.)], યે તં વિસમખાદિસું [વિસમસાયિસું (સી. સ્યા.)];

તેસં તં કટુકં આસિ, મરણં તેનુપાગમું.

૮૭. યે ચ ખો પટિસઙ્ખાય, વિસં તં પરિવજ્જયું;

તે આતુરેસુ સુખિતા, ડય્હમાનેસુ નિબ્બુતા.

૮૮. એવમેવ મનુસ્સેસુ, વિસં કામા સમોહિતા;

આમિસં બન્ધનઞ્ચેતં, મચ્ચુવેસો [પચ્ચુવસો (સી. સ્યા.)] ગુહાસયો.

૮૯. એવમેવ ઇમે કામે, આતુરા પરિચારિકે [પરિચારકે (ક.)];

યે સદા પરિવજ્જેન્તિ, સઙ્ગં લોકે ઉપચ્ચગુન્તિ.

ગુમ્બિયજાતકં છટ્ઠં.

૩૬૭. સાળિયજાતકં (૫-૨-૭)

૯૦. ય્વાયં સાળિય [સાલિય (સી. સ્યા. પી.), સાળિક (?)] છાપોતિ, કણ્હસપ્પં અગાહયિ;

તેન સપ્પેનયં દટ્ઠો, હતો પાપાનુસાસકો.

૯૧. અહન્તાર [અહનન્ત (પી.), અહરન્ત (?)] મહન્તારં, યો નરો હન્તુમિચ્છતિ;

એવં સો નિહતો સેતિ, યથાયં પુરિસો હતો.

૯૨. અહન્તાર [અહનન્ત (સી. સ્યા. પી.), અહરન્ત (?)] મઘાતેન્તં, યો નરો હન્તુમિચ્છતિ;

એવં સો નિહતો સેતિ, યથાયં પુરિસો હતો.

૯૩. યથા પંસુમુટ્ઠિં પુરિસો, પટિવાતં પટિક્ખિપે;

તમેવ સો રજો હન્તિ, તથાયં પુરિસો હતો.

૯૪. યો અપ્પદુટ્ઠસ્સ નરસ્સ દુસ્સતિ, સુદ્ધસ્સ પોસસ્સ અનઙ્ગણસ્સ;

તમેવ બાલં પચ્ચેતિ પાપં, સુખુમો રજો પટિવાતંવ ખિત્તોતિ.

સાળિયજાતકં સત્તમં.

૩૬૮. તચસારજાતકં (૫-૨-૮)

૯૫. અમિત્તહત્થત્થગતા [હત્થત્તગતા (કત્થચિ, સી. નિય્ય)], તચસારસમપ્પિતા;

પસન્નમુખવણ્ણાત્થ, કસ્મા તુમ્હે ન સોચથ.

૯૬. ન સોચનાય પરિદેવનાય, અત્થોવ લબ્ભો [અત્થો ચ લબ્ભા (સી. સ્યા.), અત્થોધ લબ્ભા (અ. નિ. ૫.૪૮)] અપિ અપ્પકોપિ;

સોચન્તમેનં દુખિતં વિદિત્વા, પચ્ચત્થિકા અત્તમના ભવન્તિ.

૯૭. યતો ચ ખો પણ્ડિતો આપદાસુ, ન વેધતી અત્થવિનિચ્છયઞ્ઞૂ;

પચ્ચત્થિકાસ્સ [પચ્ચત્થિકા તે (ક.)] દુખિતા ભવન્તિ, દિસ્વા મુખં અવિકારં પુરાણં.

૯૮. જપ્પેન મન્તેન સુભાસિતેન, અનુપ્પદાનેન પવેણિયા વા;

યથા યથા યત્થ લભેથ અત્થં, તથા તથા તત્થ પરક્કમેય્ય.

૯૯. યતો ચ જાનેય્ય અલબ્ભનેય્યો, મયા વ [મયા વા (સ્યા. ક.)] અઞ્ઞેન વા એસ અત્થો;

અસોચમાનો અધિવાસયેય્ય, કમ્મં દળ્હં કિન્તિ કરોમિ દાનીતિ.

તચસારજાતકં અટ્ઠમં.

૩૬૯. મિત્તવિન્દકજાતકં (૫-૨-૯)

૧૦૦. ક્યાહં દેવાનમકરં, કિં પાપં પકતં મયા;

યં મે સિરસ્મિં ઓહચ્ચ [ઉહચ્ચ (ક.), ઉહચ્ચ (પી.)], ચક્કં ભમતિ મત્થકે.

૧૦૧. અતિક્કમ્મ રમણકં, સદામત્તઞ્ચ દૂભકં;

બ્રહ્મત્તરઞ્ચ પાસાદં, કેનત્થેન ઇધાગતો.

૧૦૨. ઇતો બહુતરા ભોગા, અત્ર મઞ્ઞે ભવિસ્સરે;

ઇતિ એતાય સઞ્ઞાય, પસ્સ મં બ્યસનં ગતં.

૧૦૩. ચતુબ્ભિ અટ્ઠજ્ઝગમા, અટ્ઠાહિપિ ચ [અટ્ઠાહિ ચાપિ (સી. સ્યા.), અટ્ઠાભિ ચાપિ (ક.)] સોળસ;

સોળસાહિ ચ બાત્તિંસ, અત્રિચ્છં ચક્કમાસદો;

ઇચ્છાહતસ્સ પોસસ્સ, ચક્કં ભમતિ મત્થકે.

૧૦૪. ઉપરિવિસાલા દુપ્પૂરા, ઇચ્છા વિસટગામિની [ઉપરિ વિસાલં દુપ્પૂરં, ઇચ્છાવિસદગામિની (સી.)];

યે ચ તં અનુગિજ્ઝન્તિ, તે હોન્તિ ચક્કધારિનોતિ.

મિત્તવિન્દકજાતકં નવમં.

૩૭૦. પલાસજાતકં (૫-૨-૧૦)

૧૦૫. હંસો પલાસમવચ, નિગ્રોધો સમ્મ જાયતિ;

અઙ્કસ્મિં [અઙ્ગસ્મિં (ક.)] તે નિસિન્નોવ, સો તે મમ્માનિ છેચ્છતિ [છિજ્જતિ (ક.)].

૧૦૬. વડ્ઢતામેવ [વદ્ધિતમેવ (ક.)] નિગ્રોધો, પતિટ્ઠસ્સ ભવામહં;

યથા પિતા ચ માતા ચ [પિતા વા માતા વા (પી.), માતા વા પિતા વા (ક.)], એવં મે સો ભવિસ્સતિ.

૧૦૭. યં ત્વં અઙ્કસ્મિં વડ્ઢેસિ, ખીરરુક્ખં ભયાનકં;

આમન્ત ખો તં ગચ્છામ, વુડ્ઢિ મસ્સ ન રુચ્ચતિ.

૧૦૮. ઇદાનિ ખો મં ભાયેતિ, મહાનેરુનિદસ્સનં;

હંસસ્સ અનભિઞ્ઞાય, મહા મે ભયમાગતં.

૧૦૯. ન તસ્સ વુડ્ઢિ કુસલપ્પસત્થા, યો વડ્ઢમાનો ઘસતે પતિટ્ઠં;

તસ્સૂપરોધં પરિસઙ્કમાનો, પતારયી મૂલવધાય ધીરોતિ.

પલાસજાતકં દસમં.

વણ્ણારોહવગ્ગો દુતિયો [ઇમસ્સુદ્દાનં તતિયવગ્ગપરિયોસાને ભવિસ્સતિ].