૫. ચૂળકુણાલવગ્ગો

૩૪૧. કણ્ડરીજાતકં (૪-૫-૧)

૧૬૧. નરાનમારામકરાસુ નારિસુ, અનેકચિત્તાસુ અનિગ્ગહાસુ ચ;

સબ્બત્થ નાપીતિકરાપિ [સબ્બ’ત્તના’પીતિકરાપિ (સી. સ્યા.)] ચે સિયા [સિયું (સ્યા.)], ન વિસ્સસે તિત્થસમા હિ નારિયો.

૧૬૨. યં વે [યઞ્ચ (સ્યા. ક.)] દિસ્વા કણ્ડરીકિન્નરાનં [કિન્નરકિન્નરીનં (સ્યા.), કિન્નરીકિન્નરાનં (ક.)], સબ્બિત્થિયો ન રમન્તિ અગારે;

તં તાદિસં મચ્ચં ચજિત્વા ભરિયા, અઞ્ઞં દિસ્વા પુરિસં પીઠસપ્પિં.

૧૬૩. બકસ્સ ચ બાવરિકસ્સ [પાવારિકસ્સ (સી.)] રઞ્ઞો, અચ્ચન્તકામાનુગતસ્સ ભરિયા;

અવાચરી [અચ્ચાચરિ (સ્યા.), અનાચરિ (ક.)] પટ્ઠવસાનુગસ્સ [બદ્ધવસાનુગસ્સ (સી. સ્યા.), પત્તવસાનુગતસ્સ (ક.)], કં વાપિ ઇત્થી નાતિચરે તદઞ્ઞં.

૧૬૪. પિઙ્ગિયાની સબ્બલોકિસ્સરસ્સ, રઞ્ઞો પિયા બ્રહ્મદત્તસ્સ ભરિયા;

અવાચરી પટ્ઠવસાનુગસ્સ, તં વાપિ સા નાજ્ઝગા કામકામિનીતિ.

કણ્ડરીજાતકં [કિન્નરીજાતકં (ક. સી. ક.), કુણ્ડલિકજાતકં (સ્યા.)] પઠમં.

૩૪૨. વાનરજાતકં (૪-૫-૨)

૧૬૫. અસક્ખિં વત અત્તાનં, ઉદ્ધાતું ઉદકા થલં;

ન દાનાહં પુન તુય્હં, વસં ગચ્છામિ વારિજ.

૧૬૬. અલમેતેહિ અમ્બેહિ, જમ્બૂહિ પનસેહિ ચ;

યાનિ પારં સમુદ્દસ્સ, વરં મય્હં ઉદુમ્બરો.

૧૬૭. યો ચ ઉપ્પતિતં અત્થં, ન ખિપ્પમનુબુજ્ઝતિ;

અમિત્તવસમન્વેતિ, પચ્છા ચ અનુતપ્પતિ.

૧૬૮. યો ચ ઉપ્પતિતં અત્થં, ખિપ્પમેવ નિબોધતિ;

મુચ્ચતે સત્તુસમ્બાધા, ન ચ પચ્છાનુતપ્પતીતિ.

વાનરજાતકં દુતિયં.

૩૪૩. કુન્તિનીજાતકં (૪-૫-૩)

૧૬૯. અવસિમ્હ તવાગારે, નિચ્ચં સક્કતપૂજિતા;

ત્વમેવ દાનિમકરિ, હન્દ રાજ વજામહં.

૧૭૦. યો વે કતે પટિકતે, કિબ્બિસે પટિકિબ્બિસે;

એવં તં સમ્મતી વેરં, વસ કુન્તિનિ માગમા.

૧૭૧. ન કતસ્સ ચ કત્તા ચ, મેત્તિ [મેત્તી (પી.), મિત્તી (ક.)] સન્ધીયતે પુન;

હદયં નાનુજાનાતિ, ગચ્છઞ્ઞેવ રથેસભ.

૧૭૨. કતસ્સ ચેવ કત્તા ચ, મેત્તિ સન્ધીયતે પુન;

ધીરાનં નો ચ બાલાનં, વસ કુન્તિનિ માગમાતિ.

કુન્તિનીજાતકં તતિયં.

૩૪૪. અમ્બજાતકં (૪-૫-૪)

૧૭૩. યો નીલિયં મણ્ડયતિ, સણ્ડાસેન વિહઞ્ઞતિ;

તસ્સ સા વસમન્વેતુ, યા તે અમ્બે અવાહરિ.

૧૭૪. વીસં વા પઞ્ચવીસં [પણ્ણુવીસં (ક. સી. પી.)] વા, ઊનતિંસં વ જાતિયા;

તાદિસા પતિ મા લદ્ધા [પતિં મા લદ્ધા (પી.), પતિ મા’લત્થ (?)], યા તે અમ્બે અવાહરિ.

૧૭૫. દીઘં ગચ્છતુ અદ્ધાનં, એકિકા અભિસારિકા;

સઙ્કેતે પતિ મા અદ્દ [મા અદ્દસ (સી. પી.)], યા તે અમ્બે અવાહરિ.

૧૭૬. અલઙ્કતા સુવસના, માલિની ચન્દનુસ્સદા;

એકિકા સયને સેતુ, યા તે અમ્બે અવાહરીતિ.

અમ્બજાતકં [અમ્બચોરજાતકં (ક. સી. પી.)] ચતુત્થં.

૩૪૫. ગજકુમ્ભજાતકં (૪-૫-૫)

૧૭૭. વનં યદગ્ગિ દહતિ, પાવકો કણ્હવત્તની;

કથં કરોસિ પચલક, એવં દન્ધપરક્કમો.

૧૭૮. બહૂનિ રુક્ખછિદ્દાનિ, પથબ્યા વિવરાનિ ચ;

તાનિ ચે નાભિસમ્ભોમ, હોતિ નો કાલપરિયાયો.

૧૭૯. યો દન્ધકાલે તરતિ, તરણીયે ચ દન્ધતિ;

સુક્ખપણ્ણંવ અક્કમ્મ, અત્થં ભઞ્જતિ અત્તનો.

૧૮૦. યો દન્ધકાલે દન્ધેતિ, તરણીયે ચ તારયિ;

સસીવ રત્તિં વિભજં, તસ્સત્થો પરિપૂરતીતિ.

ગજકુમ્ભજાતકં પઞ્ચમં.

૩૪૬. કેસવજાતકં (૪-૫-૬)

૧૮૧. મનુસ્સિન્દં જહિત્વાન, સબ્બકામસમિદ્ધિનં;

કથં નુ ભગવા કેસી, કપ્પસ્સ રમતિ અસ્સમે [રમતસ્સમે (ક.)].

૧૮૨. સાદૂની [સાધૂનિ (ક. સી. સ્યા. ક.)] રમણીયાનિ, સન્તિ વક્ખા મનોરમા;

સુભાસિતાનિ કપ્પસ્સ, નારદ રમયન્તિ મં.

૧૮૩. સાલીનં ઓદનં ભુઞ્જે, સુચિં મંસૂપસેચનં;

કથં સામાકનીવારં, અલોણં છાદયન્તિ તં.

૧૮૪. સાદું વા [અસાદું (પી.)] યદિ વાસાદું, અપ્પં વા યદિ વા બહું;

વિસ્સત્થો યત્થ ભુઞ્જેય્ય, વિસ્સાસપરમા રસાતિ.

કેસવજાતકં [કેસીજાતકં (ક.)] છટ્ઠં.

૩૪૭. અયકૂટજાતકં (૪-૫-૭)

૧૮૫. સબ્બાયસં કૂટમતિપ્પમાણં, પગ્ગય્હ યો [સો (પી.)] તિટ્ઠસિ અન્તલિક્ખે;

રક્ખાય મે [મં (સી.)] ત્વં વિહિતો નુસજ્જ, ઉદાહુ મે ચેતયસે [વાયમસે (સી. સ્યા.)] વધાય.

૧૮૬. દૂતો અહં રાજિધ રક્ખસાનં, વધાય તુય્હં પહિતોહમસ્મિ;

ઇન્દો ચ તં રક્ખતિ દેવરાજા, તેનુત્તમઙ્ગં ન તે [ન હિ (ક. સી. પી.), તે ન (ક.)] ફાલયામિ.

૧૮૭. સચે ચ મં રક્ખતિ દેવરાજા, દેવાનમિન્દો મઘવા સુજમ્પતિ;

કામં પિસાચા વિનદન્તુ સબ્બે, ન સન્તસે રક્ખસિયા પજાય.

૧૮૮. કામં કન્દન્તુ [કન્તન્તુ (ક.), કણ્ડન્તુ (સ્યા.)] કુમ્ભણ્ડા, સબ્બે પંસુપિસાચકા;

નાલં પિસાચા યુદ્ધાય, મહતી સા વિભિંસિકાતિ [વિભેસિકાતિ (સ્યા.), વિહેસિકાતિ (પી.)].

અયકૂટજાતકં સત્તમં.

૩૪૮. અરઞ્ઞજાતકં (૪-૫-૮)

૧૮૯. અરઞ્ઞા ગામમાગમ્મ, કિંસીલં કિંવતં અહં;

પુરિસં તાત સેવેય્યં, તં મે અક્ખાહિ પુચ્છિતો.

૧૯૦. યો તં વિસ્સાસયે તાત, વિસ્સાસઞ્ચ ખમેય્ય તે;

સુસ્સૂસી ચ તિતિક્ખી ચ, તં ભજેહિ ઇતો [તં ભજેય્યાસિતો (ક.)] ગતો.

૧૯૧. યસ્સ કાયેન વાચાય, મનસા નત્થિ દુક્કટં;

ઉરસીવ પતિટ્ઠાય, તં ભજેહિ ઇતો ગતો.

૧૯૨. હલિદ્દિરાગં કપિચિત્તં, પુરિસં રાગવિરાગિનં;

તાદિસં તાત મા સેવિ, નિમ્મનુસ્સમ્પિ ચે સિયાતિ.

અરઞ્ઞજાતકં અટ્ઠમં.

૩૪૯. સન્ધિભેદજાતકં (૪-૫-૯)

૧૯૩. નેવ ઇત્થીસુ સામઞ્ઞં, નાપિ ભક્ખેસુ સારથિ;

અથસ્સ સન્ધિભેદસ્સ, પસ્સ યાવ સુચિન્તિતં.

૧૯૪. અસિ તિક્ખોવ મંસમ્હિ, પેસુઞ્ઞં પરિવત્તતિ;

યત્થૂસભઞ્ચ સીહઞ્ચ, ભક્ખયન્તિ મિગાધમા.

૧૯૫. ઇમં સો સયનં સેતિ, યમિમં [યયિમં (સી. પી.), યિમં (ક.)] પસ્સસિ સારથિ;

યો વાચં સન્ધિભેદસ્સ, પિસુણસ્સ નિબોધતિ.

૧૯૬. તે જના સુખમેધન્તિ, નરા સગ્ગગતારિવ;

યે વાચં સન્ધિભેદસ્સ, નાવબોધન્તિ સારથીતિ.

સન્ધિભેદજાતકં નવમં.

૩૫૦. દેવતાપઞ્હજાતકં (૪-૫-૧૦)

૧૯૭. હન્તિ હત્થેહિ પાદેહિ, મુખઞ્ચ પરિસુમ્ભતિ;

સ વે રાજ પિયો હોતિ, કં તેન ત્વાભિપસ્સસિ [મભિપસ્સસિ (સી.)].

૧૯૮. અક્કોસતિ યથાકામં, આગમઞ્ચસ્સ ઇચ્છતિ;

સ વે રાજ પિયો હોતિ, કં તેન ત્વાભિપસ્સસિ.

૧૯૯. અબ્ભક્ખાતિ અભૂતેન, અલિકેનાભિસારયે;

સ વે રાજ પિયો હોતિ, કં તેન ત્વાભિપસ્સસિ.

૨૦૦. હરં અન્નઞ્ચ પાનઞ્ચ, વત્થસેનાસનાનિ ચ;

અઞ્ઞદત્થુહરા સન્તા, તે વે રાજ પિયા હોન્તિ;

કં તેન ત્વાભિપસ્સસીતિ.

દેવતાપઞ્હજાતકં દસમં.

ચૂળકુણાલવગ્ગો પઞ્ચમો.

તસ્સુદ્દાનં –

નરાનં અસક્ખિવસિમ્હવરો, નીલિયમગ્ગિવરઞ્ચ પુન;

પુન રસાયસકૂટવરો, તથારઞ્ઞ સારથિ હન્તિ દસાતિ.

અથ વગ્ગુદ્દાનં –

કાલિઙ્ગં [વિવરં (બહૂસુ)] પુચિમન્દઞ્ચ, કુટિદૂસક કોકિલા [કુટિદૂસં બહુભાણકં (બહૂસુ)];

ચૂળકુણાલવગ્ગો સો, પઞ્ચમો સુપ્પકાસિતોતિ.

ચતુક્કનિપાતં નિટ્ઠિતં.