૪. ચતુક્કનિપાતો

૧. કાલિઙ્ગવગ્ગો

૩૦૧. ચૂળકાલિઙ્ગજાતકં (૪-૧-૧)

૧. વિવરથિમાસં [વિવરથ ઇમાસં (સી. સ્યા. પી.)] દ્વારં, નગરં પવિસન્તુ [પવિસિતું મયા; (ક.)] અરુણરાજસ્સ;

સીહેન સુસિટ્ઠેન, સુરક્ખિતં [સુસત્થેન, સુરક્ખિતં (સી. પી.), સુસિટ્ઠેન (ક.)] નન્દિસેનેન.

૨. જયો કલિઙ્ગાનમસય્હસાહિનં, પરાજયો અનયો [અજયો (સ્યા.), અન્વિતો (ક.)] અસ્સકાનં;

ઇચ્ચેવ તે ભાસિતં બ્રહ્મચારિ, ન ઉજ્જુભૂતા વિતથં ભણન્તિ.

૩. દેવા મુસાવાદમુપાતિવત્તા, સચ્ચં ધનં પરમં તેસુ [તથં પેમકરં નુ (ક.), તથં પરમં કરં નુ (સ્યા.)] સક્ક;

તં તે મુસા ભાસિતં દેવરાજ, કિં વા પટિચ્ચ મઘવા મહિન્દ.

૪. નનુ તે સુતં બ્રાહ્મણ ભઞ્ઞમાને, દેવા ન ઇસ્સન્તિ પુરિસપરક્કમસ્સ;

દમો સમાધિ મનસો અભેજ્જો [અદેજ્જો (સી. પી.), અભિજ્જો (ક.)], અબ્યગ્ગતા નિક્કમનઞ્ચ [નિક્ખમનઞ્ચ (સી.)] કાલે;

દળ્હઞ્ચ વિરિયં પુરિસપરક્કમો ચ, તેનેવ આસિ વિજયો અસ્સકાનન્તિ.

ચૂળકાલિઙ્ગજાતકં પઠમં.

૩૦૨. મહાઅસ્સારોહજાતકં (૪-૧-૨)

૫. અદેય્યેસુ દદં દાનં, દેય્યેસુ નપ્પવેચ્છતિ;

આપાસુ બ્યસનં પત્તો, સહાયં નાધિગચ્છતિ.

૬. નાદેય્યેસુ દદં દાનં, દેય્યેસુ યો પવેચ્છતિ;

આપાસુ બ્યસનં પત્તો, સહાયમધિગચ્છતિ.

૭. સઞ્ઞોગસમ્ભોગવિસેસદસ્સનં, અનરિયધમ્મેસુ સઠેસુ નસ્સતિ;

કતઞ્ચ અરિયેસુ ચ અજ્જવેસુ, મહપ્ફલં હોતિ અણુમ્પિ તાદિસુ.

૮. યો પુબ્બે કતકલ્યાણો, અકા લોકે સુદુક્કરં;

પચ્છા કયિરા ન વા કયિરા, અચ્ચન્તં પૂજનારહોતિ.

મહાઅસ્સારોહજાતકં દુતિયં.

૩૦૩. એકરાજજાતકં (૪-૧-૩)

૯. અનુત્તરે કામગુણે સમિદ્ધે, ભુત્વાન પુબ્બે વસી એકરાજ;

સો દાનિ દુગ્ગે નરકમ્હિ ખિત્તો, નપ્પજ્જહે વણ્ણબલં પુરાણં.

૧૦. પુબ્બેવ ખન્તી ચ તપો ચ મય્હં, સમ્પત્થિતા દુબ્ભિસેન [દબ્બસેના (સી. પી.)] અહોસિ;

તં દાનિ લદ્ધાન કથં નુ રાજ, જહે અહં વણ્ણબલં પુરાણં.

૧૧. સબ્બા કિરેવં પરિનિટ્ઠિતાનિ, યસસ્સિનં પઞ્ઞવન્તં વિસય્હ;

યસો ચ લદ્ધા પુરિમં ઉળારં, નપ્પજ્જહે વણ્ણબલં પુરાણં.

૧૨. પનુજ્જ દુક્ખેન સુખં જનિન્દ, સુખેન વા દુક્ખમસય્હસાહિ;

ઉભયત્થ સન્તો અભિનિબ્બુતત્તા, સુખે ચ દુક્ખે ચ ભવન્તિ તુલ્યાતિ.

એકરાજજાતકં તતિયં.

૩૦૪. દદ્દરજાતકં (૪-૧-૪)

૧૩. ઇમાનિ મં દદ્દર તાપયન્તિ, વાચાદુરુત્તાનિ મનુસ્સલોકે;

મણ્ડૂકભક્ખા ઉદકન્તસેવી, આસીવિસં મં અવિસા સપન્તિ.

૧૪. સકા રટ્ઠા પબ્બાજિતો, અઞ્ઞં જનપદં ગતો;

મહન્તં કોટ્ઠં કયિરાથ, દુરુત્તાનં [દુરુત્તાનિ (ક.)] નિધેતવે.

૧૫. યત્થ પોસં ન જાનન્તિ, જાતિયા વિનયેન વા;

ન તત્થ માનં કયિરાથ, વસમઞ્ઞાતકે જને.

૧૬. વિદેસવાસં વસતો, જાતવેદસમેનપિ [જાતવેદભયેનપિ (ક.)];

ખમિતબ્બં સપઞ્ઞેન, અપિ દાસસ્સ તજ્જિતન્તિ.

દદ્દરજાતકં ચતુત્થં.

૩૦૫. સીલવીમંસનજાતકં (૪-૧-૫)

૧૭. નત્થિ લોકે રહો નામ, પાપકમ્મં પકુબ્બતો;

પસ્સન્તિ વનભૂતાનિ, તં બાલો મઞ્ઞતી રહો.

૧૮. અહં રહો ન પસ્સામિ, સુઞ્ઞં વાપિ ન વિજ્જતિ;

યત્થ અઞ્ઞં [સુઞ્ઞં (સ્યા. ક.)] ન પસ્સામિ, અસુઞ્ઞં હોતિ તં મયા.

૧૯. દુજ્જચ્ચો ચ સુજચ્ચો [અજચ્ચો (પી.)] ચ, નન્દો ચ સુખવડ્ઢિતો [સુખવચ્છકો (સી.), સુખવચ્છનો (સ્યા. પી.)];

વેજ્જો ચ અદ્ધુવસીલો [અથ સીલો (ક.)] ચ, તે ધમ્મં જહુ મત્થિકા.

૨૦. બ્રાહ્મણો ચ કથં જહે, સબ્બધમ્માન પારગૂ;

યો ધમ્મમનુપાલેતિ, ધિતિમા સચ્ચનિક્કમોતિ.

સીલવીમંસનજાતકં પઞ્ચમં.

૩૦૬. સુજાતજાતકં (૪-૧-૬)

૨૧. કિમણ્ડકા ઇમે દેવ, નિક્ખિત્તા કંસમલ્લકે;

ઉપલોહિતકા વગ્ગૂ, તં [તે (પી.)] મે અક્ખાહિ પુચ્છિતો.

૨૨. યાનિ પુરે તુવં દેવિ, ભણ્ડુ નન્તકવાસિની;

ઉચ્છઙ્ગહત્થા પચિનાસિ, તસ્સા તે કોલિયં ફલં.

૨૩. ઉડ્ડય્હતે ન રમતિ, ભોગા વિપ્પજહન્તિ તં [વિપ્પજહન્તિ’મં (?)];

તત્થેવિમં પટિનેથ, યત્થ કોલં પચિસ્સતિ.

૨૪. હોન્તિ હેતે મહારાજ, ઇદ્ધિપ્પત્તાય [ઇદ્ધિમત્તાય (ક.)] નારિયા;

ખમ દેવ સુજાતાય, માસ્સા [માસુ (ક.)] કુજ્ઝ રથેસભાતિ.

સુજાતજાતકં છટ્ઠં.

૩૦૭. પલાસજાતકં (૪-૧-૭)

૨૫. અચેતનં બ્રાહ્મણ અસ્સુણન્તં, જાનો અજાનન્તમિમં પલાસં;

આરદ્ધવિરિયો ધુવં અપ્પમત્તો, સુખસેય્યં પુચ્છસિ કિસ્સ હેતુ.

૨૬. દૂરે સુતો ચેવ બ્રહા ચ રુક્ખો, દેસે ઠિતો ભૂતનિવાસરૂપો;

તસ્મા નમસ્સામિ ઇમં પલાસં, યે ચેત્થ ભૂતા તે [તે ચ (સી. પી.)] ધનસ્સ હેતુ.

૨૭. સો તે કરિસ્સામિ યથાનુભાવં, કતઞ્ઞુતં બ્રાહ્મણ પેક્ખમાનો;

કથઞ્હિ આગમ્મ સતં સકાસે, મોઘાનિ તે અસ્સુ પરિફન્દિતાનિ.

૨૮. યો તિન્દુકરુક્ખસ્સ પરો [પુરો (ક.)] પિલક્ખો [પિલક્ખુ (સી. પી.), મિલક્ખુ (ક.)], પરિવારિતો પુબ્બયઞ્ઞો ઉળારો;

તસ્સેસ મૂલસ્મિં નિધિ નિખાતો, અદાયાદો ગચ્છ તં ઉદ્ધરાહીતિ.

પલાસજાતકં સત્તમં.

૩૦૮. સકુણજાતકં (૪-૧-૮)

૨૯. અકરમ્હસ તે કિચ્ચં, યં બલં અહુવમ્હસે;

મિગરાજ નમો ત્યત્થુ, અપિ કિઞ્ચિ લભામસે.

૩૦. મમ લોહિતભક્ખસ્સ, નિચ્ચં લુદ્દાનિ કુબ્બતો;

દન્તન્તરગતો સન્તો, તં બહું યમ્પિ જીવસિ.

૩૧. અકતઞ્ઞુમકત્તારં, કતસ્સ અપ્પટિકારકં;

યસ્મિં કતઞ્ઞુતા નત્થિ, નિરત્થા તસ્સ સેવના.

૩૨. યસ્સ સમ્મુખચિણ્ણેન, મિત્તધમ્મો ન લબ્ભતિ;

અનુસૂય [અનુસુય્ય (સી. પી.)] મનક્કોસં, સણિકં તમ્હા અપક્કમેતિ.

સકુણજાતકં અટ્ઠમં.

૩૦૯. છવકજાતકં (૪-૧-૯)

૩૩. સબ્બમિદં ચરિમં કતં [ચરિમવતં (સી. પી.)], ઉભો ધમ્મં ન પસ્સરે;

ઉભો પકતિયા ચુતા, યો ચાયં મન્તેજ્ઝાપેતિ [મન્તજ્ઝાયતિ (સી.), સજ્ઝાપયતિ (પી.)];

યો ચ મન્તં અધીયતિ.

૩૪. સાલીનં ઓદનં ભુઞ્જે, સુચિં મંસૂપસેચનં;

તસ્મા એતં ન સેવામિ, ધમ્મં ઇસીહિ સેવિતં.

૩૫. પરિબ્બજ મહા લોકો [મહાબ્રહ્મે (ક.)], પચન્તઞ્ઞેપિ પાણિનો;

મા તં અધમ્મો આચરિતો, અસ્મા કુમ્ભમિવાભિદા.

૩૬. ધિરત્થુ તં યસલાભં, ધનલાભઞ્ચ બ્રાહ્મણ;

યા વુત્તિ વિનિપાતેન, અધમ્મચરણેન વાતિ.

છવકજાતકં નવમં.

૩૧૦. સેય્યજાતકં (૪-૧-૧૦)

૩૭. સસમુદ્દપરિયાયં, મહિં સાગરકુણ્ડલં;

ન ઇચ્છે સહ નિન્દાય, એવં સેય્ય [સય્હ (સી. સ્યા. પી.)] વિજાનહિ.

૩૮. ધિરત્થુ તં યસલાભં, ધનલાભઞ્ચ બ્રાહ્મણ;

યા વુત્તિ વિનિપાતેન, અધમ્મચરણેન વા.

૩૯. અપિ ચે પત્તમાદાય, અનગારો પરિબ્બજે;

સાયેવ જીવિકા સેય્યો, યા ચાધમ્મેન એસના.

૪૦. અપિ ચે પત્તમાદાય, અનગારો પરિબ્બજે;

અઞ્ઞં અહિંસયં લોકે, અપિ રજ્જેન તં વરન્તિ.

સેય્યજાતકં [સય્હજાતકં (સી. સ્યા. પી.)] દસમં.

કાલિઙ્ગવગ્ગો [વિવરવગ્ગો (સી. પી.)] પઠમો.

તસ્સુદ્દાનં –

વિવરઞ્ચ અદેય્ય સમિદ્ધવરં, અથ દદ્દર પાપમહાતિરહો;

અથ કોલિ પલાસવરઞ્ચ કર, ચરિમં સસમુદ્દવરેન દસાતિ.

૨. પુચિમન્દવગ્ગો

૩૧૧. પુચિમન્દજાતકં (૪-૨-૧)

૪૧. ઉટ્ઠેહિ ચોર કિં સેસિ, કો અત્થો સુપનેન [સુપિતેન (સી.), સુપિનેન (પી. ક.)] તે;

મા તં ગહેસું [ગણ્હેય્યું (ક.)] રાજાનો, ગામે કિબ્બિસકારકં.

૪૨. યં નુ [નૂન (સ્યા.)] ચોરં ગહેસ્સન્તિ, ગામે કિબ્બિસકારકં;

કિં તત્થ પુચિમન્દસ્સ, વને જાતસ્સ તિટ્ઠતો.

૪૩. ન ત્વં અસ્સત્થ જાનાસિ, મમ ચોરસ્સ ચન્તરં;

ચોરં ગહેત્વા રાજાનો, ગામે કિબ્બિસકારકં;

અપ્પેન્તિ [અચ્ચેન્તિ (સ્યા.)] નિમ્બસૂલસ્મિં, તસ્મિં મે સઙ્કતે મનો.

૪૪. સઙ્કેય્ય સઙ્કિતબ્બાનિ, રક્ખેય્યાનાગતં ભયં;

અનાગતભયા ધીરો, ઉભો લોકે અવેક્ખતીતિ.

પુચિમન્દજાતકં પઠમં.

૩૧૨. કસ્સપમન્દિયજાતકં (૪-૨-૨)

૪૫. અપિ કસ્સપ મન્દિયા, યુવા સપતિ હન્તિ [સમ્પટિહન્તિ (ક.)] વા;

સબ્બં તં ખમતે ધીરો, પણ્ડિતો તં તિતિક્ખતિ.

૪૬. સચેપિ સન્તો વિવદન્તિ, ખિપ્પં સન્ધીયરે પુન;

બાલા પત્તાવ ભિજ્જન્તિ, ન તે સમથમજ્ઝગૂ.

૪૭. એતે ભિય્યો સમાયન્તિ, સન્ધિ તેસં ન જીરતિ;

યો ચાધિપન્નં જાનાતિ, યો ચ જાનાતિ દેસનં.

૪૮. એસો હિ ઉત્તરિતરો, ભારવહો ધુરદ્ધરો;

યો પરેસાધિપન્નાનં, સયં સન્ધાતુમરહતીતિ.

કસ્સપમન્દિયજાતકં દુતિયં.

૩૧૩. ખન્તીવાદીજાતકં (૪-૨-૩)

૪૯. યો તે હત્થે ચ પાદે ચ, કણ્ણનાસઞ્ચ છેદયિ;

તસ્સ કુજ્ઝ મહાવીર, મા રટ્ઠં વિનસા [વિનસ્સ (ક. સી. સ્યા. ક.)] ઇદં.

૫૦. યો મે હત્થે ચ પાદે ચ, કણ્ણનાસઞ્ચ છેદયિ;

ચિરં જીવતુ સો રાજા, ન હિ કુજ્ઝન્તિ માદિસા.

૫૧. અહૂ અતીતમદ્ધાનં [અહુ અતીતમદ્ધાને (સ્યા. પી. ક.)], સમણો ખન્તિદીપનો;

તં ખન્તિયાયેવ ઠિતં, કાસિરાજા અછેદયિ.

૫૨. તસ્સ કમ્મ [કમ્મસ્સ (સી. પી.)] ફરુસસ્સ, વિપાકો કટુકો અહુ;

યં કાસિરાજા વેદેસિ, નિરયમ્હિ સમપ્પિતોતિ.

ખન્તીવાદીજાતકં તતિયં.

૩૧૪. લોહકુમ્ભિજાતકં (૪-૨-૪)

૫૩. દુજ્જીવિતમજીવિમ્હ, યે સન્તે [યેસં નો (સ્યા. ક.)] ન દદમ્હસે;

વિજ્જમાનેસુ ભોગેસુ, દીપં નાકમ્હ અત્તનો.

૫૪. સટ્ઠિ [સટ્ઠિં (સ્યા.)] વસ્સસહસ્સાનિ, પરિપુણ્ણાનિ સબ્બસો;

નિરયે પચ્ચમાનાનં, કદા અન્તો ભવિસ્સતિ.

૫૫. નત્થિ અન્તો કુતો અન્તો, ન અન્તો પટિદિસ્સતિ;

તદા હિ પકતં પાપં, મમ તુય્હઞ્ચ મારિસા [મારિસ (સી. સ્યા. પી.)].

૫૬. સોહં નૂન ઇતો ગન્ત્વા, યોનિં લદ્ધાન માનુસિં;

વદઞ્ઞૂ સીલસમ્પન્નો, કાહામિ કુસલં બહુન્તિ.

લોહકુમ્ભિજાતકં ચતુત્થં.