૪. કોકિલવગ્ગો

૩૩૧. કોકિલજાતકં (૪-૪-૧)

૧૨૧. યો વે કાલે અસમ્પત્તે, અતિવેલં પભાસતિ;

એવં સો નિહતો સેતિ, કોકિલાયિવ અત્રજો.

૧૨૨. ન હિ સત્થં સુનિસિતં, વિસં હલાહલામિવ [હલાહલં ઇવ (પી.)];

એવં નિકટ્ઠે [નિક્કડ્ઢે (સ્યા.), નિકડ્ઢે (ક.)] પાતેતિ, વાચા દુબ્ભાસિતા યથા.

૧૨૩. તસ્મા કાલે અકાલે વા [અકાલે ચ (સી. સ્યા.)], વાચં રક્ખેય્ય પણ્ડિતો;

નાતિવેલં પભાસેય્ય, અપિ અત્તસમમ્હિ વા.

૧૨૪. યો ચ કાલે મિતં ભાસે, મતિપુબ્બો વિચક્ખણો;

સબ્બે અમિત્તે આદેતિ, સુપણ્ણો ઉરગામિવાતિ.

કોકિલજાતકં [કોકાલિકજાતકં (સબ્બત્થ)] પઠમં.

૩૩૨. રથલટ્ઠિજાતકં (૪-૪-૨)

૧૨૫. અપિ હન્ત્વા હતો બ્રૂતિ, જેત્વા જિતોતિ ભાસતિ;

પુબ્બવક્ખાયિનો [પુબ્બમક્ખાયિનો (સી. સ્યા.)] રાજ, અઞ્ઞદત્થુ [એકદત્થુ (સી. પી.)] ન સદ્દહે.

૧૨૬. તસ્મા પણ્ડિતજાતિયો, સુણેય્ય ઇતરસ્સપિ;

ઉભિન્નં વચનં સુત્વા, યથા ધમ્મો તથા કરે.

૧૨૭. અલસો ગિહી કામભોગી ન સાધુ, અસઞ્ઞતો પબ્બજિતો ન સાધુ;

રાજા ન સાધુ અનિસમ્મકારી, યો પણ્ડિતો કોધનો તં ન સાધુ.

૧૨૮. નિસમ્મ ખત્તિયો કયિરા, નાનિસમ્મ દિસમ્પતિ;

નિસમ્મકારિનો રાજ [રઞ્ઞો (સી. સ્યા.)], યસો કિત્તિ ચ વડ્ઢતીતિ.

રથલટ્ઠિજાતકં દુતિયં.

૩૩૩. પક્કગોધજાતકં (૪-૪-૩)

૧૨૯. તદેવ મે ત્વં વિદિતો, વનમજ્ઝે રથેસભ;

યસ્સ તે ખગ્ગબદ્ધસ્સ, સન્નદ્ધસ્સ તિરીટિનો;

અસ્સત્થદુમસાખાય, પક્કા ગોધા પલાયથ.

૧૩૦. નમે નમન્તસ્સ ભજે ભજન્તં, કિચ્ચાનુકુબ્બસ્સ કરેય્ય કિચ્ચં;

નાનત્થકામસ્સ કરેય્ય અત્થં, અસમ્ભજન્તમ્પિ ન સમ્ભજેય્ય.

૧૩૧. ચજે ચજન્તં વનથં ન કયિરા, અપેતચિત્તેન ન સમ્ભજેય્ય;

દિજો દુમં ખીણફલન્તિ [ફલંવ (ક. સી. સ્યા. ક.), દુકનિપાતે પુટભત્તજાતકેન સંસન્દેતબ્બં] ઞત્વા, અઞ્ઞં સમેક્ખેય્ય મહા હિ લોકો.

૧૩૨. સો તે કરિસ્સામિ યથાનુભાવં, કતઞ્ઞુતં ખત્તિયે [ખત્તિયો (સ્યા. ક.)] પેક્ખમાનો;

સબ્બઞ્ચ તે ઇસ્સરિયં દદામિ, યસ્સિચ્છસી તસ્સ તુવં દદામીતિ.

પક્કગોધજાતકં [ગોધજાતકં (સી. સ્યા. પી.)] તતિયં.

૩૩૪. રાજોવાદજાતકં (૪-૪-૪)

૧૩૩. ગવં ચે તરમાનાનં, જિમ્હં ગચ્છતિ પુઙ્ગવો;

સબ્બા તા જિમ્હં ગચ્છન્તિ [સબ્બા ગાવી જિમ્હં યન્તિ (સી. સ્યા.)], નેત્તે જિમ્હં ગતે સતિ.

૧૩૪. એવમેવ મનુસ્સેસુ, યો હોતિ સેટ્ઠસમ્મતો;

સો ચે અધમ્મં ચરતિ, પગેવ ઇતરા પજા;

સબ્બં રટ્ઠં દુખં સેતિ, રાજા ચે હોતિ અધમ્મિકો.

૧૩૫. ગવં ચે તરમાનાનં, ઉજું ગચ્છતિ પુઙ્ગવો;

સબ્બા ગાવી ઉજું યન્તિ [સબ્બા તા ઉજું ગચ્છન્તિ (પી. અ. નિ. ૪.૭૦)], નેત્તે ઉજું ગતે સતિ.

૧૩૬. એવમેવ મનુસ્સેસુ, યો હોતિ સેટ્ઠસમ્મતો;

સો સચે ધમ્મં ચરતિ, પગેવ ઇતરા પજા;

સબ્બં રટ્ઠં સુખં સેતિ, રાજા ચે હોતિ ધમ્મિકોતિ.

રાજોવાદજાતકં ચતુત્થં.

૩૩૫. જમ્બુકજાતકં (૪-૪-૫)

૧૩૭. બ્રહા પવડ્ઢકાયો સો, દીઘદાઠો ચ જમ્બુક;

ન ત્વં તત્થ કુલે જાતો, યત્થ ગણ્હન્તિ કુઞ્જરં.

૧૩૮. અસીહો સીહમાનેન, યો અત્તાનં વિકુબ્બતિ;

કોત્થૂવ [કુટ્ઠૂવ (સી.), કુત્થુવ (સ્યા. પી)] ગજમાસજ્જ, સેતિ ભૂમ્યા અનુત્થુનં.

૧૩૯. યસસ્સિનો ઉત્તમપુગ્ગલસ્સ, સઞ્જાતખન્ધસ્સ મહબ્બલસ્સ;

અસમેક્ખિય થામબલૂપપત્તિં, સ સેતિ નાગેન હતોયં જમ્બુકો.

૧૪૦. યો ચીધ કમ્મં કુરુતે પમાય, થામબ્બલં અત્તનિ સંવિદિત્વા;

જપ્પેન મન્તેન સુભાસિતેન, પરિક્ખવા સો વિપુલં જિનાતીતિ.

જમ્બુકજાતકં પઞ્ચમં.

૩૩૬. બ્રહાછત્તજાતકં (૪-૪-૬)

૧૪૧. તિણં તિણન્તિ લપસિ, કો નુ તે તિણમાહરિ;

કિં નુ તે તિણકિચ્ચત્થિ, તિણમેવ પભાસસિ.

૧૪૨. ઇધાગમા બ્રહ્મચારી, બ્રહા છત્તો બહુસ્સુતો;

સો મે [સો વે (ક.)] સબ્બં સમાદાય, તિણં નિક્ખિપ્પ ગચ્છતિ.

૧૪૩. એવેતં હોતિ કત્તબ્બં, અપ્પેન બહુમિચ્છતા;

સબ્બં સકસ્સ આદાનં, અનાદાનં તિણસ્સ ચ. ( ) [(તિણસ્સ ચાટીસુ ગતો, તત્થ કા પરિદેવના) (સી. સ્યા.) (ચાટીસુ પક્ખિપિત્વાન, તત્થ કા પરિદેવના) (ક.)]

૧૪૪. સીલવન્તો ન કુબ્બન્તિ, બાલો સીલાનિ કુબ્બતિ;

અનિચ્ચસીલં દુસ્સીલ્યં [દુસ્સીલં (પી.)], કિં પણ્ડિચ્ચં કરિસ્સતીતિ.

બ્રહાછત્તજાતકં છટ્ઠં.

૩૩૭. પીઠજાતકં (૪-૪-૭)

૧૪૫. ન તે પીઠમદાયિમ્હા [મદાસિમ્હ (પી. ક.)], ન પાનં નપિ ભોજનં;

બ્રહ્મચારિ ખમસ્સુ મે, એતં પસ્સામિ અચ્ચયં.

૧૪૬. નેવાભિસજ્જામિ ન ચાપિ કુપ્પે, ન ચાપિ મે અપ્પિયમાસિ કિઞ્ચિ;

અથોપિ મે આસિ મનોવિતક્કો, એતાદિસો નૂન કુલસ્સ ધમ્મો.

૧૪૭. એસસ્માકં કુલે ધમ્મો, પિતુપિતામહો સદા;

આસનં ઉદકં પજ્જં, સબ્બેતં નિપદામસે.

૧૪૮. એસસ્માકં કુલે ધમ્મો, પિતુપિતામહો સદા;

સક્કચ્ચં ઉપતિટ્ઠામ, ઉત્તમં વિય ઞાતકન્તિ.

પીઠજાતકં સત્તમં.

૩૩૮. થુસજાતકં (૪-૪-૮)

૧૪૯. વિદિતં થુસં ઉન્દુરાનં [ઉન્દૂરાનં (ક.)], વિદિતં પન તણ્ડુલં;

થુસં થુસં [થુસં થૂલં (સી.)] વિવજ્જેત્વા, તણ્ડુલં પન ખાદરે.

૧૫૦. યા મન્તના અરઞ્ઞસ્મિં, યા ચ ગામે નિકણ્ણિકા;

યઞ્ચેતં ઇતિ ચીતિ ચ, એતમ્પિ વિદિતં મયા.

૧૫૧. ધમ્મેન કિર જાતસ્સ, પિતા પુત્તસ્સ મક્કટો;

દહરસ્સેવ સન્તસ્સ, દન્તેહિ ફલમચ્છિદા.

૧૫૨. યમેતં પરિસપ્પસિ [પરિસબ્બેસિ (ક.)], અજકાણોવ સાસપે;

યોપાયં હેટ્ઠતો સેતિ [સેસિ (સી.)], એતમ્પિ વિદિતં મયાતિ.

થુસજાતકં અટ્ઠમં.

૩૩૯. બાવેરુજાતકં (૪-૪-૯)

૧૫૩. અદસ્સનેન મોરસ્સ, સિખિનો મઞ્જુભાણિનો;

કાકં તત્થ અપૂજેસું, મંસેન ચ ફલેન ચ.

૧૫૪. યદા ચ સરસમ્પન્નો, મોરો બાવેરુમાગમા;

અથ લાભો ચ સક્કારો, વાયસસ્સ અહાયથ.

૧૫૫. યાવ નુપ્પજ્જતી બુદ્ધો, ધમ્મરાજા પભઙ્કરો;

તાવ અઞ્ઞે અપૂજેસું, પુથૂ સમણબ્રાહ્મણે.

૧૫૬. યદા ચ સરસમ્પન્નો, બુદ્ધો ધમ્મં અદેસયિ;

અથ લાભો ચ સક્કારો, તિત્થિયાનં અહાયથાતિ.

બાવેરુજાતકં નવમં.

૩૪૦. વિસય્હજાતકં (૪-૪-૧૦)

૧૫૭. અદાસિ દાનાનિ પુરે વિસય્હ, દદતો ચ તે ખયધમ્મો અહોસિ;

ઇતો પરં ચે ન દદેય્ય દાનં, તિટ્ઠેય્યું તે સંયમન્તસ્સ ભોગા.

૧૫૮. અનરિયમરિયેન સહસ્સનેત્ત, સુદુગ્ગતેનાપિ અકિચ્ચમાહુ;

મા વો ધનં તં અહુ દેવરાજ [અહુવા જનિન્દ (ક. સી. સ્યા. પી.)], યં ભોગહેતુ વિજહેમુ સદ્ધં.

૧૫૯. યેન એકો રથો યાતિ, યાતિ તેનાપરો રથો;

પોરાણં નિહિતં વત્તં, વત્તતઞ્ઞેવ [વદ્ધં, વદ્ધતઞ્ઞેવ (ક. સી. પી.)] વાસવ.

૧૬૦. યદિ હેસ્સતિ દસ્સામ, અસન્તે કિં દદામસે;

એવંભૂતાપિ દસ્સામ, મા દાનં પમદમ્હસેતિ.

વિસય્હજાતકં દસમં.

કોકિલવગ્ગો [કોકાલિકવગ્ગો (ક.)] ચતુત્થો.

તસ્સુદ્દાનં –

અતિવેલપભાસતિ જીતવરો, વનમજ્ઝ રથેસભ જિમ્હગમો;

અથ જમ્બુ તિણાસનપીઠવરં, અથ તણ્ડુલ મોર વિસય્હ દસાતિ.