૩. કુટિદૂસકવગ્ગો

૩૨૧. કુટિદૂસકજાતકં (૪-૩-૧)

૮૧. મનુસ્સસ્સેવ તે સીસં, હત્થપાદા ચ વાનર;

અથ કેન નુ વણ્ણેન, અગારં તે ન વિજ્જતિ.

૮૨. મનુસ્સસ્સેવ મે સીસં, હત્થપાદા ચ સિઙ્ગિલ [સિઙ્ગાલ (ક.), પિઙ્ગલ (ટીકા)];

યાહુ સેટ્ઠા મનુસ્સેસુ, સા મે પઞ્ઞા ન વિજ્જતિ.

૮૩. અનવટ્ઠિતચિત્તસ્સ, લહુચિત્તસ્સ દુબ્ભિનો [દૂભિનો (પી.)];

નિચ્ચં અદ્ધુવસીલસ્સ, સુખભાવો [સુચિભાવો (સી.), સુખભાગો (?)] ન વિજ્જતિ.

૮૪. સો કરસ્સુ આનુભાવં, વીતિવત્તસ્સુ સીલિયં;

સીતવાતપરિત્તાણં, કરસ્સુ કુટવં [કુટિકં (સી. સ્યા.)] કપીતિ.

કુટિદૂસક [સિઙ્ગાલસકુણ (ક.)] જાતકં પઠમં.

૩૨૨. દુદ્દુભજાતકં (૪-૩-૨)

૮૫. દુદ્દુભાયતિ [દદ્દભાયતિ (સી. પી.)] ભદ્દન્તે, યસ્મિં દેસે વસામહં;

અહમ્પેતં ન જાનામિ, કિમેતં દુદ્દુભાયતિ.

૮૬. બેલુવં પતિતં સુત્વા, દુદ્દુભન્તિ [દદ્દભન્તિ (સી.)] સસો જવિ;

સસસ્સ વચનં સુત્વા, સન્તત્તા મિગવાહિની.

૮૭. અપ્પત્વા પદવિઞ્ઞાણં, પરઘોસાનુસારિનો;

પનાદપરમા બાલા, તે હોન્તિ પરપત્તિયા.

૮૮. યે ચ સીલેન સમ્પન્ના, પઞ્ઞાયૂપસમે રતા;

આરકા વિરતા ધીરા, ન હોન્તિ પરપત્તિયાતિ.

દુદ્દુભજાતકં [દદ્દભજાતકં (સી. પી.)] દુતિયં.

૩૨૩. બ્રહ્મદત્તજાતકં (૪-૩-૩)

૮૯. દ્વયં યાચનકો રાજ, બ્રહ્મદત્ત નિગચ્છતિ;

અલાભં ધનલાભં વા, એવં ધમ્મા હિ યાચના.

૯૦. યાચનં રોદનં આહુ, પઞ્ચાલાનં રથેસભ;

યો યાચનં પચ્ચક્ખાતિ, તમાહુ પટિરોદનં.

૯૧. મા મદ્દસંસુ રોદન્તં, પઞ્ચાલા સુસમાગતા;

તુવં વા પટિરોદન્તં, તસ્મા ઇચ્છામહં રહો.

૯૨. દદામિ તે બ્રાહ્મણ રોહિણીનં, ગવં સહસ્સં સહ પુઙ્ગવેન;

અરિયો હિ અરિયસ્સ કથં ન દજ્જા [દજ્જે (સી.), દજ્જં (?)], સુત્વાન ગાથા તવ ધમ્મયુત્તાતિ.

બ્રહ્મદત્તજાતકં તતિયં.

૩૨૪. ચમ્મસાટકજાતકં (૪-૩-૪)

૯૩. કલ્યાણરૂપો વતયં ચતુપ્પદો, સુભદ્દકો ચેવ સુપેસલો ચ;

યો બ્રાહ્મણં જાતિમન્તૂપપન્નં, અપચાયતિ મેણ્ડવરો યસસ્સી.

૯૪. મા બ્રાહ્મણ ઇત્તરદસ્સનેન, વિસ્સાસમાપજ્જિ ચતુપ્પદસ્સ;

દળ્હપ્પહારં અભિકઙ્ખમાનો [અભિકત્તુકામો (સ્યા.)], અવસક્કતી દસ્સતિ સુપ્પહારં.

૯૫. ઊરુટ્ઠિ [ઊરટ્ઠિ (સી.)] ભગ્ગં પવટ્ટિતો [પતિતો (સી. સ્યા.)] ખારિભારો, સબ્બઞ્ચ ભણ્ડં બ્રાહ્મણસ્સ [બ્રાહ્મણસ્સીધ (ક. સી. પી.), બ્રાહ્મણસ્સેવ (ક. સી. સ્યા. ક.)] ભિન્નં;

ઉભોપિ બાહા પગ્ગય્હ [પગ્ગય્યેવ (સ્યા.), પગ્ગહીય (?)] કન્દતિ [બાહા પગ્ગય્ય કન્દતિ (પી. ક.)], અભિધાવથ હઞ્ઞતે બ્રહ્મચારી.

૯૬. એવં સો નિહતો સેતિ, યો અપૂજં પસંસતિ [નમસ્સતિ (પી.)];

યથાહમજ્જ પહતો, હતો મેણ્ડેન દુમ્મતીતિ.

ચમ્મસાટકજાતકં ચતુત્થં.

૩૨૫. ગોધરાજજાતકં (૪-૩-૫)

૯૭. સમણં તં મઞ્ઞમાનો, ઉપગચ્છિમસઞ્ઞતં;

સો મં દણ્ડેન પાહાસિ, યથા અસ્સમણો તથા.

૯૮. કિં તે જટાહિ દુમ્મેધ, કિં તે અજિનસાટિયા;

અબ્ભન્તરં તે ગહનં, બાહિરં પરિમજ્જસિ.

૯૯. એહિ ગોધ નિવત્તસ્સુ, ભુઞ્જ સાલીનમોદનં;

તેલં લોણઞ્ચ મે અત્થિ, પહૂતં મય્હ પિપ્ફલિ.

૧૦૦. એસ ભિય્યો પવેક્ખામિ, વમ્મિકં સતપોરિસં;

તેલં લોણઞ્ચ કિત્તેસિ [કિન્તેસિ (સ્યા. પી.)], અહિતં મય્હ પિપ્ફલીતિ.

ગોધરાજજાતકં પઞ્ચમં.

૩૨૬. કક્કારુજાતકં (૪-૩-૬)

૧૦૧. કાયેન યો નાવહરે, વાચાય ન મુસા ભણે;

યસો લદ્ધા ન મજ્જેય્ય, સ વે કક્કારુમરહતિ.

૧૦૨. ધમ્મેન વિત્તમેસેય્ય, ન નિકત્યા ધનં હરે;

ભોગે લદ્ધા ન મજ્જેય્ય, સ વે કક્કારુમરહતિ.

૧૦૩. યસ્સ ચિત્તં અહાલિદ્દં, સદ્ધા ચ અવિરાગિની;

એકો સાદું ન ભુઞ્જેય્ય, સ વે કક્કારુમરહતિ.

૧૦૪. સમ્મુખા વા તિરોક્ખા વા [પરોક્ખા વા (પી.), પરમ્મુખા (ક.)], યો સન્તે ન પરિભાસતિ;

યથાવાદી તથાકારી, સ વે કક્કારુમરહતીતિ.

કક્કારુજાતકં છટ્ઠં.

૩૨૭. કાકવતીજાતકં (૪-૩-૭)

૧૦૫. વાતિ ચાયં [વાયં (ક.)] તતો ગન્ધો, યત્થ મે વસતી પિયા;

દૂરે ઇતો હિ કાકવતી [કાકાતી (સી.), કાકાતિ (સ્યા. પી.)], યત્થ મે નિરતો મનો.

૧૦૬. કથં સમુદ્દમતરી, કથં અતરિ કેપુકં [કેબુકં (સી. પી.)];

કથં સત્ત સમુદ્દાનિ, કથં સિમ્બલિમારુહિ.

૧૦૭. તયા સમુદ્દમતરિં, તયા અતરિ કેપુકં [કેબુકં (સી. પી.)];

તયા સત્ત સમુદ્દાનિ, તયા સિમ્બલિમારુહિં.

૧૦૮. ધિરત્થુમં મહાકાયં, ધિરત્થુમં અચેતનં;

યત્થ જાયાયહં જારં, આવહામિ વહામિ ચાતિ.

કાકવતીજાતકં સત્તમં.

૩૨૮. અનનુસોચિયજાતકં (૪-૩-૮)

૧૦૯. બહૂનં વિજ્જતી ભોતી, તેહિ મે કિં ભવિસ્સતિ;

તસ્મા એતં ન સોચામિ, પિયં સમ્મિલ્લહાસિનિં.

૧૧૦. તં તં ચે અનુસોચેય્ય, યં યં તસ્સ ન વિજ્જતિ;

અત્તાનમનુસોચેય્ય, સદા મચ્ચુવસં પતં.

૧૧૧. ન હેવ ઠિતં નાસીનં, ન સયાનં ન પદ્ધગું [પત્થગું (સ્યા.)];

યાવ બ્યાતિ નિમિસતિ, તત્રાપિ રસતી [સરતી (સી. સ્યા. પી.)] વયો.

૧૧૨. તત્થત્તનિ વતપ્પદ્ધે [વત પન્થે (સ્યા.), વત બન્ધે (ક.) વત + પ-અદ્ધે = વતપ્પદ્ધે], વિનાભાવે અસંસયે;

ભૂતં સેસં દયિતબ્બં, વીતં અનનુસોચિયન્તિ [ચવિતં નાનુસોચિયન્તિ (સ્યા.), મતન્તં નાનુસોચિયં (ક.)].

અનનુસોચિયજાતકં અટ્ઠમં.

૩૨૯. કાળબાહુજાતકં (૪-૩-૯)

૧૧૩. યં અન્નપાનસ્સ પુરે લભામ, તં દાનિ સાખમિગમેવ ગચ્છતિ;

ગચ્છામ દાનિ વનમેવ રાધ, અસક્કતા ચસ્મ ધનઞ્જયાય [ધનઞ્ચયાય (ક.)].

૧૧૪. લાભો અલાભો યસો અયસો ચ, નિન્દા પસંસા ચ સુખઞ્ચ દુક્ખં;

એતે અનિચ્ચા મનુજેસુ ધમ્મા, મા સોચિ કિં સોચસિ પોટ્ઠપાદ.

૧૧૫. અદ્ધા તુવં પણ્ડિતકોસિ રાધ, જાનાસિ અત્થાનિ અનાગતાનિ;

કથં નુ સાખામિગં દક્ખિસામ [દક્ખિયામ (ક.), દક્ખામ (સ્યા.)], નિદ્ધાવિતં [નિદ્ધાપિતં (સી. સ્યા.), નિબ્બાપિતં (પી.), નિચ્છદં (ક.)] રાજકુલતોવ જમ્મં.

૧૧૬. ચાલેતિ કણ્ણં ભકુટિં કરોતિ, મુહું મુહું ભાયયતે [ભાયતે (સ્યા.), ભાયાપતે (ક.)] કુમારે;

સયમેવ તં કાહતિ કાળબાહુ, યેનારકા ઠસ્સતિ અન્નપાનાતિ.

કાળબાહુજાતકં નવમં.

૩૩૦. સીલવીમંસજાતકં (૪-૩-૧૦)

૧૧૭. સીલં કિરેવ કલ્યાણં, સીલં લોકે અનુત્તરં;

પસ્સ ઘોરવિસો નાગો, સીલવાતિ ન હઞ્ઞતિ.

૧૧૮. યાવદેવસ્સહૂ કિઞ્ચિ, તાવદેવ અખાદિસું;

સઙ્ગમ્મ કુલલા લોકે, ન હિંસન્તિ અકિઞ્ચનં.

૧૧૯. સુખં નિરાસા સુપતિ, આસા ફલવતી સુખા;

આસં નિરાસં કત્વાન, સુખં સુપતિ પિઙ્ગલા.

૧૨૦. ન સમાધિપરો અત્થિ, અસ્મિં લોકે પરમ્હિ ચ;

ન પરં નાપિ અત્તાનં, વિહિંસતિ સમાહિતોતિ.

સીલવીમંસજાતકં દસમં.

કુટિદૂસકવગ્ગો તતિયો.

તસ્સુદ્દાનં –

સમનુસ્સ -સદુદ્દુભ-યાચનકો, અથ મેણ્ડવરુત્તમ-ગોધવરો;

અથ કાયસકેપુક ભોતીવરો, અથ રાધસુસીલવરેન દસાતિ.