૨. પુચિમન્દવગ્ગો

૩૧૧. પુચિમન્દજાતકં (૪-૨-૧)

૪૧. ઉટ્ઠેહિ ચોર કિં સેસિ, કો અત્થો સુપનેન [સુપિતેન (સી.), સુપિનેન (પી. ક.)] તે;

મા તં ગહેસું [ગણ્હેય્યું (ક.)] રાજાનો, ગામે કિબ્બિસકારકં.

૪૨. યં નુ [નૂન (સ્યા.)] ચોરં ગહેસ્સન્તિ, ગામે કિબ્બિસકારકં;

કિં તત્થ પુચિમન્દસ્સ, વને જાતસ્સ તિટ્ઠતો.

૪૩. ન ત્વં અસ્સત્થ જાનાસિ, મમ ચોરસ્સ ચન્તરં;

ચોરં ગહેત્વા રાજાનો, ગામે કિબ્બિસકારકં;

અપ્પેન્તિ [અચ્ચેન્તિ (સ્યા.)] નિમ્બસૂલસ્મિં, તસ્મિં મે સઙ્કતે મનો.

૪૪. સઙ્કેય્ય સઙ્કિતબ્બાનિ, રક્ખેય્યાનાગતં ભયં;

અનાગતભયા ધીરો, ઉભો લોકે અવેક્ખતીતિ.

પુચિમન્દજાતકં પઠમં.

૩૧૨. કસ્સપમન્દિયજાતકં (૪-૨-૨)

૪૫. અપિ કસ્સપ મન્દિયા, યુવા સપતિ હન્તિ [સમ્પટિહન્તિ (ક.)] વા;

સબ્બં તં ખમતે ધીરો, પણ્ડિતો તં તિતિક્ખતિ.

૪૬. સચેપિ સન્તો વિવદન્તિ, ખિપ્પં સન્ધીયરે પુન;

બાલા પત્તાવ ભિજ્જન્તિ, ન તે સમથમજ્ઝગૂ.

૪૭. એતે ભિય્યો સમાયન્તિ, સન્ધિ તેસં ન જીરતિ;

યો ચાધિપન્નં જાનાતિ, યો ચ જાનાતિ દેસનં.

૪૮. એસો હિ ઉત્તરિતરો, ભારવહો ધુરદ્ધરો;

યો પરેસાધિપન્નાનં, સયં સન્ધાતુમરહતીતિ.

કસ્સપમન્દિયજાતકં દુતિયં.

૩૧૩. ખન્તીવાદીજાતકં (૪-૨-૩)

૪૯. યો તે હત્થે ચ પાદે ચ, કણ્ણનાસઞ્ચ છેદયિ;

તસ્સ કુજ્ઝ મહાવીર, મા રટ્ઠં વિનસા [વિનસ્સ (ક. સી. સ્યા. ક.)] ઇદં.

૫૦. યો મે હત્થે ચ પાદે ચ, કણ્ણનાસઞ્ચ છેદયિ;

ચિરં જીવતુ સો રાજા, ન હિ કુજ્ઝન્તિ માદિસા.

૫૧. અહૂ અતીતમદ્ધાનં [અહુ અતીતમદ્ધાને (સ્યા. પી. ક.)], સમણો ખન્તિદીપનો;

તં ખન્તિયાયેવ ઠિતં, કાસિરાજા અછેદયિ.

૫૨. તસ્સ કમ્મ [કમ્મસ્સ (સી. પી.)] ફરુસસ્સ, વિપાકો કટુકો અહુ;

યં કાસિરાજા વેદેસિ, નિરયમ્હિ સમપ્પિતોતિ.

ખન્તીવાદીજાતકં તતિયં.

૩૧૪. લોહકુમ્ભિજાતકં (૪-૨-૪)

૫૩. દુજ્જીવિતમજીવિમ્હ, યે સન્તે [યેસં નો (સ્યા. ક.)] ન દદમ્હસે;

વિજ્જમાનેસુ ભોગેસુ, દીપં નાકમ્હ અત્તનો.

૫૪. સટ્ઠિ [સટ્ઠિં (સ્યા.)] વસ્સસહસ્સાનિ, પરિપુણ્ણાનિ સબ્બસો;

નિરયે પચ્ચમાનાનં, કદા અન્તો ભવિસ્સતિ.

૫૫. નત્થિ અન્તો કુતો અન્તો, ન અન્તો પટિદિસ્સતિ;

તદા હિ પકતં પાપં, મમ તુય્હઞ્ચ મારિસા [મારિસ (સી. સ્યા. પી.)].

૫૬. સોહં નૂન ઇતો ગન્ત્વા, યોનિં લદ્ધાન માનુસિં;

વદઞ્ઞૂ સીલસમ્પન્નો, કાહામિ કુસલં બહુન્તિ.

લોહકુમ્ભિજાતકં ચતુત્થં.

૩૧૫. સબ્બમંસલાભજાતકં (૪-૨-૫)

૫૭. ફરુસા વત તે વાચા, મંસં [સમ્મ (પી. ક.)] યાચનકો અસિ [ચસિ (પી.)];

કિલોમસદિસી [કિલોમસ્સ સદિસા (પી.)] વાચા, કિલોમં સમ્મ દમ્મિ તે.

૫૮. અઙ્ગમેતં મનુસ્સાનં, ભાતા લોકે પવુચ્ચતિ;

અઙ્ગસ્સ સદિસી વાચા [અઙ્ગસ્સદિસી તે વાચા (ક.)], અઙ્ગં સમ્મ દદામિ તે.

૫૯. તાતાતિ પુત્તો વદમાનો, કમ્પેતિ [સમ્મેતિ (ક.)] હદયં પિતુ;

હદયસ્સ સદિસી [હદયસ્સદિસી (ક.)] વાચા, હદયં સમ્મ દમ્મિ તે.

૬૦. યસ્સ ગામે સખા નત્થિ, યથારઞ્ઞં તથેવ તં;

સબ્બસ્સ સદિસી વાચા, સબ્બં સમ્મ દદામિ તેતિ.

સબ્બમંસલાભજાતકં [મંસજાતકં (સી. સ્યા. પી.)] પઞ્ચમં.

૩૧૬. સસપણ્ડિતજાતકં (૪-૨-૬)

૬૧. સત્ત મે રોહિતા મચ્છા, ઉદકા થલમુબ્ભતા;

ઇદં બ્રાહ્મણ મે અત્થિ, એતં ભુત્વા વને વસ.

૬૨. દુસ્સ મે ખેત્તપાલસ્સ, રત્તિભત્તં અપાભતં;

મંસસૂલા ચ દ્વે ગોધા, એકઞ્ચ દધિવારકં;

ઇદં બ્રાહ્મણ મે અત્થિ, એતં ભુત્વા વને વસ.

૬૩. અમ્બપક્કં દકં [અમ્બપક્કોદકં (સી. પી.)] સીતં, સીતચ્છાયા મનોરમા [સીતચ્છાયં મનોરમં (સી. સ્યા. પી.)];

ઇદં બ્રાહ્મણ મે અત્થિ, એતં ભુત્વા વને વસ.

૬૪. ન સસસ્સ તિલા અત્થિ, ન મુગ્ગા નપિ તણ્ડુલા;

ઇમિના અગ્ગિના પક્કં, મમં [મંસં (ક.)] ભુત્વા વને વસાતિ.

સસપણ્ડિતજાતકં છટ્ઠં.

૩૧૭. મતરોદનજાતકં (૪-૨-૭)

૬૫. મતં મતં એવ [મતમતમેવ (સી. સ્યા. પી.)] રોદથ, ન હિ તં રોદથ યો મરિસ્સતિ;

સબ્બેપિ [સબ્બેવ (સી. સ્યા. પી.)] સરીરધારિનો, અનુપુબ્બેન જહન્તિ જીવિતં.

૬૬. દેવમનુસ્સા ચતુપ્પદા, પક્ખિગણા ઉરગા ચ ભોગિનો;

સમ્હિ [યમ્હિ (સ્યા.), અસ્મિં (પી. ક.)] સરીરે અનિસ્સરા, રમમાનાવ જહન્તિ જીવિતં.

૬૭. એવં ચલિતં અસણ્ઠિતં, સુખદુક્ખં મનુજેસ્વપેક્ખિય;

કન્દિતરુદિતં નિરત્થકં, કિં વો સોકગણાભિકીરરે.

૬૮. ધુત્તા ચ સોણ્ડા [ધુત્તા સોણ્ડા (સી.), ધુત્તા સોણ્ડા ચ (સ્યા.)] અકતા, બાલા સૂરા અયોગિનો [બાલા સૂરા વીરા અયોગિનો (પી.)];

ધીરં મઞ્ઞન્તિ બાલોતિ, યે ધમ્મસ્સ અકોવિદાતિ.

મતરોદનજાતકં સત્તમં.

૩૧૮. કણવેરજાતકં (૪-૨-૮)

૬૯. યં તં વસન્તસમયે, કણવેરેસુ ભાણુસુ;

સામં બાહાય પીળેસિ, સા તં આરોગ્યમબ્રવિ.

૭૦. અમ્ભો ન કિર સદ્ધેય્યં, યં વાતો પબ્બતં વહે;

પબ્બતઞ્ચે વહે વાતો, સબ્બમ્પિ પથવિં વહે;

યત્થ સામા કાલકતા [કાલઙ્કતા (ક.)], સા મં આરોગ્યમબ્રવિ.

૭૧. ન ચેવ સા કાલકતા, ન ચ સા અઞ્ઞમિચ્છતિ;

એકભત્તિકિની [એકભત્તા કિર (સી. સ્યા.), એકભત્તકિની (પી.)] સામા, તમેવ અભિકઙ્ખતિ.

૭૨. અસન્થુતં મં ચિરસન્થુતેન [અસન્ધતં મં ચિરસન્ધતેન (ક.)], નિમીનિ સામા અધુવં ધુવેન;

મયાપિ સામા નિમિનેય્ય અઞ્ઞં, ઇતો અહં દૂરતરં ગમિસ્સન્તિ.

કણવેરજાતકં અટ્ઠમં.

૩૧૯. તિત્તિરજાતકં (૪-૨-૯)

૭૩. સુસુખં વત જીવામિ, લભામિ ચેવ ભુઞ્જિતું;

પરિપન્થેવ તિટ્ઠામિ, કા નુ ભન્તે ગતી મમ.

૭૪. મનો ચે તે નપ્પણમતિ, પક્ખિ પાપસ્સ કમ્મુનો;

અબ્યાવટસ્સ ભદ્રસ્સ, ન પાપમુપલિમ્પતિ.

૭૫. ઞાતકો નો નિસિન્નોતિ, બહુ આગચ્છતે જનો;

પટિચ્ચ કમ્મં ફુસતિ, તસ્મિં મે સઙ્કતે મનો.

૭૬. ન પટિચ્ચ કમ્મં ફુસતિ, મનો ચે નપ્પદુસ્સતિ;

અપ્પોસ્સુક્કસ્સ ભદ્રસ્સ, ન પાપમુપલિમ્પતીતિ.

તિત્તિરજાતકં નવમં.

૩૨૦. સુચ્ચજજાતકં (૪-૨-૧૦)

૭૭. સુચ્ચજં વત નચ્ચજિ, વાચાય અદદં ગિરિં;

કિં હિતસ્સ ચજન્તસ્સ, વાચાય અદદ પબ્બતં.

૭૮. યઞ્હિ કયિરા તઞ્હિ વદે, યં ન કયિરા ન તં વદે;

અકરોન્તં ભાસમાનં, પરિજાનન્તિ પણ્ડિતા.

૭૯. રાજપુત્ત નમો ત્યત્થુ, સચ્ચે ધમ્મે ઠિતો ચસિ;

યસ્સ તે બ્યસનં પત્તો, સચ્ચસ્મિં રમતે મનો.

૮૦. યા દલિદ્દી દલિદ્દસ્સ, અડ્ઢા અડ્ઢસ્સ કિત્તિમ [કિત્તિમા (સી. સ્યા. પી.)];

સા હિસ્સ પરમા ભરિયા, સહિરઞ્ઞસ્સ ઇત્થિયોતિ.

સુચ્ચજજાતકં દસમં.

પુચિમન્દવગ્ગો દુતિયો.

તસ્સુદ્દાનં –

અથ ચોર સકસ્સપ ખન્તીવરો, દુજ્જીવિતતા ચ વરા ફરુસા;

અથ સસ મતઞ્ચ વસન્ત સુખં, સુચ્ચજંવતનચ્ચજિના ચ દસાતિ.