૫. કુમ્ભવગ્ગો

૨૯૧. સુરાઘટજાતકં (૨-૫-૧)

૧૨૧. સબ્બકામદદં કુમ્ભં, કુટં લદ્ધાન ધુત્તકો;

યાવ નં અનુપાલેતિ, તાવ સો સુખમેધતિ.

૧૨૨. યદા મત્તો ચ દિત્તો ચ, પમાદા કુમ્ભમબ્ભિદા;

તદા નગ્ગો ચ પોત્થો ચ, પચ્છા બાલો વિહઞ્ઞતિ.

૧૨૩. એવમેવ યો ધનં લદ્ધા, પમત્તો [અમત્તા (સી.), અમત્તો (પી.)] પરિભુઞ્જતિ;

પચ્છા તપ્પતિ દુમ્મેધો, કુટં ભિત્વાવ [કુટં ભિન્નોવ (સી. પી.), કુટભિન્નોવ (?)] ધુત્તકોતિ.

સુરાઘટ [ભદ્રઘટ (સી. પી.), ભદ્રઘટભેદક (સ્યા.)] જાતકં પઠમં.

૨૯૨. સુપત્તજાતકં (૩-૫-૨)

૧૨૪. બારાણસ્યં [બારાણસ્સં (સી. પી.)] મહારાજ, કાકરાજા નિવાસકો [નિવાસિકો (સી. પી.)];

અસીતિયા સહસ્સેહિ, સુપત્તો પરિવારિતો.

૧૨૫. તસ્સ દોહળિની ભરિયા, સુફસ્સા ભક્ખિતુમિચ્છતિ [મચ્છમિચ્છતિ (સી. પી.)];

રઞ્ઞો મહાનસે પક્કં, પચ્ચગ્ઘં રાજભોજનં.

૧૨૬. તેસાહં પહિતો દૂતો, રઞ્ઞો ચમ્હિ ઇધાગતો;

ભત્તુ અપચિતિં કુમ્મિ, નાસાયમકરં [મકરિં (સી. નિસ્સય)] વણન્તિ.

સુપત્તજાતકં દુતિયં.

૨૯૩. કાયનિબ્બિન્દજાતકં (૩-૫-૩)

૧૨૭. ફુટ્ઠસ્સ મે અઞ્ઞતરેન બ્યાધિના, રોગેન બાળ્હં દુખિતસ્સ રુપ્પતો;

પરિસુસ્સતિ ખિપ્પમિદં કળેવરં, પુપ્ફં યથા પંસુનિ આતપે કતં.

૧૨૮. અજઞ્ઞં જઞ્ઞસઙ્ખાતં, અસુચિં સુચિસમ્મતં;

નાનાકુણપપરિપૂરં, જઞ્ઞરૂપં અપસ્સતો.

૧૨૯. ધિરત્થુમં આતુરં પૂતિકાયં, જેગુચ્છિયં અસ્સુચિં બ્યાધિધમ્મં;

યત્થપ્પમત્તા અધિમુચ્છિતા પજા, હાપેન્તિ મગ્ગં સુગતૂપપત્તિયાતિ.

કાયનિબ્બિન્દ [કાયવિચ્છન્દ (સી.), કાયવિચ્છિન્દ (પી.)] જાતકં તતિયં.

૨૯૪. જમ્બુખાદકજાતકં (૩-૫-૪)

૧૩૦. કોયં બિન્દુસ્સરો વગ્ગુ, સરવન્તાન [પવદન્તાન (સી. પી.)] મુત્તમો;

અચ્ચુતો જમ્બુસાખાય, મોરચ્છાપોવ કૂજતિ.

૧૩૧. કુલપુત્તોવ જાનાતિ [કુલપુત્તો પજાનાતિ (સ્યા. ક.)], કુલપુત્તં [કુલપુત્તે (સી. પી.)] પસંસિતું;

બ્યગ્ઘચ્છાપસરીવણ્ણ, ભુઞ્જ સમ્મ દદામિ તે.

૧૩૨. ચિરસ્સં વત પસ્સામિ, મુસાવાદી સમાગતે;

વન્તાદં કુણપાદઞ્ચ, અઞ્ઞમઞ્ઞં પસંસકેતિ.

જમ્બુખાદકજાતકં ચતુત્થં.

૨૯૫. અન્તજાતકં (૩-૫-૫)

૧૩૩. ઉસભસ્સેવ તે ખન્ધો, સીહસ્સેવ વિજમ્ભિતં;

મિગરાજ નમો ત્યત્થુ, અપિ કિઞ્ચિ લભામસે.

૧૩૪. કુલપુત્તોવ જાનાતિ, કુલપુત્તં પસંસિતું;

મયૂરગીવસઙ્કાસ, ઇતો પરિયાહિ વાયસ.

૧૩૫. મિગાનં સિઙ્ગાલો [કોત્થુકો (સી. પી.), કોટ્ઠુકો (સ્યા.)] અન્તો, પક્ખીનં પન વાયસો;

એરણ્ડો અન્તો રુક્ખાનં, તયો અન્તા સમાગતાતિ.

અન્તજાતકં પઞ્ચમં.

૨૯૬. સમુદ્દજાતકં (૩-૫-૬)

૧૩૬. કો નાયં [કો ન્વાયં (સ્યા.)] લોણતોયસ્મિં, સમન્તા પરિધાવતિ;

મચ્છે મકરે ચ વારેતિ, ઊમીસુ ચ વિહઞ્ઞતિ.

૧૩૭. અનન્તપાયી સકુણો, અતિત્તોતિ દિસાસુતો;

સમુદ્દં પાતુમિચ્છામિ, સાગરં સરિતં પતિં.

૧૩૮. સો અયં હાયતિ ચેવ, પૂરતે ચ મહોદધિ;

નાસ્સ નાયતિ પીતન્તો, અપેય્યો કિર સાગરોતિ.

સમુદ્દજાતકં છટ્ઠં.

૨૯૭. કામવિલાપજાતકં (૩-૫-૭)

૧૩૯. ઉચ્ચે સકુણ ડેમાન, પત્તયાન વિહઙ્ગમ;

વજ્જાસિ ખો ત્વં વામૂરું, ચિરં ખો સા કરિસ્સતિ [સરિસ્સતિ (ક.)].

૧૪૦. ઇદં ખો સા ન જાનાતિ, અસિં સત્તિઞ્ચ ઓડ્ડિતં;

સા ચણ્ડી કાહતિ કોધં, તં મે તપતિ નો ઇદં [નો ઇધ (સી. સ્યા. પી.)].

૧૪૧. એસ ઉપ્પલસન્નાહો, નિક્ખઞ્ચુસ્સીસકોહિતં [નિક્ખમુસ્સીસકે કતં (સી. પી.), નિક્ખઞ્ચુસ્સીસકે કતં (સ્યા.)];

કાસિકઞ્ચ મુદું વત્થં, તપ્પેતુ ધનિકા પિયાતિ [ધનકામિયાતિ (સ્યા. પી.), ધનકામિકાતિ (સી.)].

કામવિલાપજાતકં સત્તમં.

૨૯૮. ઉદુમ્બરજાતકં (૩-૫-૮)

૧૪૨. ઉદુમ્બરા ચિમે પક્કા, નિગ્રોધા ચ કપિત્થના;

એહિ નિક્ખમ ભુઞ્જસ્સુ, કિં જિઘચ્છાય મિય્યસિ.

૧૪૩. એવં સો સુહિતો હોતિ, યો વુડ્ઢમપચાયતિ;

યથાહમજ્જ સુહિતો, દુમપક્કાનિ માસિતો.

૧૪૪. યં વનેજો વનેજસ્સ, વઞ્ચેય્ય કપિનો કપિ;

દહરો કપિ [દહરોપિ તં ન (સી. પી.), દહરોપિ ન (સ્યા.)] સદ્ધેય્ય, ન હિ જિણ્ણો જરાકપીતિ.

ઉદુમ્બરજાતકં અટ્ઠમં.

૨૯૯. કોમારપુત્તજાતકં (૩-૫-૯)

૧૪૫. પુરે તુવં સીલવતં સકાસે, ઓક્કન્તિકં [ઓક્કન્દિકં (સી. સ્યા. પી.)] કીળસિ અસ્સમમ્હિ;

કરોહરે [કરોહિ રે (ક.)] મક્કટિયાનિ મક્કટ, ન તં મયં સીલવતં રમામ.

૧૪૬. સુતા હિ મય્હં પરમા વિસુદ્ધિ, કોમારપુત્તસ્સ બહુસ્સુતસ્સ;

મા દાનિ મં મઞ્ઞિ તુવં યથા પુરે, ઝાનાનુયુત્તો વિહરામિ [ઝાનાનુયુત્તા વિહરામ (સી. પી.)] આવુસો.

૧૪૭. સચેપિ સેલસ્મિ વપેય્ય બીજં, દેવો ચ વસ્સે ન હિ તં વિરૂળ્હે [નેવ હિ તં રુહેય્ય (સી. પી.), ન હિ તં વિરૂહે (?)];

સુતા હિ તે સા પરમા વિસુદ્ધિ, આરા તુવં મક્કટ ઝાનભૂમિયાતિ.

કોમારપુત્તજાતકં નવમં.

૩૦૦. વકજાતકં (૩-૫-૧૦)

૧૪૮. પરપાણરોધા [પરપાણઘાતે (સ્યા.), પરપાણરોચં (ક.)] જીવન્તો, મંસલોહિતભોજનો;

વકો વતં સમાદાય, ઉપપજ્જિ ઉપોસથં.

૧૪૯. તસ્સ સક્કો વતઞ્ઞાય, અજરૂપેનુપાગમિ;

વીતતપો અજ્ઝપ્પત્તો, ભઞ્જિ લોહિતપો તપં.

૧૫૦. એવમેવ ઇધેકચ્ચે, સમાદાનમ્હિ દુબ્બલા;

લહું કરોન્તિ અત્તાનં, વકોવ અજકારણાતિ.

વકજાતકં દસમં.

કુમ્ભવગ્ગો પઞ્ચમો.

તસ્સુદ્દાનં –

વરકુમ્ભ સુપત્તસિરિવ્હયનો, સુચિસમ્મત બિન્દુસરો ચુસભો;

સરિતંપતિ ચણ્ડિ જરાકપિના, અથ મક્કટિયા વકકેન દસાતિ.

અથ વગ્ગુદ્દાનં –

સઙ્કપ્પો પદુમો ચેવ, ઉદપાનેન તતિયં;

અબ્ભન્તરં ઘટભેદં, તિકનિપાતમ્હિલઙ્કતન્તિ.

તિકનિપાતં નિટ્ઠિતં.