૩. તિકનિપાતો

૧. સઙ્કપ્પવગ્ગો

૨૫૧. સઙ્કપ્પરાગજાતકં (૩-૧-૧)

૧. સઙ્કપ્પરાગધોતેન, વિતક્કનિસિતેન ચ;

નાલઙ્કતેન ભદ્રેન [નેવાલઙ્કતભદ્રેન (સ્યા.)], ઉસુકારાકતેન ચ [ન ઉસુકારકતેન ચ (સી. સ્યા. પી.)].

૨. ન કણ્ણાયતમુત્તેન, નાપિ મોરૂપસેવિના;

તેનમ્હિ હદયે વિદ્ધો, સબ્બઙ્ગપરિદાહિના.

૩. આવેધઞ્ચ ન પસ્સામિ, યતો રુહિરમસ્સવે;

યાવ અયોનિસો ચિત્તં, સયં મે દુક્ખમાભતન્તિ.

સઙ્કપ્પરાગજાતકં પઠમં.

૨૫૨. તિલમુટ્ઠિજાતકં (૩-૧-૨)

૪. અજ્જાપિ મે તં મનસિ [સરસિ (ક.)], યં મં ત્વં તિલમુટ્ઠિયા;

બાહાય મં ગહેત્વાન, લટ્ઠિયા અનુતાળયિ.

૫. નનુ જીવિતે ન રમસિ, યેનાસિ બ્રાહ્મણાગતો;

યં મં બાહા ગહેત્વાન, તિક્ખત્તું અનુતાળયિ.

૬. અરિયો અનરિયં કુબ્બન્તં [કુબ્બાનં (સી. પી.), કુબ્બં (સ્યા.)], યો દણ્ડેન નિસેધતિ;

સાસનં તં ન તં વેરં, ઇતિ નં પણ્ડિતા વિદૂતિ.

તિલમુટ્ઠિજાતકં દુતિયં.

૨૫૩. મણિકણ્ઠજાતકં (૩-૧-૩)

૭. મમન્નપાનં વિપુલં ઉળારં, ઉપ્પજ્જતીમસ્સ મણિસ્સ હેતુ;

તં તે ન દસ્સં અતિયાચકોસિ, ન ચાપિ તે અસ્સમમાગમિસ્સં.

૮. સુસૂ યથા સક્ખરધોતપાણી, તાસેસિ મં સેલં યાચમાનો;

તં તે ન દસ્સં અતિયાચકોસિ, ન ચાપિ તે અસ્સમમાગમિસ્સં.

૯. ન તં યાચે યસ્સ પિયં જિગીસે [જિગિંસે (સી. સ્યા. પી.)], દેસ્સો હોતિ અતિયાચનાય;

નાગો મણિં યાચિતો બ્રાહ્મણેન, અદસ્સનંયેવ તદજ્ઝગમાતિ.

મણિકણ્ઠજાતકં તતિયં.

૨૫૪. કુણ્ડકકુચ્છિસિન્ધવજાતકં (૩-૧-૪)

૧૦. ભુત્વા તિણપરિઘાસં, ભુત્વા આચામકુણ્ડકં;

એતં તે ભોજનં આસિ, કસ્મા દાનિ ન ભુઞ્જસિ.

૧૧. યત્થ પોસં ન જાનન્તિ, જાતિયા વિનયેન વા;

બહું [પહૂ (સી. પી.), પહું (સ્યા. ક.)] તત્થ મહાબ્રમ્હે, અપિ આચામકુણ્ડકં.

૧૨. ત્વઞ્ચ ખો મં પજાનાસિ, યાદિસાયં હયુત્તમો;

જાનન્તો જાનમાગમ્મ, ન તે ભક્ખામિ કુણ્ડકન્તિ.

કુણ્ડકકુચ્છિસિન્ધવજાતકં ચતુત્થં.

૨૫૫. સુકજાતકં (૩-૧-૫)

૧૩. યાવ સો મત્તમઞ્ઞાસિ, ભોજનસ્મિં વિહઙ્ગમો;

તાવ અદ્ધાનમાપાદિ, માતરઞ્ચ અપોસયિ.

૧૪. યતો ચ ખો બહુતરં, ભોજનં અજ્ઝવાહરિ [અજ્ઝુપાહરિ (સી. પી.)];

તતો તત્થેવ સંસીદિ, અમત્તઞ્ઞૂ હિ સો અહુ.

૧૫. તસ્મા મત્તઞ્ઞુતા સાધુ, ભોજનસ્મિં અગિદ્ધતા [અગિદ્ધિતા (સ્યા. ક.)];

અમત્તઞ્ઞૂ હિ સીદન્તિ, મત્તઞ્ઞૂ ચ ન સીદરેતિ.

સુકજાતકં પઞ્ચમં.

૨૫૬. જરૂદપાનજાતકં (૩-૧-૬)

૧૬. જરૂદપાનં ખણમાના, વાણિજા ઉદકત્થિકા;

અજ્ઝગમું અયસં લોહં [અજ્ઝગંસુ અયોલોહં (સી. સ્યા. પી.)], તિપુસીસઞ્ચ વાણિજા;

રજતં જાતરૂપઞ્ચ, મુત્તા વેળૂરિયા બહૂ.

૧૭. તે ચ તેન અસન્તુટ્ઠા, ભિય્યો ભિય્યો અખાણિસું;

તે તત્થાસીવિસો [તત્થ આસીવિસો (ક.), તત્થપાસીવિસો (સ્યા.)] ઘોરો, તેજસ્સી તેજસા હનિ.

૧૮. તસ્મા ખણે નાતિખણે, અતિખાતં [અતિખણં (ક.)] હિ પાપકં;

ખાતેન ચ [ખણેન ચ (ક.), ખણનેન (સ્યા.)] ધનં લદ્ધં, અતિખાતેન [અતિખણેન (ક.)] નાસિતન્તિ.

જરૂદપાનજાતકં છટ્ઠં.

૨૫૭. ગામણિચન્દજાતકં (૩-૧-૭)

૧૯. નાયં ઘરાનં કુસલો, લોલો અયં વલીમુખો;

કતં કતં ખો દૂસેય્ય, એવંધમ્મમિદં કુલં.

૨૦. નયિદં ચિત્તવતો લોમં, નાયં અસ્સાસિકો મિગો;

સિટ્ઠં [સત્થં (સી. સ્યા. પી.)] મે જનસન્ધેન, નાયં કિઞ્ચિ વિજાનતિ.

૨૧. ન માતરં પિતરં વા, ભાતરં ભગિનિં સકં;

ભરેય્ય તાદિસો પોસો, સિટ્ઠં દસરથેન મેતિ.

ગામણિચન્દ [ગામણિચણ્ડ (સી. પી.)] જાતકં સત્તમં.

૨૫૮. મન્ધાતુજાતકં (૩-૧-૮)

૨૨. યાવતા ચન્દિમસૂરિયા, પરિહરન્તિ દિસા ભન્તિ વિરોચના [વિરોચમાના (ક.)];

સબ્બેવ દાસા મન્ધાતુ, યે પાણા પથવિસ્સિતા [પઠવિનિસ્સિતા (સી. પી.), પઠવિસ્સિતા (સ્યા.)].

૨૩. ન કહાપણવસ્સેન, તિત્તિ કામેસુ વિજ્જતિ;

અપ્પસ્સાદા દુખા કામા, ઇતિ વિઞ્ઞાય પણ્ડિતો.

૨૪. અપિ દિબ્બેસુ કામેસુ, રતિં સો નાધિગચ્છતિ;

તણ્હક્ખયરતો હોતિ, સમ્માસમ્બુદ્ધસાવકોતિ.

મન્ધાતુજાતકં અટ્ઠમં.

૨૫૯. તિરીટવચ્છજાતકં (૩-૧-૯)

૨૫. નયિમસ્સ વિજ્જામયમત્થિ કિઞ્ચિ, ન બન્ધવો નો પન તે સહાયો;

અથ કેન વણ્ણેન તિરીટવચ્છો [તિરીટિવચ્છો (સ્યા. ક.)], તેદણ્ડિકો ભુઞ્જતિ અગ્ગપિણ્ડં.

૨૬. આપાસુ [આવાસુ (ક.)] મે યુદ્ધપરાજિતસ્સ, એકસ્સ કત્વા વિવનસ્મિ ઘોરે;

પસારયી કિચ્છગતસ્સ પાણિં, તેનૂદતારિં દુખસંપરેતો.

૨૭. એતસ્સ કિચ્ચેન ઇધાનુપત્તો, વેસાયિનો વિસયા જીવલોકે;

લાભારહો તાત તિરીટવચ્છો, દેથસ્સ ભોગં યજથઞ્ચ [યજતઞ્ચ (સી. પી.), યજિતઞ્ચ (સ્યા.)] યઞ્ઞન્તિ.

તિરીટવચ્છજાતકં નવમં.

૨૬૦. દૂતજાતકં (૩-૧-૧૦)

૨૮. યસ્સત્થા દૂરમાયન્તિ, અમિત્તમપિ યાચિતું;

તસ્સૂદરસ્સહં દૂતો, મા મે કુજ્ઝ [કુજ્ઝિ (સી. પી.)] રથેસભ.

૨૯. યસ્સ દિવા ચ રત્તો ચ, વસમાયન્તિ માણવા;

તસ્સૂદરસ્સહં દૂતો, મા મે કુજ્ઝ [કુજ્ઝિ (સી. પી.)] રથેસભ.

૩૦. દદામિ તે બ્રાહ્મણ રોહિણીનં, ગવં સહસ્સં સહ પુઙ્ગવેન;

દૂતો હિ દૂતસ્સ કથં ન દજ્જં, મયમ્પિ તસ્સેવ ભવામ દૂતાતિ.

દૂતજાતકં દસમં.

સઙ્કપ્પવગ્ગો પઠમો.

તસ્સુદ્દાનં –

ઉસુકારવરો તિલમુટ્ઠિ મણિ, હયરાજ વિહઙ્ગમ આસિવિસો;

જનસન્ધ કહાપણવસ્સ પુન, તિરિટં પુન દૂતવરેન દસાતિ.

૨. પદુમવગ્ગો

૨૬૧. પદુમજાતકં (૩-૨-૧)

૩૧. યથા કેસા ચ મસ્સૂ ચ, છિન્નં છિન્નં વિરૂહતિ;

એવં રૂહતુ તે નાસા, પદુમં દેહિ યાચિતો.

૩૨. યથા સારદિકં બીજં, ખેત્તે વુત્તં વિરૂહતિ;

એવં રૂહતુ તે નાસા, પદુમં દેહિ યાચિતો.

૩૩. ઉભોપિ પલપન્તેતે [વિલપન્તેતે (સ્યા. ક.)], અપિ પદ્માનિ દસ્સતિ;

વજ્જું વા તે ન વા વજ્જું, નત્થિ નાસાય રૂહના;

દેહિ સમ્મ પદુમાનિ, અહં યાચામિ યાચિતોતિ.

પદુમજાતકં પઠમં.

૨૬૨. મુદુપાણિજાતકં (૩-૨-૨)

૩૪. પાણિ ચે મુદુકો ચસ્સ, નાગો ચસ્સ સુકારિતો;

અન્ધકારો ચ વસ્સેય્ય, અથ નૂન તદા સિયા.

૩૫. અનલા મુદુસમ્ભાસા, દુપ્પૂરા તા [દુપ્પૂરત્તા (ક.)] નદીસમા;

સીદન્તિ નં વિદિત્વાન, આરકા પરિવજ્જયે.

૩૬. યં એતા ઉપસેવન્તિ, છન્દસા વા ધનેન વા;

જાતવેદોવ સં ઠાનં, ખિપ્પં અનુદહન્તિ નન્તિ.

મુદુપાણિજાતકં દુતિયં.

૨૬૩. ચૂળપલોભનજાતકં (૩-૨-૩)

૩૭. અભિજ્જમાને વારિસ્મિં, સયં [અયં (ક.)] આગમ્મ ઇદ્ધિયા;

મિસ્સીભાવિત્થિયા ગન્ત્વા, સંસીદસિ [સંસીદતિ (ક.)] મહણ્ણવે.

૩૮. આવટ્ટની મહામાયા, બ્રહ્મચરિયવિકોપના;

સીદન્તિ નં વિદિત્વાન, આરકા પરિવજ્જયે.

૩૯. યં એતા ઉપસેવન્તિ, છન્દસા વા ધનેન વા;

જાતવેદોવ સં ઠાનં, ખિપ્પં અનુદહન્તિ નન્તિ.

ચૂળપલોભન [ચુલ્લપલોભન (સી. સ્યા. પી.)] જાતકં તતિયં.

૨૬૪. મહાપનાદજાતકં (૩-૨-૪)

૪૦. પનાદો નામ સો રાજા, યસ્સ યૂપો સુવણ્ણયો;

તિરિયં સોળસુબ્બેધો [સોળસપબ્બેધો (સી. પી.)], ઉદ્ધમાહુ [ઉચ્ચમાહુ (સી. સ્યા. પી.)] સહસ્સધા.

૪૧. સહસ્સકણ્ડો સતગેણ્ડુ [સતભેદો (સી. પી.), સતભેણ્ડુ (સી. નિસ્સય)], ધજાસુ હરિતામયો;

અનચ્ચું તત્થ ગન્ધબ્બા, છ સહસ્સાનિ સત્તધા.

૪૨. એવમેતં [એવમેવ (ક.)] તદા આસિ, યથા ભાસસિ ભદ્દજિ;

સક્કો અહં તદા આસિં, વેય્યાવચ્ચકરો તવાતિ.

મહાપનાદજાતકં ચતુત્થં.

૨૬૫. ખુરપ્પજાતકં (૩-૨-૫)

૪૩. દિસ્વા ખુરપ્પે ધનુવેગનુન્ને, ખગ્ગે ગહીતે તિખિણે તેલધોતે;

તસ્મિં ભયસ્મિં મરણે વિયૂળ્હે, કસ્મા નુ તે નાહુ છમ્ભિતત્તં.

૪૪. દિસ્વા ખુરપ્પે ધનુવેગનુન્ને, ખગ્ગે ગહીતે તિખિણે તેલધોતે;

તસ્મિં ભયસ્મિં મરણે વિયૂળ્હે, વેદં અલત્થં વિપુલં ઉળારં.

૪૫. સો વેદજાતો અજ્ઝભવિં અમિત્તે, પુબ્બેવ મે જીવિતમાસિ ચત્તં;

ન હિ જીવિતે આલયં કુબ્બમાનો, સૂરો કયિરા સૂરકિચ્ચં કદાચીતિ.

ખુરપ્પજાતકં પઞ્ચમં.

૨૬૬. વાતગ્ગસિન્ધવજાતકં (૩-૨-૬)

૪૬. યેનાસિ કિસિયા પણ્ડુ, યેન ભત્તં ન રુચ્ચતિ;

અયં સો આગતો ભત્તા [તાતો (સી. સ્યા. પી.)], કસ્મા દાનિ પલાયસિ.

૪૭. સચે [ન ખો (સ્યા. ક.)] પનાદિકેનેવ, સન્થવો નામ જાયતિ;

યસો હાયતિ ઇત્થીનં, તસ્મા તાત પલાયહં [પલાયિહં (સ્યા.), પલાયિતં (ક.)].

૪૮. યસ્સસ્સિનં કુલે જાતં, આગતં યા ન ઇચ્છતિ;

સોચતિ ચિરરત્તાય, વાતગ્ગમિવ ભદ્દલીતિ [કુન્દલીતિ (સી. પી.), ગદ્રભીતિ (સ્યા.)].

વાતગ્ગસિન્ધવજાતકં છટ્ઠં.

૨૬૭. કક્કટકજાતકં (૩-૨-૭)

૪૯. સિઙ્ગીમિગો આયતચક્ખુનેત્તો, અટ્ઠિત્તચો વારિસયો અલોમો;

તેનાભિભૂતો કપણં રુદામિ, મા હેવ મં પાણસમં જહેય્ય [જહેય્યા (પી.) જહા’ય્યે (?)].

૫૦. અય્ય ન તં જહિસ્સામિ, કુઞ્જરં સટ્ઠિહાયનં [કુઞ્જર સટ્ઠિહાયન (સી. પી.)];

પથબ્યા ચાતુરન્તાય, સુપ્પિયો હોસિ મે તુવં.

૫૧. યે કુળીરા સમુદ્દસ્મિં, ગઙ્ગાય યમુનાય [નમ્મદાય (સી. પી.)] ચ;

તેસં ત્વં વારિજો સેટ્ઠો, મુઞ્ચ રોદન્તિયા પતિન્તિ.

કક્કટક [કુળીર (ક.)] જાતકં સત્તમં.

૨૬૮. આરામદૂસકજાતકં (૩-૨-૮)

૫૨. યો વે સબ્બસમેતાનં, અહુવા સેટ્ઠસમ્મતો;

તસ્સાયં એદિસી પઞ્ઞા, કિમેવ ઇતરા પજા.

૫૩. એવમેવ તુવં બ્રહ્મે, અનઞ્ઞાય વિનિન્દસિ;

કથં મૂલં અદિસ્વાન [કથંહિ મૂલં અદિત્વા (સ્યા. પી.)], રુક્ખં જઞ્ઞા પતિટ્ઠિતં.