૪. અબ્ભન્તરવગ્ગો

૨૮૧. અબ્ભન્તરજાતકં (૩-૪-૧)

૯૧. અબ્ભન્તરો નામ દુમો, યસ્સ દિબ્યમિદં ફલં;

ભુત્વા દોહળિની નારી, ચક્કવત્તિં વિજાયતિ.

૯૨. ત્વમ્પિ [ત્વઞ્ચ (સી. પી.), ત્વં હિ (ક.)] ભદ્દે મહેસીસિ, સા ચાપિ [ચાસિ (સી. પી.)] પતિનો પિયા;

આહરિસ્સતિ તે રાજા, ઇદં અબ્ભન્તરં ફલં.

૯૩. ભત્તુરત્થે પરક્કન્તો, યં ઠાનમધિગચ્છતિ;

સૂરો અત્તપરિચ્ચાગી, લભમાનો ભવામહન્તિ.

અબ્ભન્તરજાતકં પઠમં.

૨૮૨. સેય્યજાતકં (૩-૪-૨)

૯૪. સેય્યંસો સેય્યસો હોતિ, યો સેય્યમુપસેવતિ;

એકેન સન્ધિં કત્વાન, સતં વજ્ઝે [મચ્ચે (ક.), બજ્ઝે (ક. અટ્ઠ.)] અમોચયિં.

૯૫. [કસ્મા…પે… સગ્ગં ન ગચ્છેય્ય (કત્થચિ)] તસ્મા સબ્બેન લોકેન, સન્ધિં કત્વાન એકતો [એકકો (સી. સ્યા. પી.)];

પેચ્ચ સગ્ગં નિગચ્છેય્ય [કસ્મા…પે… સગ્ગં ન ગચ્છેય્ય (કત્થચિ)], ઇદં સુણાથ કાસિયા [કાસયો (સી. પી.)].

૯૬. ઇદં વત્વા મહારાજા, કંસો બારાણસિગ્ગહો;

ધનું કણ્ડઞ્ચ [તૂણિઞ્ચ (સી. પી.)] નિક્ખિપ્પ, સંયમં અજ્ઝુપાગમીતિ.

સેય્યજાતકં દુતિયં.

૨૮૩. વડ્ઢકીસૂકરજાતકં (૩-૪-૩)

૯૭. વરં વરં ત્વં નિહનં પુરે ચરિ, અસ્મિં પદેસે અભિભુય્ય સૂકરે;

સો દાનિ એકો બ્યપગમ્મ ઝાયસિ, બલં નુ તે બ્યગ્ઘ ન ચજ્જ વિજ્જતિ.

૯૮. ઇમે સુદં [ઇમસ્સુ તા (સ્યા. ક.)] યન્તિ દિસોદિસં પુરે, ભયટ્ટિતા લેણગવેસિનો પુથુ;

તે દાનિ સઙ્ગમ્મ વસન્તિ એકતો, યત્થટ્ઠિતા દુપ્પસહજ્જમે [દુપ્પસહજ્જિમે (સ્યા.)] મયા.

૯૯. નમત્થુ સઙ્ઘાન સમાગતાનં, દિસ્વા સયં સખ્ય વદામિ અબ્ભુતં;

બ્યગ્ઘં મિગા યત્થ જિનિંસુ દાઠિનો, સામગ્ગિયા દાઠબલેસુ મુચ્ચરેતિ.

વડ્ઢકીસૂકરજાતકં તતિયં.

૨૮૪. સિરિજાતકં (૩-૪-૪)

૧૦૦. યં ઉસ્સુકા સઙ્ઘરન્તિ, અલક્ખિકા બહું ધનં;

સિપ્પવન્તો અસિપ્પા ચ, લક્ખિવા તાનિ ભુઞ્જતિ.

૧૦૧. સબ્બત્થ કતપુઞ્ઞસ્સ, અતિચ્ચઞ્ઞેવ પાણિનો;

ઉપ્પજ્જન્તિ બહૂ ભોગા, અપ્પનાયતનેસુપિ.

૧૦૨. કુક્કુટો [કુક્કુટ (સી. પી.), કુક્કુટા (સી. નિસ્સય, સદ્દનીતિ)] મણયો દણ્ડો, થિયો ચ પુઞ્ઞલક્ખણા;

ઉપ્પજ્જન્તિ અપાપસ્સ, કતપુઞ્ઞસ્સ જન્તુનોતિ.

સિરિજાતકં ચતુત્થં.

૨૮૫. મણિસૂકરજાતકં (૩-૪-૫)

૧૦૩. દરિયા સત્ત વસ્સાનિ, તિંસમત્તા વસામસે;

હઞ્ઞામ [હઞ્છેમ (સી. પી.), હઞ્છામ (?)] મણિનો આભં, ઇતિ નો મન્તનં અહુ.

૧૦૪. યાવતા મણિં ઘંસામ [યાવ યાવ નિઘંસામ (સી. પી.)], ભિય્યો વોદાયતે મણિ;

ઇદઞ્ચ દાનિ પુચ્છામ, કિં કિચ્ચં ઇધ મઞ્ઞસિ.

૧૦૫. અયં મણિ વેળૂરિયો, અકાચો વિમલો [વિપુલો (ક.)] સુભો;

નાસ્સ સક્કા સિરિં હન્તું, અપક્કમથ સૂકરાતિ.

મણિસૂકર [મણિઘંસ (ક.)] જાતકં પઞ્ચમં.

૨૮૬. સાલૂકજાતકં (૩-૪-૬)

૧૦૬. મા સાલૂકસ્સ પિહયિ, આતુરન્નાનિ ભુઞ્જતિ;

અપ્પોસ્સુક્કો ભુસં ખાદ, એતં દીઘાયુલક્ખણં.

૧૦૭. ઇદાનિ સો ઇધાગન્ત્વા, અતિથી યુત્તસેવકો;

અથ દક્ખસિ સાલૂકં, સયન્તં મુસલુત્તરં.

૧૦૮. વિકન્તં [વિકત્તં (સી.), વિકન્તિયમાનં છિન્દિયમાનંતિ અત્થો] સૂકરં દિસ્વા, સયન્તં મુસલુત્તરં;

જરગ્ગવા વિચિન્તેસું, વરમ્હાકં ભુસામિવાતિ.

સાલૂકજાતકં છટ્ઠં.

૨૮૭. લાભગરહજાતકં (૩-૪-૭)

૧૦૯. નાનુમ્મત્તો નાપિસુણો, નાનટો નાકુતૂહલો;

મૂળ્હેસુ લભતે લાભં, એસા તે અનુસાસની.

૧૧૦. ધિરત્થુ તં યસલાભં, ધનલાભઞ્ચ બ્રાહ્મણ;

યા વુત્તિ વિનિપાતેન, અધમ્મચરણેન [અધમ્મચરિયાય (સી. સ્યા.)] વા.

૧૧૧. અપિ ચે પત્તમાદાય, અનગારો પરિબ્બજે;

એસાવ જીવિકા સેય્યો [સેય્યા (સી. સ્યા. પી.)], યા ચાધમ્મેન એસનાતિ.

લાભગરહજાતકં સત્તમં.

૨૮૮. મચ્છુદ્દાનજાતકં (૩-૪-૮)

૧૧૨. અગ્ઘન્તિ મચ્છા અધિકં સહસ્સં, ન સો અત્થિ યો ઇમં સદ્દહેય્ય;

મય્હઞ્ચ અસ્સુ ઇધ સત્ત માસા, અહમ્પિ તં મચ્છુદ્દાનં કિણેય્યં.

૧૧૩. મચ્છાનં ભોજનં દત્વા, મમ દક્ખિણમાદિસિ;

તં દક્ખિણં સરન્તિયા, કતં અપચિતિં તયા.

૧૧૪. પદુટ્ઠચિત્તસ્સ ન ફાતિ હોતિ, ન ચાપિ તં [નં (સી. સ્યા.)] દેવતા પૂજયન્તિ;

યો ભાતરં પેત્તિકં સાપતેય્યં, અવઞ્ચયી દુક્કટકમ્મકારીતિ.

મચ્છુદ્દાનજાતકં અટ્ઠમં.

૨૮૯. નાનાછન્દજાતકં (૩-૪-૯)

૧૧૫. નાનાછન્દા મહારાજ, એકાગારે વસામસે;

અહં ગામવરં ઇચ્છે, બ્રાહ્મણી ચ ગવં સતં.

૧૧૬. પુત્તો ચ આજઞ્ઞરથં, કઞ્ઞા ચ મણિકુણ્ડલં;

યા ચેસા પુણ્ણિકા જમ્મી, ઉદુક્ખલંભિકઙ્ખતિ.

૧૧૭. બ્રાહ્મણસ્સ ગામવરં, બ્રાહ્મણિયા ગવં સતં;

પુત્તસ્સ આજઞ્ઞરથં, કઞ્ઞાય મણિકુણ્ડલં;

યઞ્ચેતં પુણ્ણિકં જમ્મિં, પટિપાદેથુદુક્ખલન્તિ.

નાનાછન્દજાતકં નવમં.

૨૯૦. સીલવીમંસકજાતકં (૩-૪-૧૦)

૧૧૮. સીલં કિરેવ કલ્યાણં, સીલં લોકે અનુત્તરં;

પસ્સ ઘોરવિસો નાગો, સીલવાતિ ન હઞ્ઞતિ.

૧૧૯. સોહં સીલં સમાદિસ્સં, લોકે અનુમતં સિવં;

અરિયવુત્તિસમાચારો, યેન વુચ્ચતિ સીલવા.

૧૨૦. ઞાતીનઞ્ચ પિયો હોતિ, મિત્તેસુ ચ વિરોચતિ;

કાયસ્સ ભેદા સુગતિં, ઉપપજ્જતિ સીલવાતિ.

સીલવીમંસકજાતકં દસમં.

અબ્ભન્તરવગ્ગો ચતુત્થો.

તસ્સુદ્દાનં –

દુમ કંસવરુત્તમબ્યગ્ઘમિગા, મણયો મણિ સાલુકમવ્હયનો;

અનુસાસનિયોપિ ચ મચ્છવરો, મણિકુણ્ડલકેન કિરેન દસાતિ.