૩. ઉદપાનવગ્ગો

૨૭૧. ઉદપાનદૂસકજાતકં (૩-૩-૧)

૬૧. આરઞ્ઞિકસ્સ ઇસિનો, ચિરરત્તં તપસ્સિનો;

કિચ્છાકતં ઉદપાનં, કથં સમ્મ અવાહસિ [અવાહયિ (સી. પી.), અપાહસિ (સ્યા.)].

૬૨. એસ ધમ્મો સિઙ્ગાલાનં, યં પિત્વા ઓહદામસે;

પિતુપિતામહં ધમ્મો, ન તં [ન નં (સી. પી.)] ઉજ્ઝાતુમરહસિ.

૬૩. યેસં વો એદિસો ધમ્મો, અધમ્મો પન કીદિસો;

મા વો ધમ્મં અધમ્મં વા, અદ્દસામ કુદાચનન્તિ.

ઉદપાનદૂસકજાતકં પઠમં.

૨૭૨. બ્યગ્ઘજાતકં (૩-૩-૨)

૬૪. યેન મિત્તેન સંસગ્ગા, યોગક્ખેમો વિહિય્યતિ;

પુબ્બેવજ્ઝાભવં તસ્સ, રુક્ખે અક્ખીવ પણ્ડિતો.

૬૫. યેન મિત્તેન સંસગ્ગા, યોગક્ખેમો પવડ્ઢતિ;

કરેય્યત્તસમં વુત્તિં, સબ્બકિચ્ચેસુ પણ્ડિતો.

૬૬. એથ બ્યગ્ઘા નિવત્તવ્હો, પચ્ચુપેથ [પચ્ચમેથ (સી. પી.)] મહાવનં;

મા વનં છિન્દિ નિબ્યગ્ઘં, બ્યગ્ઘા માહેસુ નિબ્બનાતિ.

બ્યગ્ઘજાતકં દુતિયં.

૨૭૩. કચ્છપજાતકં (૩-૩-૩)

૬૭. કો નુ ઉદ્ધિતભત્તોવ [ઉદ્દિતભત્તોવ (સી.), વડ્ઢિતભત્તોવ (સ્યા.)], પૂરહત્થોવ બ્રાહ્મણો;

કહં નુ ભિક્ખં અચરિ, કં સદ્ધં ઉપસઙ્કમિ.

૬૮. અહં કપિસ્મિ દુમ્મેધો, અનામાસાનિ આમસિં;

ત્વં મં મોચય ભદ્દન્તે, મુત્તો ગચ્છેય્ય પબ્બતં.

૬૯. કચ્છપા કસ્સપા હોન્તિ, કોણ્ડઞ્ઞા હોન્તિ મક્કટા;

મુઞ્ચ કસ્સપ કોણ્ડઞ્ઞં, કતં મેથુનકં તયાતિ.

કચ્છપજાતકં તતિયં.

૨૭૪. લોલજાતકં (૩-૩-૪)

૭૦. કાયં બલાકા સિખિની, ચોરી લઙ્ઘિપિતામહા;

ઓરં બલાકે આગચ્છ, ચણ્ડો મે વાયસો સખા.

૭૧. નાહં બલાકા સિખિની, અહં લોલોસ્મિ વાયસો;

અકત્વા વચનં તુય્હં, પસ્સ લૂનોસ્મિ આગતો.

૭૨. પુનપાપજ્જસી સમ્મ, સીલઞ્હિ તવ તાદિસં;

ન હિ માનુસકા ભોગા, સુભુઞ્જા હોન્તિ પક્ખિનાતિ.

લોલજાતકં ચતુત્થં.

૨૭૫. રુચિરજાતકં (૩-૩-૫)

૭૩. કાયં બલાકા રુચિરા, કાકનીળસ્મિમચ્છતિ;

ચણ્ડો કાકો સખા મય્હં, યસ્સ [તસ્સ (સી. પી.)] ચેતં કુલાવકં.

૭૪. નનુ મં સમ્મ જાનાસિ, દિજ સામાકભોજન;

અકત્વા વચનં તુય્હં, પસ્સ લૂનોસ્મિ આગતો.

૭૫. પુનપાપજ્જસી સમ્મ, સીલઞ્હિ તવ તાદિસં;

ન હિ માનુસકા ભોગા, સુભુઞ્જા હોન્તિ પક્ખિનાતિ.

રુચિરજાતકં પઞ્ચમં.

૨૭૬. કુરુધમ્મજાતકં (૩-૩-૬)

૭૬. તવ સદ્ધઞ્ચ સીલઞ્ચ, વિદિત્વાન જનાધિપ;

વણ્ણં અઞ્જનવણ્ણેન, કાલિઙ્ગસ્મિં નિમિમ્હસે [વિનિમ્હસે (સ્યા.), વનિમ્હસે (ક.)].

૭૭. અન્નભચ્ચા ચભચ્ચા ચ, યોધ ઉદ્દિસ્સ ગચ્છતિ;

સબ્બે તે અપ્પટિક્ખિપ્પા, પુબ્બાચરિયવચો ઇદં.

૭૮. દદામિ વો બ્રાહ્મણા નાગમેતં, રાજારહં રાજભોગ્ગં યસસ્સિનં;

અલઙ્કતં હેમજાલાભિછન્નં, સસારથિં ગચ્છથ યેન કામન્તિ.

કુરુધમ્મજાતકં [કુરુધમ્મજાતકં (સી. સ્યા. પી.)] છટ્ઠં.

૨૭૭. રોમકજાતકં (૩-૩-૭)

૭૯. વસ્સાનિ પઞ્ઞાસ સમાધિકાનિ, વસિમ્હ સેલસ્સ ગુહાય રોમક;

અસઙ્કમાના અભિનિબ્બુતત્તા [અભિનિબ્બુતચિત્તા (સ્યા. ક.)], હત્થત્ત [હત્થત્થ (સ્યા.)] માયન્તિ મમણ્ડજા પુરે.

૮૦. તે દાનિ વક્કઙ્ગ કિમત્થમુસ્સુકા, ભજન્તિ અઞ્ઞં ગિરિકન્દરં દિજા;

ન નૂન મઞ્ઞન્તિ મમં યથા પુરે, ચિરપ્પવુત્થા અથ વા ન તે ઇમે.

૮૧. જાનામ તં ન મયં સમ્પમૂળ્હા [ન મય’મસ્મ મૂળ્હા (સી. પી.)], સોયેવ ત્વં તે મયમસ્મ નાઞ્ઞે;

ચિત્તઞ્ચ તે અસ્મિં જને પદુટ્ઠં, આજીવિકા [આજીવક (સી. સ્યા.), આજીવિક (પી.)] તેન તમુત્તસામાતિ.

રોમકજાતકં સત્તમં.

૨૭૮. મહિંસરાજજાતકં (૩-૩-૮)

૮૨. કિમત્થ [કમત્થ (સી. પી.)] મભિસન્ધાય, લહુચિત્તસ્સ દુબ્ભિનો [દૂભિનો (સી. પી.)];

સબ્બકામદદસ્સેવ [દુહસ્સેવ (સી. સ્યા. પી.), રહસ્સેવ (ક.)], ઇમં દુક્ખં તિતિક્ખસિ.

૮૩. સિઙ્ગેન નિહનાહેતં, પદસા ચ અધિટ્ઠહ;

ભિય્યો [ભીયો (સી.)] બાલા પકુજ્ઝેય્યું, નો ચસ્સ પટિસેધકો.

૮૪. મમેવાયં મઞ્ઞમાનો, અઞ્ઞેપેવં [અઞ્ઞમ્પેવં (સી. સ્યા. પી.)] કરિસ્સતિ;

તે નં તત્થ વધિસ્સન્તિ, સા મે મુત્તિ ભવિસ્સતીતિ.

મહિંસરાજજાતકં [મહિસજાતકં (સી. સ્યા. પી.)] અટ્ઠમં.

૨૭૯. સતપત્તજાતકં (૩-૩-૯)

૮૫. યથા માણવકો પન્થે, સિઙ્ગાલિં વનગોચરિં;

અત્થકામં પવેદેન્તિં [પવદન્તિં (પી.)], અનત્થકામાતિ મઞ્ઞતિ;

અનત્થકામં સતપત્તં, અત્થકામોતિ મઞ્ઞતિ.

૮૬. એવમેવ ઇધેકચ્ચો, પુગ્ગલો હોતિ તાદિસો;

હિતેહિ વચનં વુત્તો, પટિગણ્હાતિ વામતો.

૮૭. યે ચ ખો નં પસંસન્તિ, ભયા ઉક્કંસયન્તિ વા [ચ (સી. પી.)];

તઞ્હિ સો મઞ્ઞતે મિત્તં, સતપત્તંવ માણવોતિ.

સતપત્તજાતકં નવમં.

૨૮૦. પુટદૂસકજાતકં (૩-૩-૧૦)

૮૮. અદ્ધા હિ નૂન મિગરાજા, પુટકમ્મસ્સ કોવિદો;

તથા હિ પુટં દૂસેતિ, અઞ્ઞં નૂન કરિસ્સતિ.

૮૯. ન મે માતા વા પિતા વા, પુટકમ્મસ્સ કોવિદો;

કતં કતં ખો દૂસેમ, એવં ધમ્મમિદં કુલં.

૯૦. યેસં વો એદિસો ધમ્મો, અધમ્મો પન કીદિસો;

મા વો ધમ્મં અધમ્મં વા, અદ્દસામ કુદાચનન્તિ.

પુટદૂસકજાતકં દસમં.

ઉદપાનવગ્ગો [અરઞ્ઞવગ્ગો (સી. પી. ક.)] તતિયો.

તસ્સુદ્દાનં –

ઉદપાનવરં વનબ્યગ્ઘ કપિ, સિખિની ચ બલાક રુચિરવરો;

સુજનાધિપરોમકદૂસ પુન, સતપત્તવરો પુટકમ્મ દસાતિ.