૯. ઉપાહનવગ્ગો

૨૩૧. ઉપાહનજાતકં (૨-૯-૧)

૧૬૧. યથાપિ કીતા પુરિસસ્સુપાહના, સુખસ્સ અત્થાય દુખં ઉદબ્બહે;

ઘમ્માભિતત્તા થલસા પપીળિતા, તસ્સેવ પાદે પુરિસસ્સ ખાદરે.

૧૬૨. એવમેવ યો દુક્કુલીનો અનરિયો, તમ્માક [તમ્હાક (સી.), તુમ્હાક (સ્યા. પી.)] વિજ્જઞ્ચ સુતઞ્ચ આદિય;

તમેવ સો તત્થ સુતેન ખાદતિ, અનરિયો વુચ્ચતિ દુપાહનૂપમોતિ [પાનદૂપમોતિ (સી. પી.)].

ઉપાહનજાતકં પઠમં.

૨૩૨. વીણાગુણજાતકં (૨-૯-૨)

૧૬૩. એકચિન્તિતો યમત્થો, બાલો અપરિણાયકો;

ન હિ ખુજ્જેન વામેન, ભોતિ સઙ્ગન્તુમરહસિ.

૧૬૪. પુરિસૂસભં મઞ્ઞમાના, અહં ખુજ્જમકામયિં;

સોયં સંકુટિતો સેતિ, છિન્નતન્તિ યથા વિણાતિ [થુણાતિ (સી.)].

વીણાગુણજાતકં દુતિયં.

૨૩૩. વિકણ્ણજાતકં (૨-૯-૩)

૧૬૫. કામં યહિં ઇચ્છસિ તેન ગચ્છ, વિદ્ધોસિ મમ્મમ્હિ [મમસ્મિ (ક.)] વિકણ્ણકેન;

હતોસિ ભત્તેન સુવાદિતેન [સવાદિતેન (સી. સ્યા. પી.)], લોલો ચ મચ્છે અનુબન્ધમાનો.

૧૬૬. એવમ્પિ લોકામિસં ઓપતન્તો, વિહઞ્ઞતી ચિત્તવસાનુવત્તી;

સો હઞ્ઞતિ ઞાતિસખાન મજ્ઝે, મચ્છાનુગો સોરિવ સુંસુમારોતિ [સુસુમારો (ક.)].

વિકણ્ણજાતકં તતિયં.

૨૩૪. અસિતાભૂજાતકં (૨-૯-૪)

૧૬૭. ત્વમેવ દાનિમકર [મકરિ (સ્યા.), મકરા (ક. સી.)], યં કામો બ્યગમા તયિ;

સોયં અપ્પટિસન્ધિકો, ખરછિન્નંવ રેનુકં [રેરુકં (સી. પી.)].

૧૬૮. અત્રિચ્છં [અત્રિચ્છા (સી. સ્યા. પી.)] અતિલોભેન, અતિલોભમદેન ચ;

એવં હાયતિ અત્થમ્હા, અહંવ અસિતાભુયાતિ.

અસિતાભૂજાતકં ચતુત્થં.

૨૩૫. વચ્છનખજાતકં (૨-૯-૫)

૧૬૯. સુખા ઘરા વચ્છનખ, સહિરઞ્ઞા સભોજના;

યત્થ ભુત્વા પિવિત્વા ચ, સયેય્યાથ અનુસ્સુકો.

૧૭૦. ઘરા નાનીહમાનસ્સ, ઘરા નાભણતો મુસા;

ઘરા નાદિન્નદણ્ડસ્સ, પરેસં અનિકુબ્બતો [અનિક્રુબ્બતો (ક.)];

એવં છિદ્દં દુરભિસમ્ભવં [દુરભિભવં (સી. પી.)], કો ઘરં પટિપજ્જતીતિ.

વચ્છનખજાતકં પઞ્ચમં.

૨૩૬. બકજાતકં (૨-૯-૬)

૧૭૧. ભદ્દકો વતયં પક્ખી, દિજો કુમુદસન્નિભો;

વૂપસન્તેહિ પક્ખેહિ, મન્દમન્દોવ ઝાયતિ.

૧૭૨. નાસ્સ સીલં વિજાનાથ, અનઞ્ઞાય પસંસથ;

અમ્હે દિજો ન પાલેતિ, તેન પક્ખી ન ફન્દતીતિ.

બકજાતકં છટ્ઠં.

૨૩૭. સાકેતજાતકં (૨-૯-૭)

૧૭૩. કો નુ ખો ભગવા હેતુ, એકચ્ચે ઇધ પુગ્ગલે;

અતીવ હદયં નિબ્બાતિ, ચિત્તઞ્ચાપિ પસીદતિ.

૧૭૪. પુબ્બેવ સન્નિવાસેન, પચ્ચુપ્પન્નહિતેન વા;

એવં તં જાયતે પેમં, ઉપ્પલંવ યથોદકેતિ.

સાકેતજાતકં સત્તમં.

૨૩૮. એકપદજાતકં (૨-૯-૮)

૧૭૫. ઇઙ્ઘ એકપદં તાત, અનેકત્થપદસ્સિતં [પદનિસ્સિતં (સી. પી.)];

કિઞ્ચિ સઙ્ગાહિકં બ્રૂસિ, યેનત્થે સાધયેમસે.

૧૭૬. દક્ખેય્યેકપદં તાત, અનેકત્થપદસ્સિતં;

તઞ્ચ સીલેન સઞ્ઞુત્તં, ખન્તિયા ઉપપાદિતં;

અલં મિત્તે સુખાપેતું, અમિત્તાનં દુખાય ચાતિ.

એકપદજાતકં અટ્ઠમં.

૨૩૯. હરિતમણ્ડૂકજાતકં (૨-૯-૯)

૧૭૭. આસીવિસમ્પિ મં [આસીવિસં મમં (સી. પી.)] સન્તં, પવિટ્ઠં કુમિનામુખં;

રુચ્ચતે હરિતામાતા, યં મં ખાદન્તિ મચ્છકા.

૧૭૮. વિલુમ્પતેવ પુરિસો, યાવસ્સ ઉપકપ્પતિ;

યદા ચઞ્ઞે વિલુમ્પન્તિ, સો વિલુત્તો વિલુમ્પતીતિ [વિલુપ્પતીતિ (?)].

હરિતમણ્ડૂકજાતકં નવમં.

૨૪૦. મહાપિઙ્ગલજાતકં (૨-૯-૧૦)

૧૭૯. સબ્બો જનો હિંસિતો પિઙ્ગલેન, તસ્મિં મતે પચ્ચયા [પચ્ચયં (સી. સ્યા. પી.)] વેદયન્તિ;

પિયો નુ તે આસિ અકણ્હનેત્તો, કસ્મા નુ ત્વં રોદસિ દ્વારપાલ.

૧૮૦. ન મે પિયો આસિ અકણ્હનેત્તો, ભાયામિ પચ્ચાગમનાય તસ્સ;

ઇતો ગતો હિંસેય્ય મચ્ચુરાજં, સો હિંસિતો આનેય્ય પુન ઇધ.

૧૮૧. દડ્ઢો વાહસહસ્સેહિ, સિત્તો ઘટસતેહિ સો;

પરિક્ખતા ચ સા ભૂમિ, મા ભાયિ નાગમિસ્સતીતિ.

મહાપિઙ્ગલજાતકં દસમં.

ઉપાહનવગ્ગો નવમો.

તસ્સુદ્દાનં –

વરુપાહન ખુજ્જ વિકણ્ણકકો, અસિતાભુય પઞ્ચમવચ્છનખો;

દિજ પેમવરુત્તમએકપદં, કુમિનામુખ પિઙ્ગલકેન દસાતિ.