૨. દુકનિપાતો

૧. દળ્હવગ્ગો

૧૫૧. રાજોવાદજાતકં (૨-૧-૧)

૧. દળ્હં દળ્હસ્સ ખિપતિ, બલ્લિકો [મલ્લિકો (સી. પી.)] મુદુના મુદું;

સાધુમ્પિ સાધુના જેતિ, અસાધુમ્પિ અસાધુના;

એતાદિસો અયં રાજા, મગ્ગા ઉય્યાહિ સારથિ.

૨. અક્કોધેન જિને કોધં, અસાધું સાધુના જિને;

જિને કદરિયં દાનેન, સચ્ચેનાલિકવાદિનં;

એતાદિસો અયં રાજા, મગ્ગા ઉય્યાહિ સારથીતિ.

રાજોવાદજાતકં પઠમં.

૧૫૨. અસમેક્ખિતકમ્મન્તં, તુરિતાભિનિપાતિનં.

સાનિ કમ્માનિ તપ્પેન્તિ, ઉણ્હંવજ્ઝોહિતં મુખે.

૪. સીહો ચ સીહનાદેન, દદ્દરં અભિનાદયિ;

સુત્વા સીહસ્સ નિગ્ઘોસં, સિઙ્ગાલો [સિગાલો (સી. સ્યા. પી.)] દદ્દરે વસં;

ભીતો સન્તાસમાપાદિ, હદયઞ્ચસ્સ અપ્ફલીતિ.

સિઙ્ગાલજાતકં [સિગાલજાતકં (સી. સ્યા. પી.)] દુતિયં.

૧૫૩. સૂકરજાતકં (૨-૧-૩)

૫. ચતુપ્પદો અહં સમ્મ, ત્વમ્પિ સમ્મ ચતુપ્પદો;

એહિ સમ્મ [સીહ (સી. પી.)] નિવત્તસ્સુ, કિં નુ ભીતો પલાયસિ.

૬. અસુચિ પૂતિલોમોસિ, દુગ્ગન્ધો વાસિ સૂકર;

સચે યુજ્ઝિતુકામોસિ, જયં સમ્મ દદામિ તેતિ.

સૂકરજાતકં તતિયં.

૧૫૪. ઉરગજાતક (૨-૧-૪)

૭. ઇધૂરગાનં પવરો પવિટ્ઠો, સેલસ્સ વણ્ણેન પમોક્ખમિચ્છં;

બ્રહ્મઞ્ચ વણ્ણં [વક્કં (ક.)] અપચાયમાનો, બુભુક્ખિતો નો વિતરામિ [વિસહામિ (ક. સિ. સ્યા. પી.)] ભોત્તું.

૮. સો બ્રહ્મગુત્તો ચિરમેવ જીવ, દિબ્યા ચ તે પાતુભવન્તુ ભક્ખા;

યો બ્રહ્મવણ્ણં અપચાયમાનો, બુભુક્ખિતો નો વિતરાસિ [સબ્બત્થપિ સમાનં] ભોત્તુન્તિ.

ઉરગજાતકં ચતુત્થં.

૧૫૫. ભગ્ગજાતકં (૨-૧-૫)

૯. જીવ વસ્સસતં ભગ્ગ [ગગ્ગ (સી. પી.)], અપરાનિ ચ વીસતિં [વીસતિ (સ્યા. ક.)];

મા મં પિસાચા ખાદન્તુ, જીવ ત્વં સરદો સતં.

૧૦. ત્વમ્પિ વસ્સસતં જીવ, અપરાનિ ચ વીસતિં;

વિસં પિસાચા ખાદન્તુ, જીવ ત્વં સરદો સતન્તિ.

ભગ્ગજાતકં પઞ્ચમં.

૧૫૬. અલીનચિત્તજાતકં (૨-૧-૬)

૧૧. અલીનચિત્તં નિસ્સાય, પહટ્ઠા મહતી ચમૂ;

કોસલં સેનાસન્તુટ્ઠં, જીવગ્ગાહં અગાહયિ.

૧૨. એવં નિસ્સયસમ્પન્નો, ભિક્ખુ આરદ્ધવીરિયો;

ભાવયં કુસલં ધમ્મં, યોગક્ખેમસ્સ પત્તિયા;

પાપુણે અનુપુબ્બેન, સબ્બસંયોજનક્ખયન્તિ.

અલીનચિત્તજાતકં છટ્ઠં.

૧૫૭. ગુણજાતકં (૨-૧-૭)

૧૩. યેન કામં પણામેતિ, ધમ્મો બલવતં મિગી;

ઉન્નદન્તી વિજાનાહિ, જાતં સરણતો ભયં.

૧૪. અપિ ચેપિ દુબ્બલો મિત્તો, મિત્તધમ્મેસુ તિટ્ઠતિ;

સો ઞાતકો ચ બન્ધુ ચ, સો મિત્તો સો ચ મે સખા;

દાઠિનિ માતિમઞ્ઞિત્થો [મઞ્ઞિવો (સ્યા.), મઞ્ઞવ્હો (ક.)], સિઙ્ગાલો મમ પાણદોતિ.

ગુણજાતકં સત્તમં.

૧૫૮. સુહનુજાતકં (૨-૧-૮)

૧૫. નયિદં વિસમસીલેન, સોણેન સુહનૂ સહ;

સુહનૂપિ તાદિસોયેવ, યો સોણસ્સ સગોચરો.

૧૬. પક્ખન્દિના પગબ્ભેન, નિચ્ચં સન્દાનખાદિના;

સમેતિ પાપં પાપેન, સમેતિ અસતા અસન્તિ.

સુહનુજાતકં અટ્ઠમં.

૧૫૯. મોરજાતકં (૨-૧-૯)

૧૭. ઉદેતયં ચક્ખુમા એકરાજા, હરિસ્સવણ્ણો પથવિપ્પભાસો [પઠવિપ્પભાસો (સી. સ્યા. પી.)];

તં તં નમસ્સામિ હરિસ્સવણ્ણં પથવિપ્પભાસં, તયાજ્જ ગુત્તા વિહરેમુ દિવસં.

યે બ્રાહ્મણા વેદગૂ સબ્બધમ્મે, તે મે નમો તે ચ મં પાલયન્તુ;

નમત્થુ બુદ્ધાનં [બુદ્ધાન (?)] નમત્થુ બોધિયા, નમો વિમુત્તાનં [વિમુત્તાન (?)] નમો વિમુત્તિયા;

ઇમં સો પરિત્તં કત્વા, મોરો ચરતિ એસના.

૧૮. અપેતયં ચક્ખુમા એકરાજા, હરિસ્સવણ્ણો પથવિપ્પભાસો;

તં તં નમ્મસ્સામિ હરિસ્સવણ્ણં પથવિપ્પભાસં, તયાજ્જ ગુત્તા વિહરેમુ રત્તિં.

યે બ્રાહ્મણા વેદગૂ સબ્બધમ્મે, તે મે નમો તે ચ મં પાલયન્તુ;

નમત્થુ બુદ્ધાનં નમત્થુ બોધિયા, નમો વિમુત્તાનં નમો વિમુત્તિયા;

ઇમં સો પરિત્તં કત્વા, મોરો વાસમકપ્પયીતિ.

મોરજાતકં નવમં.

૧૬૦. વિનીલજાતકં (૨-૧-૧૦)

૧૯. એવમેવ નૂન [નુ (ક.)] રાજાનં, વેદેહં મિથિલગ્ગહં;

અસ્સા વહન્તિ આજઞ્ઞા, યથા હંસા વિનીલકં.

૨૦. વિનીલ દુગ્ગં ભજસિ, અભૂમિં તાત સેવસિ;

ગામન્તકાનિ [ગામન્તિકાનિ (સી.), ગામન્તરાનિ (ક.)] સેવસ્સુ, એતં માતાલયં તવાતિ.

વિનીલજાતકં દસમં.

દળ્હવગ્ગો પઠમો.

તસ્સુદ્દાનં –

વરબલ્લિક દદ્દર સૂકરકો, ઉરગૂત્તમ પઞ્ચમભગ્ગવરો;

મહતીચમુ યાવ સિઙ્ગાલવરો, સુહનુત્તમ મોર વિનીલં દસાતિ.

૨. સન્થવવગ્ગો

૧૬૧. ઇન્દસમાનગોત્તજાતકં (૨-૨-૧)

૨૧. ન સન્થવં [સન્ધવં (ક.)] કાપુરિસેન કયિરા, અરિયો અનરિયેન પજાનમત્થં;

ચિરાનુવુત્થોપિ કરોતિ પાપં, ગજો યથા ઇન્દસમાનગોત્તં.

૨૨. યં ત્વેવ જઞ્ઞા સદિસો મમન્તિ, સીલેન પઞ્ઞાય સુતેન ચાપિ;

તેનેવ મેત્તિં કયિરાથ સદ્ધિં, સુખો હવે સપ્પુરિસેન સઙ્ગમોતિ.

ઇન્દસમાનગોત્તજાતકં પઠમં.

૧૬૨. સન્થવજાતકં (૨-૨-૨)

૨૩. ન સન્થવસ્મા પરમત્થિ પાપિયો, યો સન્થવો [સન્ધવો (ક.)] કાપુરિસેન હોતિ;

સન્તપ્પિતો સપ્પિના પાયસેન [પાયાસેન (ક.)], કિચ્છાકતં પણ્ણકુટિં અદય્હિ [અદડ્ઢહિ (સી. સ્યા.), અદટ્ઠહિ (પી.), અદદ્દહિ (?)].

૨૪. ન સન્થવસ્મા પરમત્થિ સેય્યો, યો સન્થવો સપ્પુરિસેન હોતિ;

સીહસ્સ બ્યગ્ઘસ્સ ચ દીપિનો ચ, સામા મુખં લેહતિ સન્થવેનાતિ.

સન્થવજાતકં દુતિયં.

૧૬૩. સુસીમજાતકં (૨-૨-૩)

૨૫. કાળા મિગા સેતદન્તા તવીમે [તવ ઇમે (સી. સ્યા. પી.)], પરોસતં હેમજાલાભિછન્ના [હેમજાલાભિસઞ્છન્ના (સી.)];

તે તે દદામીતિ સુસીમ બ્રૂસિ, અનુસ્સરં પેત્તિપિતામહાનં.

૨૬. કાળા મિગા સેતદન્તા મમીમે [મમ ઇમે (સી. પી.)], પરોસતં હેમજાલાભિચ્છન્ના;

તે તે દદામીતિ વદામિ માણવ, અનુસ્સરં પેત્તિપિતામહાનન્તિ.

સુસીમજાતકં તતિયં.

૧૬૪. ગિજ્ઝજાતકં (૨-૨-૪)

૨૭. યં નુ ગિજ્ઝો યોજનસતં, કુણપાનિ અવેક્ખતિ;

કસ્મા જાલઞ્ચ પાસઞ્ચ, આસજ્જાપિ ન બુજ્ઝસિ.

૨૮. યદા પરાભવો હોતિ, પોસો જીવિતસઙ્ખયે;

અથ જાલઞ્ચ પાસઞ્ચ, આસજ્જાપિ ન બુજ્ઝતીતિ.

ગિજ્ઝજાતકં ચતુત્થં.

૧૬૫. નકુલજાતકં (૨-૨-૫)

૨૯. સન્ધિં કત્વા અમિત્તેન, અણ્ડજેન જલાબુજ;

વિવરિય દાઠં સેસિ [સયસિ (સી. સ્યા. પી.)], કુતો તે ભયમાગતં.

૩૦. સઙ્કેથેવ [સઙ્કતેવ (ક.)] અમિત્તસ્મિં, મિત્તસ્મિમ્પિ ન વિસ્સસે;

અભયા ભયમુપ્પન્નં, અપિ મૂલાનિ કન્તતીતિ [મૂલં નિકન્તતીતિ (સી.)].

નકુલજાતકં પઞ્ચમં.

૧૬૬. ઉપસાળકજાતકં (૨-૨-૬)

૩૧. ઉપસાળકનામાનિ [ઉપસાળ્હકનામાનં (સી. સ્યા. પી.)], સહસ્સાનિ ચતુદ્દસ;

અસ્મિં પદેસે દડ્ઢાનિ, નત્થિ લોકે અનામતં.

૩૨. યમ્હિ સચ્ચઞ્ચ ધમ્મો ચ, અહિંસા સંયમો દમો;

એતં અરિયા સેવન્તિ, એતં લોકે અનામતન્તિ.

ઉપસાળકજાતકં છટ્ઠં.

૧૬૭. સમિદ્ધિજાતકં (૨-૨-૭)

૩૩. અભુત્વા ભિક્ખસિ ભિક્ખુ, ન હિ ભુત્વાન ભિક્ખસિ;

ભુત્વાન ભિક્ખુ ભિક્ખસ્સુ, મા તં કાલો ઉપચ્ચગા.

૩૪. કાલં વોહં ન જાનામિ, છન્નો કાલો ન દિસ્સતિ;

તસ્મા અભુત્વા ભિક્ખામિ, મા મં કાલો ઉપચ્ચગાતિ.

સમિદ્ધિજાતકં સત્તમં.

૧૬૮. સકુણગ્ઘિજાતકં (૨-૨-૮)

૩૫. સેનો બલસા પતમાનો, લાપં ગોચરઠાયિનં;

સહસા અજ્ઝપ્પત્તોવ, મરણં તેનુપાગમિ.

૩૬. સોહં નયેન સમ્પન્નો, પેત્તિકે ગોચરે રતો;

અપેતસત્તુ મોદામિ, સમ્પસ્સં અત્થમત્તનોતિ.

સકુણગ્ઘિજાતકં અટ્ઠમં.

૧૬૯. અરકજાતકં (૨-૨-૯)

૩૭. યો વે મેત્તેન ચિત્તેન, સબ્બલોકાનુકમ્પતિ;

ઉદ્ધં અધો ચ તિરિયં, અપ્પમાણેન સબ્બસો.

૩૮. અપ્પમાણં હિતં ચિત્તં, પરિપુણ્ણં સુભાવિતં;

યં પમાણકતં કમ્મં, ન તં તત્રાવસિસ્સતીતિ.

અરકજાતકં નવમં.

૧૭૦. કકણ્ટકજાતકં (૨-૨-૧૦)

૩૯. નાયં પુરે ઉણ્ણમતિ [ઉન્નમતિ (સ્યા.)], તોરણગ્ગે કકણ્ટકો;

મહોસધ વિજાનાહિ, કેન થદ્ધો કકણ્ટકો.

૪૦. અલદ્ધપુબ્બં લદ્ધાન, અડ્ઢમાસં કકણ્ટકો;

અતિમઞ્ઞતિ રાજાનં, વેદેહં મિથિલગ્ગહન્તિ.

કકણ્ટકજાતકં દસમં.

સન્થવવગ્ગો દુતિયો.

તસ્સુદ્દાનં –

અથ ઇન્દસમાન સપણ્ણકુટિ, સુસિમુત્તમ ગિજ્ઝ જલાબુજકો;

ઉપસાળક ભિક્ખુ સલાપવરો, અથ મેત્તવરો દસપુણ્ણમતીતિ.

૩. કલ્યાણવગ્ગો

૧૭૧. કલ્યાણધમ્મજાતકં (૨-૩-૧)

૪૧. કલ્યાણધમ્મોતિ યદા જનિન્દ, લોકે સમઞ્ઞં અનુપાપુણાતિ;

તસ્મા ન હિય્યેથ [હીયેથ (સી.)] નરો સપઞ્ઞો, હિરિયાપિ સન્તો ધુરમાદિયન્તિ.

૪૨. સાયં સમઞ્ઞા ઇધ મજ્જ પત્તા, કલ્યાણધમ્મોતિ જનિન્દ લોકે;

તાહં સમેક્ખં ઇધ પબ્બજિસ્સં, ન હિ મત્થિ છન્દો ઇધ કામભોગેતિ.

કલ્યાણધમ્મજાતકં પઠમં.

૧૭૨. દદ્દરજાતકં (૨-૩-૨)

૪૩. કો નુ સદ્દેન મહતા, અભિનાદેતિ દદ્દરં;