૧૦. સિઙ્ગાલવગ્ગો

૨૪૧. સબ્બદાઠિજાતકં (૨-૧૦-૧)

૧૮૨. સિઙ્ગાલો માનથદ્ધો ચ, પરિવારેન અત્થિકો;

પાપુણિ મહતિં ભૂમિં, રાજાસિ સબ્બદાઠિનં.

૧૮૩. એવમેવ મનુસ્સેસુ, યો હોતિ પરિવારવા;

સો હિ તત્થ મહા હોતિ, સિઙ્ગાલો વિય દાઠિનન્તિ.

સબ્બદાઠિજાતકં પઠમં.

૨૪૨. સુનખજાતકં (૨-૧૦-૨)

૧૮૪. બાલો વતાયં સુનખો, યો વરત્તં [યો ચ યોત્તં (ક.)] ન ખાદતિ;

બન્ધના ચ પમુઞ્ચેય્ય, અસિતો ચ ઘરં વજે.

૧૮૫. અટ્ઠિતં મે મનસ્મિં મે, અથો મે હદયે કતં;

કાલઞ્ચ પટિકઙ્ખામિ, યાવ પસ્સુપતૂ જનો [પસુપતુજ્જનો (સ્યા. ક.)].

સુનખજાતકં દુતિયં.

૨૪૩. ગુત્તિલજાતકં (૨-૧૦-૩)

૧૮૬. સત્તતન્તિં સુમધુરં, રામણેય્યં અવાચયિં;

સો મં રઙ્ગમ્હિ અવ્હેતિ, સરણં મે હોહિ કોસિય.

૧૮૭. અહં તં સરણં સમ્મ [અહં તે સરણં હોમિ (વિ. વ. ૩૨૮)], અહમાચરિયપૂજકો;

ન તં જયિસ્સતિ સિસ્સો, સિસ્સમાચરિય જેસ્સસીતિ.

ગુત્તિલજાતકં તતિયં.

૨૪૪. વિગતિચ્છજાતકં (૨-૧૦-૪)

૧૮૮. યં પસ્સતિ ન તં ઇચ્છતિ, યઞ્ચ ન પસ્સતિ તં કિરિચ્છતિ;

મઞ્ઞામિ ચિરં ચરિસ્સતિ, ન હિ તં લચ્છતિ યં સ ઇચ્છતિ.

૧૮૯. યં લભતિ ન તેન તુસ્સતિ, યઞ્ચ પત્થેતિ લદ્ધં હીળેતિ;

ઇચ્છા હિ અનન્તગોચરા, વિગતિચ્છાન [વીતિચ્છાનં (સી. પી.)] નમો કરોમસેતિ.

વિગતિચ્છ [વીતિચ્છ (સી. પી.)] જાતકં ચતુત્થં.

૨૪૫. મૂલપરિયાયજાતકં (૨-૧૦-૫)

૧૯૦. કાલો ઘસતિ ભૂતાનિ, સબ્બાનેવ સહત્તના;

યો ચ કાલઘસો ભૂતો, સ ભૂતપચનિં પચિ.

૧૯૧. બહૂનિ નરસીસાનિ, લોમસાનિ બ્રહાનિ ચ;

ગીવાસુ પટિમુક્કાનિ, કોચિદેવેત્થ કણ્ણવાતિ.

મૂલપરિયાયજાતકં પઞ્ચમં.

૨૪૬. બાલોવાદજાતકં (૨-૧૦-૬)

૧૯૨. હન્ત્વા છેત્વા [ઝત્વા (સી. પી.), ઘત્વા (સ્યા.)] વધિત્વા ચ, દેતિ દાનં અસઞ્ઞતો;

એદિસં ભત્તં ભુઞ્જમાનો, સ પાપમુપલિમ્પતિ [સ પાપેન ઉપલિપ્પતિ (સી. પી.)].

૧૯૩. પુત્તદારમ્પિ ચે હન્ત્વા, દેતિ દાનં અસઞ્ઞતો;

ભુઞ્જમાનોપિ સપ્પઞ્ઞો, ન પાપમુપલિમ્પતીતિ.

બાલોવાદજાતકં છટ્ઠં.

૨૪૭. પાદઞ્જલીજાતકં (૨-૧૦-૭)

૧૯૪. અદ્ધા પાદઞ્જલી સબ્બે, પઞ્ઞાય અતિરોચતિ;

તથા હિ ઓટ્ઠં ભઞ્જતિ, ઉત્તરિં નૂન પસ્સતિ.

૧૯૫. નાયં ધમ્મં અધમ્મં વા, અત્થાનત્થઞ્ચ બુજ્ઝતિ;

અઞ્ઞત્ર ઓટ્ઠનિબ્ભોગા, નાયં જાનાતિ કિઞ્ચનન્તિ.

પાદઞ્જલીજાતકં સત્તમં.

૨૪૮. કિંસુકોપમજાતકં (૨-૧૦-૮)

૧૯૬. સબ્બેહિ કિંસુકો દિટ્ઠો, કિંન્વેત્થ વિચિકિચ્છથ;

ન હિ સબ્બેસુ ઠાનેસુ, સારથી પરિપુચ્છિતો.

૧૯૭. એવં સબ્બેહિ ઞાણેહિ, યેસં ધમ્મા અજાનિતા;

તે વે ધમ્મેસુ કઙ્ખન્તિ, કિંસુકસ્મિંવ ભાતરોતિ.

કિંસુકોપમજાતકં અટ્ઠમં.

૨૪૯. સાલકજાતકં (૨-૧૦-૯)

૧૯૮. એકપુત્તકો ભવિસ્સસિ, ત્વઞ્ચ નો હેસ્સસિ ઇસ્સરો કુલે;

ઓરોહ દુમસ્મા સાલક, એહિ દાનિ ઘરકં વજેમસે.

૧૯૯. નનુ મં સુહદયોતિ [નનુ મં હદયેતિ (સી. પી.)] મઞ્ઞસિ, યઞ્ચ મં હનસિ વેળુયટ્ઠિયા;

પક્કમ્બવને રમામસે, ગચ્છ ત્વં ઘરકં યથાસુખન્તિ.

સાલકજાતકં નવમં.

૨૫૦. કપિજાતકં (૨-૧૦-૧૦)

૨૦૦. અયં ઇસી ઉપસમસંયમે રતો, સ તિટ્ઠતિ [સન્તિટ્ઠતિ (સી. પી.)] સિસિરભયેન અટ્ટિતો;

હન્દ અયં પવિસતુમં અગારકં, વિનેતુ સીતં દરથઞ્ચ કેવલં.

૨૦૧. નાયં ઇસી ઉપસમસંયમે રતો, કપી અયં દુમવરસાખગોચરો;

સો દૂસકો રોસકો ચાપિ જમ્મો, સચેવજેમમ્પિ [સચે + આવજે + ઇમમ્પિ] દૂસેય્યગારન્તિ [દૂસયે ઘરન્તિ (સી. સ્યા. પી.)].

કપિજાતકં દસમં.

સિઙ્ગાલવગ્ગો દસમો.

તસ્સુદ્દાનં –

અથ રાજા સિઙ્ગાલવરો સુનખો, તથા કોસિય ઇચ્છતિ કાલઘસો;

અથ દાનવરોટ્ઠપિ સારથિના, પુનમ્બવનઞ્ચ સિસિરકપિ દસાતિ.

અથ વગ્ગુદ્દાનં –

દળ્હઞ્ચ વગ્ગં અપરેન સન્થવં, કલ્યાણવગ્ગાસદિસો ચ રૂહકં;

નતંદળ્હ બીરણથમ્ભકં પુન, કાસાવુપાહન સિઙ્ગાલકેન દસાતિ.

દુકનિપાતં નિટ્ઠિતં.