૮. કાસાવવગ્ગો

૨૨૧. કાસાવજાતકં (૨-૮-૧)

૧૪૧. અનિક્કસાવો કાસાવં, યો વત્થં પરિદહિસ્સતિ [પરિદહેસ્સતિ (સી. પી.)];

અપેતો દમસચ્ચેન, ન સો કાસાવમરહતિ.

૧૪૨. યો ચ વન્તકસાવસ્સ, સીલેસુ સુસમાહિતો;

ઉપેતો દમસચ્ચેન, સ વે કાસાવમરહતીતિ.

કાસાવજાતકં પઠમં.

૨૨૨. ચૂળનન્દિયજાતકં (૨-૮-૨)

૧૪૩. ઇદં તદાચરિયવચો, પારાસરિયો યદબ્રવિ [પોરાણાચરિયોબ્રવિ (ક.)];

માસુ ત્વં અકરિ [અકરા (સી. પી.)] પાપં, યં ત્વં પચ્છા કતં તપે.

૧૪૪. યાનિ કરોતિ પુરિસો, તાનિ અત્તનિ પસ્સતિ;

કલ્યાણકારી કલ્યાણં, પાપકારી ચ પાપકં;

યાદિસં વપતે બીજં, તાદિસં હરતે ફલન્તિ.

ચૂળનન્દિયજાતકં દુતિયં.

૨૨૩. પુટભત્તજાતકં (૨-૮-૩)

૧૪૫. નમે નમન્તસ્સ ભજે ભજન્તં, કિચ્ચાનુકુબ્બસ્સ કરેય્ય કિચ્ચં;

નાનત્થકામસ્સ કરેય્ય અત્થં, અસમ્ભજન્તમ્પિ ન સમ્ભજેય્ય.

૧૪૬. ચજે ચજન્તં વનથં ન કયિરા, અપેતચિત્તેન ન સમ્ભજેય્ય;

દિજો દુમં ખીણફલન્તિ ઞત્વા, અઞ્ઞં સમેક્ખેય્ય મહા હિ લોકોતિ.

પુટભત્તજાતકં તતિયં.

૨૨૪. કુમ્ભિલજાતકં (૨-૮-૪)

૧૪૭. યસ્સેતે ચતુરો ધમ્મા, વાનરિન્દ યથા તવ;

સચ્ચં ધમ્મો ધિતિ ચાગો, દિટ્ઠં સો અતિવત્તતિ.

૧૪૮. યસ્સ ચેતે ન વિજ્જન્તિ, ગુણા પરમભદ્દકા;

સચ્ચં ધમ્મો ધિતિ ચાગો, દિટ્ઠં સો નાતિવત્તતીતિ.

કુમ્ભિલજાતકં ચતુત્થં.

૨૨૫. ખન્તિવણ્ણજાતકં (૨-૮-૫)

૧૪૯. અત્થિ મે પુરિસો દેવ, સબ્બકિચ્ચેસુ બ્યાવટો [વાવટો (ક.)];

તસ્સ ચેકોપરાધત્થિ, તત્થ ત્વં કિન્તિ મઞ્ઞસિ.

૧૫૦. અમ્હાકમ્પત્થિ પુરિસો, એદિસો ઇધ વિજ્જતિ;

દુલ્લભો અઙ્ગસમ્પન્નો, ખન્તિરસ્માક રુચ્ચતીતિ.

ખન્તિવણ્ણજાતકં પઞ્ચમં.

૨૨૬. કોસિયજાતકં (૨-૮-૬)

૧૫૧. કાલે નિક્ખમના સાધુ, નાકાલે સાધુ નિક્ખમો;

અકાલેન હિ નિક્ખમ્મ, એકકમ્પિ બહુજ્જનો;

ન કિઞ્ચિ અત્થં જોતેતિ, ધઙ્કસેનાવ કોસિયં.

૧૫૨. ધીરો ચ વિધિવિધાનઞ્ઞૂ, પરેસં વિવરાનુગૂ;

સબ્બામિત્તે વસીકત્વા, કોસિયોવ સુખી સિયાતિ.

કોસિયજાતકં છટ્ઠં.

૨૨૭. ગૂથપાણજાતકં (૨-૮-૭)

૧૫૩. સૂરો સૂરેન સઙ્ગમ્મ, વિક્કન્તેન પહારિના;

એહિ નાગ નિવત્તસ્સુ, કિં નુ ભીતો પલાયસિ;

પસ્સન્તુ અઙ્ગમગધા, મમ તુય્હઞ્ચ વિક્કમં.

૧૫૪. ન તં પાદા વધિસ્સામિ, ન દન્તેહિ ન સોણ્ડિયા;

મીળ્હેન તં વધિસ્સામિ, પૂતિ હઞ્ઞતુ પૂતિનાતિ.

ગૂથપાણજાતકં સત્તમં.

૨૨૮. કામનીતજાતકં (૨-૮-૮)

૧૫૫. તયો ગિરિં અન્તરં કામયામિ, પઞ્ચાલા કુરુયો કેકકે ચ [કુરયો કેકયે ચ (સી.)];

તતુત્તરિં [તદુત્તરિં (ક.)] બ્રાહ્મણ કામયામિ, તિકિચ્છ મં બ્રાહ્મણ કામનીતં.

૧૫૬. કણ્હાહિદટ્ઠસ્સ કરોન્તિ હેકે, અમનુસ્સપવિટ્ઠસ્સ [અમનુસ્સવદ્ધસ્સ (સી. પી.), અમનુસ્સવિટ્ઠસ્સ (સ્યા.)] કરોન્તિ પણ્ડિતા;

ન કામનીતસ્સ કરોતિ કોચિ, ઓક્કન્તસુક્કસ્સ હિ કા તિકિચ્છાતિ.

કામનીતજાતકં અટ્ઠમં.

૨૨૯. પલાયિતજાતકં (૨-૮-૯)

૧૫૭. ગજગ્ગમેઘેહિ હયગ્ગમાલિભિ, રથૂમિજાતેહિ સરાભિવસ્સેભિ [સરાભિવસ્સભિ (સ્યા. સી. અટ્ઠ.), સરાભિવસ્સિભિ (?)];

થરુગ્ગહાવટ્ટ [ધનુગ્ગહાવટ્ટ (ક.)] દળ્હપ્પહારિભિ, પરિવારિતા તક્કસિલા સમન્તતો.

૧૫૮. [અભિધાવથા ચ પતથા ચ, વિવિધવિનદિતા ચ દન્તિભિ; વત્તતજ્જ તુમુલો ઘોસો, યથા વિજ્જુતા જલધરસ્સ ગજ્જતોતિ; (સી. પી. ક.)] અભિધાવથ ચૂપધાવથ ચ [અભિધાવથા ચુપ્પતથા ચ (સ્યા.)], વિવિધા વિનાદિતા [વિનાદિતત્થ (ક.)] વદન્તિભિ;

વત્તતજ્જ તુમુલો ઘોસો યથા, વિજ્જુલતા જલધરસ્સ ગજ્જતોતિ [અભિધાવથા ચ પતથા ચ, વિવિધવિનદિતા ચ દન્તિભિ; વત્તતજ્જ તુમુલો ઘોસો, યથા વિજ્જુતા જલધરસ્સ ગજ્જતોતિ; (સી. પી. ક.)].

પલાયિતજાતકં નવમં.

૨૩૦. દુતિયપલાયિતજાતકં (૨-૮-૧૦)

૧૫૯. ધજમપરિમિતં અનન્તપારં, દુપ્પસહંધઙ્કેહિ સાગરંવ [સાગરમિવ (સી. સ્યા. પી.)];

ગિરિમિવઅનિલેન દુપ્પસય્હો [દુપ્પસહો (સી. પી. ક.)], દુપ્પસહો અહમજ્જતાદિસેન.

૧૬૦. મા બાલિયં વિલપિ [વિપ્પલપિ (બહૂસુ)] ન હિસ્સ તાદિસં, વિડય્હસે [વિળય્હસે (સી. પી.)] ન હિ લભસે નિસેધકં;

આસજ્જસિ ગજમિવ એકચારિનં, યો તં પદા નળમિવ પોથયિસ્સતીતિ.

દુતિયપલાયિતજાતકં દસમં.

કાસાવવગ્ગો અટ્ઠમો.

તસ્સુદ્દાનં –

વરવત્થવચો દુમખીણફલં, ચતુરોધમ્મવરં પુરિસુત્તમ;

ધઙ્કમગધા ચ તયોગિરિનામ, ગજગ્ગવરો ધજવરેન દસાતિ.