૭. બીરણથમ્ભવગ્ગો

૨૧૧. સોમદત્તજાતકં (૨-૭-૧)

૧૨૧. અકાસિ યોગ્ગં ધુવમપ્પમત્તો, સંવચ્છરં બીરણથમ્ભકસ્મિં;

બ્યાકાસિ સઞ્ઞં પરિસં વિગય્હ, ન નિય્યમો તાયતિ અપ્પપઞ્ઞં.

૧૨૨. દ્વયં યાચનકો તાત, સોમદત્ત નિગચ્છતિ;

અલાભં ધનલાભં વા, એવં ધમ્મા હિ યાચનાતિ.

સોમદત્તજાતકં પઠમં.

૨૧૨. ઉચ્છિટ્ઠભત્તજાતકં (૨-૭-૨)

૧૨૩. અઞ્ઞો ઉપરિમો વણ્ણો, અઞ્ઞો વણ્ણો ચ હેટ્ઠિમો;

બ્રાહ્મણી ત્વેવ પુચ્છામિ, કિં હેટ્ઠા કિઞ્ચ ઉપ્પરિ.

૧૨૪. અહં નટોસ્મિ ભદ્દન્તે, ભિક્ખકોસ્મિ ઇધાગતો;

અયઞ્હિ કોટ્ઠમોતિણ્ણો, અયં સો યં [ત્વં (ક.)] ગવેસસીતિ.

ઉચ્છિટ્ઠભત્તજાતકં દુતિયં.

૨૧૩. ભરુજાતકં (૨-૭-૩)

૧૨૫. ઇસીનમન્તરં કત્વા, ભરુરાજાતિ [કુરુરાજાતિ (ક.)] મે સુતં;

ઉચ્છિન્નો સહ રટ્ઠેહિ [રટ્ઠેન (સી. પી.)], સરાજા વિભવઙ્ગતો.

૧૨૬. તસ્મા હિ છન્દાગમનં, નપ્પસંસન્તિ પણ્ડિતા;

અદુટ્ઠચિત્તો ભાસેય્ય, ગિરં સચ્ચુપસંહિતન્તિ.

ભરુજાતકં [કુરુરાતકં (ક.)] તતિયં.

૨૧૪. પુણ્ણનદીજાતકં (૨-૭-૪)

૧૨૭. પુણ્ણં નદિં યેન ચ પેય્યમાહુ, જાતં યવં યેન ચ ગુય્હમાહુ;

દૂરં ગતં યેન ચ અવ્હયન્તિ, સો ત્યાગતો [ત્યાભતો (સ્યા. ક.) પહેળિગાથાભાવો મનસિ કાતબ્બો] હન્દ ચ ભુઞ્જ બ્રાહ્મણ.

૧૨૮. યતો મં સરતી રાજા, વાયસમ્પિ પહેતવે;

હંસા કોઞ્ચા મયૂરા ચ [હંસકોઞ્ચમયૂરાનં (ક. અટ્ઠ. પાઠન્તરં)], અસતીયેવ પાપિયાતિ.

પુણ્ણનદીજાતકં ચતુત્થં.

૨૧૫. કચ્છપજાતકં (૨-૭-૫)

૧૨૯. અવધી વત અત્તાનં, કચ્છપો બ્યાહરં ગિરં [કચ્છપોવ પબ્યાહરં (સ્યા.), કચ્છપો સો પબ્યાહરં (ક.)];

સુગ્ગહીતસ્મિં કટ્ઠસ્મિં, વાચાય સકિયાવધિ.

૧૩૦. એતમ્પિ દિસ્વા નરવીરિયસેટ્ઠ, વાચં પમુઞ્ચે કુસલં નાતિવેલં;

પસ્સસિ બહુભાણેન, કચ્છપં બ્યસનં ગતન્તિ.

કચ્છપજાતકં પઞ્ચમં.

૨૧૬. મચ્છજાતકં (૨-૭-૬)

૧૩૧. ન માયમગ્ગિ તપતિ, ન સૂલો સાધુતચ્છિતો;

યઞ્ચ મં મઞ્ઞતે મચ્છી, અઞ્ઞં સો રતિયા ગતો.

૧૩૨. સો મં દહતિ રાગગ્ગિ, ચિત્તં ચૂપતપેતિ મં;

જાલિનો મુઞ્ચથાયિરા મં, ન કામે હઞ્ઞતે ક્વચીતિ.

મચ્છજાતકં છટ્ઠં.

૨૧૭. સેગ્ગુજાતકં (૨-૭-૭)

૧૩૩. સબ્બો લોકો અત્તમનો અહોસિ, અકોવિદા ગામધમ્મસ્સ સેગ્ગુ;

કોમારિ કો નામ [કોમારિકા નામ (ક.), કોમારિકો નામ (સ્યા. પી.)] તવજ્જ ધમ્મો, યં ત્વં ગહિતા પવને પરોદસિ.

૧૩૪. યો દુક્ખફુટ્ઠાય ભવેય્ય તાણં, સો મે પિતા દુબ્ભિ વને કરોતિ;

સા કસ્સ કન્દામિ વનસ્સ મજ્ઝે, યો તાયિતા સો સહસં કરોતીતિ.

સેગ્ગુજાતકં સત્તમં.

૨૧૮. કૂટવાણિજજાતકં (૨-૭-૮)

૧૩૫. સઠસ્સ સાઠેય્યમિદં સુચિન્તિતં, પચ્ચોડ્ડિતં પટિકૂટસ્સ કૂટં;

ફાલઞ્ચે ખાદેય્યું [અદેય્યું (સી. પી.)] મૂસિકા, કસ્મા કુમારં કુલલા ન [નો (સી. સ્યા. પી.)] હરેય્યું.

૧૩૬. કૂટસ્સ હિ સન્તિ [સન્તીધ (ક.)] કૂટકૂટા, ભવતિ [ભવન્તિ (ક.)] ચાપિ નિકતિનો નિકત્યા;

દેહિ પુત્તનટ્ઠ ફાલનટ્ઠસ્સ ફાલં, મા તે પુત્તમહાસિ ફાલનટ્ઠોતિ.

કૂટવાણિજજાતકં અટ્ઠમં.

૨૧૯. ગરહિતજાતકં (૨-૭-૯)

૧૩૭. હિરઞ્ઞં મે સુવણ્ણં મે, એસા રત્તિં દિવા કથા;

દુમ્મેધાનં મનુસ્સાનં, અરિયધમ્મં અપસ્સતં.

૧૩૮. દ્વે દ્વે ગહપતયો ગેહે, એકો તત્થ અમસ્સુકો;

લમ્બત્થનો વેણિકતો, અથો અઙ્કિતકણ્ણકો;

કીતો ધનેન બહુના, સો તં વિતુદતે જનન્તિ.

ગરહિતજાતકં નવમં.

૨૨૦. ધમ્મધજજાતકં (૨-૭-૧૦)

૧૩૯. સુખં જીવિતરૂપોસિ, રટ્ઠા વિવનમાગતો;

સો એકકો રુક્ખમૂલે [અરઞ્ઞસ્મિં (સી. સ્યા. પી.)], કપણો વિય ઝાયસિ.

૧૪૦. સુખં જીવિતરૂપોસ્મિ, રટ્ઠા વિવનમાગતો;

સો એકકો રુક્ખમૂલે, કપણો વિય ઝાયામિ;

સતં ધમ્મં અનુસ્સરંતિ.

ધમ્મધજજાતકં દસમં.

બીરણથમ્ભવગ્ગો સત્તમો.

તસ્સુદ્દાનં –

અથ બીરણથમ્ભવરો ચ નટો, ભરુરાજવરુત્તમપુણ્ણનદી;

બહુભાણિ અગ્ગિપવને મૂસિકા, સહલમ્બત્થનો કપણેન દસાતિ.